Արամ Մանուկեանի Արձանի Տեղադրման Որոշում
Ձայներու 43 կողմ, 12 դէմ յարաբերակցութեամբ Երեւանի քաղաքապետարանի աւագանիի նիստին ընդունուեցաւ Արամ Մանուկեանի արձանի տեղադրման որոշումը` ըստ Դաւիթ Մինասեանի նախագիծին:
Պետական, քաղաքական, զինուորական գործիչ Արամ Մանուկեանի արձանը պիտի տեղադրուի Երեւանի Արամի եւ Նալպանտեան փողոցներու քառուղիին յարող տարածքին մէջ:
«Ելք» խմբակցութիւնը յայտնեց, որ դէմ պիտի քուէարկէ` պատճառաբանելով, որ մրցումը տեղի ունեցած է անարդար, Դաւիթ Մինասեանի նախագիծը չէր ներկայացուած անոր: Ի պատասխան «Ելք»-ի մեղադրանքին, փոխքաղաքապետ Արամ Սուքիասեան յայտարարեց, որ Արամ Մանուկեանի արձանը տեղադրելու համար մրցումը երկու փուլ ունեցած է: Ըստ անոր, մրցումին առաջին փուլով ներկայացուած որեւէ աշխատանք բարձր գնահատականի չէ արժանացած, այդ պատճառով ալ երկրորդ փուլ եղած է:
«Երկիր ծիրանի»-ն յայտնեց, որ պիտի չմասնակցի քուէարկութեան:
