ԱՐԱՄ Ա. ԿԱԹՈՂԻԿՈՍԻ ՀԱՆԴԻՊՈՒՄՆԵՐԸ ԱԹԷՆՔԻ ՄԷՋ

0 0
Read Time:2 Minute, 57 Second

aram 1

ԱԹԷՆՔ.- Հոկտեմբեր 18-22-ին, Մեծի Տանն Կիլիկիոյ Արամ Ա. Կաթողիկոս Յունաստան ժամանած էր, մասնակցելու տեղւոյն «Կրօններու ու մշակոյթներու խաղաղ գոյակցութիւնը Միջին Արեւելքէն ներս» խորագրով համագումարին:
Այս առթիւ, Երեքշաբթի, Հոկտեմբեր 20-ին,Արամ Ա. Վեհափառ Հայրապետը հանդիպում մը ունեցաւ Յունաստանի Հանրապետութեան Նախագահ Տիար Փրոքոփիս Փաւլոփուլոսի հետ, ընկերակցուեամբ Յունաստանի Հայոց Թեմի Առաջնորդ Գերշ. Տ. Խորէն Արք. Տողրամաճեանի եւ Ազգային Վարչութեան ատենապետ Տիար Արա Մանկոյեանի:p1
Տեսակցութեան առթիւ, Յունաստանի նախագահը յայտնեց.- «Ես յարգանք ունիմ հայ ժողովուրդին ու անոր արդար դատին նկատմամբ եւ կը վստահեցնեմ թէ պիտի շարունակեմ զօրավիգ կանգնիլ Հայ Դատին»: Նաեւ, նախագահը նաեւ դրուատիքով խօսեցաւ Յունաստանի հայ գաղութին մասին, որ իր կարեւոր ներդրումը կը բերէ երկրի բարգաւաճման ու զարգացման:
Նաեւ, Արամ Ա. Վեհափառ Հայրապետը կարեւոր հանդիպումներ ունեցաւ Յունաստանի Արտաքին Գործոց Նախարարին հետ, ողջունելով սոյն համագումարը կազմակերպելու նախարարութեան նախաձեռնութիւնը:
Վեհափառ Հայրապետին հետ հանդիպումներ ունեցան Հրէական Միջազգային Կրօնական-Մշակութային Կազմակերպութեան նախագահը, Իրաքի խորհրդարանի քրիստոնեայ պլոքին նախագահը, Շուէտի խորհրդարանի Ասորի երեսփոխաններու ներկայացուցիչը, Եկեղեցիներու Համաշխարհային Խորհուրդի Ընդհանուր Քարտուղարը եւ Աթէնքի Տնտեսագիտութեան համալսարանի նախագահը:
Նորին Սրբութիւնը նաեւ հանդիպումներ ունեցաւ ներկայ պատրիարքներուն ու հոգեւոր պետերուն եւ Վատիկանի ու զանազան եկեղեցիներու ներկայացուցիչներուն հետ: Վեհափառ Հայրապետը յանուն ժողովին մասնակից պատրիարքներուն ու եկեղեցիներու ներկայացուցիչներուն խօսք առաւ Յունաստանի Եկեղեցւոյ Հոգեւոր Պետին կողմէ տրուած ճաշկերոյթին եւ շեշտեց եկեղեցիներու միջեւ գործակցութեան, սիրոյ ու եղբայրութեան կարեւորութիւնը դիմագրաւելու ներկայ աշխարհին տագնապները:
Յունաստան-Հայաստան խմբակի նախագահը ի պատիւ Վեհափառ Հայրապետին ճաշ տուաւ, որուն նաեւ ներկայ էին Յունաստանի Հայոց Թեմի Առաջնորդ Գերշ. Տ. Խորէն Արք. Տողրամաճեան, Յունաստանի մէջ Հայաստանի դեսպանը եւ քաղաքական բարձրաստիճան անձնաւորութիւններ:aram 4
Արամ Ա. Կաթողիկոս շուրջ ժամ մը տեւողութեամբ հանդիպում ունեցաւ Սուրիոյ հարցով Միացեալ Ազգերու Կազմակերպութեան յատուկ պատուիրակ Սթեֆան Տը Միսթուրայի հետ:
Սուրիայէն ներս տիրող ընդհանուր կացութեան ու վերջին զարգացումներուն շուրջ տեղեկութիւններու եւ տեսակէտներու փոխանցումէ ետք, Վեհափառ Հայրապետը Սուրիական հարցին խաղաղ լուծման իր պատկերացումը ներկայացուց հետեւեալ ձեւով:
Առաջին հերթին, Նորին Սրբութիւնը շեշտեց սուրիական տագնապին քաղաքական լուծում տալու հրամայական անհրաժեշտութիւնը՝ յիշեցնելով որ նման տագնապներուն մնայուն ու ամբողջական լուծում կարելի չէ տալ սոսկ զինուորական միջամտութեամբ: Քաղաքական լուծում կ’ենթադրէ քաղաքական գործընթաց՝ մասնակցութեամբ խաղաղ լուծման յանձնառու բոլոր կողմերուն: Նման գործընթացին պէտք է մասնակցին կողմերը առանց նախապայմանի, որովհետեւ վերջին խօսքը կը պատկանի ժողովուրդին, ըսաւ Վեհափառ Հայրապետը: Ապա, Նորին Սրբութիւնը առաջարկեց Տը Միսթուրային, որ կողմերը նման յանձնառութեան մղող ու քաղաքական գործընթացին յստակ ուղղութիւն տուող «ճամբու քարտէս» մը պատրաստէ՝ յատուկ ուղեգիծով ու ժամանակացոյցով: Վեհափառ Հայրապետը նաեւ յիշեցուց Մ.Ա.Կ.ի պատուիրակին, որ բնականաբար նման նախաձեռնութեան գծով անհրաժեշտ է ունենալ միջազգային ու շրջանային ուժերուն օրհնութիւնը: Շարունակելով իր պատկերացումը, Նորին Սրբութիւնը առաջարկեց Տը Միսթուրային, որ յիշեալ ծրագրի գործադրութիւնը աւելի հնարաւոր կրնայ դառնալ երկու անհրաժեշտ քայլերէ մեկնելով՝ առաջին, ընդհանուր զինաթուլ եւ արտաքին զինուորական օժանդակութիւններու դադարեցում ու երկրորդ՝ հանգրուանային մօտեցում թէ՛ «ճամբու քարտէս»ին մէջ ճշդուած սկզբունքներու գործադրութեան եւ թէ շրջաններու մէջ ապահովութեան հաստատման: Այս վերջին կէտին գծով, Արամ Ա. Կաթողիկոս առաջարկեց սկսիլ Հալէպէն, նկատի ունենալով քաղաքին քրիստոնեայ-իսլամ նկարագիրը ու պատմական կարեւորութիւնը:
Մ.Ա.Կ.ի պատուիրակը ամբողջութեամբ համաձայն գտնուեցաւ Վեհափառ Հայրապետին պատկերացումին ու առաջարկներուն, միաժամանակ ան իր մտահոգութիւնը յայտնեց կարգ մը կողմերու մօտեցման, ինչպէս նաեւ արտաքին կողմերու հետապնդած նպատակներուն գծով: Ան նաեւ համաձայն գտնուեցաւ, որ Հալէպը դառնայ առաջին հանգրուանը Սուրիոյ տագնապը քաղաքական լուծման առաջնորդող գործընթացին: Այս շրջագծէն ներս, Տը Միսթուրա յիշեցուց Նորին Սրբութեան, որ դժբախտաբար արտաքին որոշ կողմ մը պատճառ հանդիսացաւ, որ ամիսներ առաջ Հալէպի համար պատրաստած իր ապահովական ծրագիրը ձախողութեան մատնուի:
Վեհափառ Հայրապետը յիշեցնելով Տը Միսթուրային, որ հայ համայնքը Սուրիոյ կարեւոր քրիստոնեայ համայնքներէն մէկն է, անհրաժեշտ տեղեկութիւններ փոխանցեց հայ համայնքին ու յատկապէս Հալէպի մէջ անոր դիմագրաւած դժուարութիւններուն մասին:
Նորին Սրբութիւնը նաեւ հանդիպումներ ունեցաւ Յունաստանի Հայոց Թեմի Ազգային Վարչութեան անդամներուն եւ Աթէնքի հայ գաղութի կեանքէն ներս գործող զանազան կազմակերպութիւններու ներկայացուցիչներուն հետ: Վեհափառ Հայրապետը գնահատեց անոնց նուիրուածութիւնը եւ հրամայական անհրաժեշտութիւն նկատեց մեր կառոյցներն ու կազմակերպութիւնները աշխոյժ պահելը, համագործակցութիւնը եւ մանաւանդ երիտասարդ ուժերու ներգրաւումը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles