ԱՏՐՊԷՅՃԱՆԸ ԾԱՂՐՈՒՄ Է ՄԻՆՍՔԻ ԽՄԲԱԿԻ ՀԱՄԱՆԱԽԱԳԱՀՆԵՐՈՒՆ… ՀԱՅԱՍՏԱՆԸ՝ ԾԱՓԱՀԱՐՈՒՄ

ԳԷՈՐԳ ԱՂԱՊԱՊԵԱՆ (յապաւումով) Յունուարի 27-ին Քրաքովում (Լեհաստան) Ատրպէյճանի Արտաքին Գործոց նախարար Էլմար Մամետիարովի հետ հանդիպումից յետոյ ԵԱՀԿ Մինսքի Խմբակի համանախագահները հանդէս են եկել համատեղ յայտարարութեամբ, որն իր շեշտադրումներով որոշակիօրէն տարբերւում է նախորդներից: Յայտարարութեան մէջ Ատրպէյճանին կոչ է արւում հաւատարիմ մնալ հրադադարի պահպանման, իսկ Հայաստանին` ,միջոցներ ձեռնարկել լարուածութիւնը նուազեցնելու ուղղութեամբե: Առաջին անգամ Մինսքի Խմբակի համանախագահները փորձ են կատարում տարբերակուած մօտեցում ցուցաբերել հրադադարի խախտման պատասխանատուութիւնը հասցէականացնելու հարցում եւ անուղղակիօրէն Ատրպէյճանին են մեղադրում հայ-ատրպէյճանական սահմանագծի ողջ երկայնքով հրադադարի խախտման` արդէն հազարների հասնող դէպքերի համար: Եւ, այնուամենայնիւ, սա ընդամէնը փորձ է, որը, վստահաբար կարելի է ասել, Ատրպէյճանի համար ոչ մի հետեւանք չի ունենալու: Եւ ներկայումս հայկական փորձագիտական շրջանակների կողմից արտայայտուող լաւատեսութիւնը, որակումները, թէ սա հայկական կողմի դիւանագիտական յաղթանակն է, ոչ միայն չափազանցուած են, այլեւ անհեթեթութիւն: Նախ` յայտարարութիւնից այդպէս էլ պարզ չի դառնում, թէ որն է համանախագահների ակնկալիքը Հայաստանից, այսինքն` այդ ի՞նչ միջոցներ պէտք է ձեռնարկի Հայաստանը` լարուածութիւնը նուազեցնելու համար, որ չի արել մինչեւ հիմա: Գուցէ նկատի ունեն ատրպէյճանական յարձակումներին եւ արդէն իսկ հայկական դիրքերի վրայ ուղղակի յարձակումներին որեւէ կերպ չպատասխանե՞լը, թէ՞, այնուամենայնիւ, բանակցութիւններում Ատրպէյճանի չյագեցող ախորժակը բաւարարելուն ուղղուած զիջումներին գնալը: Երկրորդ` յայտարարութիւնից բացարձակապէս չի հետեւում, որ Մամետիարովի հետ ինչ-որ պայմանաւորուածութիւններ են ձեռք բերուել, որ Պաքուն զսպուածութիւն հանդէս բերելու, նախայարձակ գործողութիւնները դադարեցնելու ինչ-որ նոր յանձնառութիւն է ստանձնել: Յայտարարութիւնն ընդամէնը այն մասին է, որ Մամետիարովի հետ ինչ-որ հարցերի շուրջ քննարկումներ են եղել: Երրորդ` եթէ համանախագահներն իսկապէս նպատակ ունէին վերջապէս իրերը կոչել իրենց անուններով եւ հրադադարի խախտման պատասխանատուութիւնն ամբողջութեամբ դնել Ատրպէյճանի վրայ, ապա տարօրինակ, եթէ չասենք` խիստ անտրամաբանական է երկու կողմերին այդ առանձին կոչերը հնչեցնելուց անմիջապէս յետոյ յայտարարութեան մէջ գրելը, թէ ,երկու կողմերն էլ պէտք է հաւատարիմ մնան հրադադարի պահպանման ռեժիմինե: Այս ձեւակերպումն ինքնին արժէզրկում է ինչպէս յայտարարութիւնը, այնպէս էլ հրադադարի խախտման համար Ատրպէյճանի պատասխանատուութիւնն ընդգծելու` համանախագահների թոյլ փորձերը: Այս հանգամանքը Պաքւում հերթական անգամ ընկալեցին համարժէքօրէն: Մամետիարովի հետ հանդիպումից ընդամէնը երկու օր անց հրադադարի ռեժիմի պահպանման նպատակով շփման գծում ԵԱՀԿ-ի կողմից հերթական դիտարկումն անցկացնելիս ատրպէյճանական կողմը հրաժարուեց դիտորդներին հանել առաջին գիծ` Տաւուշի սահմանային գօտու այն կէտը, որն ընտրուել էր նախապէս: Ատրպէյճանական կողմը հասաւ նրան, որ դիտարկումն անցկացուի իր նախընտրած մէկ այլ հատուածում: Սա նման առաջին դէպքը չէ: Նախկինում արձանագրուել են դէպքեր, երբ Ատրպէյճանն ընդհանրապէս միակողմանի հրաժարուել էր դիտորդներին առաջին գիծ հանել: Մինչդեռ` երբեւէ ո՛չ ԵԱՀԿ գործող նախագահի յատուկ ներկայացուցիչ Անճէյ Քասպըրչիքը, որի գործառոյթների սահմաններում է շփման գծում հրադադարի պահպանման դրտարկման անցկացումը, ո՛չ էլ ԵԱՀԿ Մինսքի Խմբակի համանախագահները Ատրպէյճանի այս վարքագծին որեւէ գնահատական չեն տուել: Նման գնահատական չկար նաեւ նրանց վերջին յայտարարութեան մէջ: Աւելին` Յունուարի 29-ի գիշերը ազերի զինուժը հերթական յարձակման փորձն է կատարել` դարձեալ Տաւուշի մարզում: Գնդակոծել է քաղաքացիական աւտոմեքենայ, իսկ դիւերսիոն խմբին ելման դիրքեր ետ շպրտելու համար մղուած մարտում հայկական կողմը երկու վիրաւոր է ունեցել: Սրանով է, ահա, Պաքուն պատասխանում ԵԱՀԿ Մինսքի խմբի` իրեն ուղղուած կոչերին` հերթական անգամ ցոյց տալով, որ արդէն շատ վաղուց վարժուել է նման հերթապահ, կրաւորական յայտարարութիւններին եւ որ բանակցութիւններն իր համար զրոյական նշանակութիւն ունեն: Նման գործողութիւններ հէնց բանակցութիւններին նախորդող կամ յաջորդող օրերին ձեռնարկելով` Պաքուն բացայայտ ցոյց է տալիս, որ դրանք աւելի շատ հէնց Մինսքի Խմբակի դէմ են ուղղուած: Պարզ է, որ այս վարքագիծը շարունակուելու է այնքան, մինչեւ կա՛մ Ատրպէյճանը չհասնի ՄԽ համանախագահների ձեւաչափի փոփոխութեան` իր վաղեմի երազանքի իրագործմանը, կա՛մ համանախագահները վերջապէս չբռնեն Պաքուի կոկորդից: Ահա այս իմաստով է, որ Մինսքի Խմբակի համանախագահների յայտարարութիւնը ոչ թէ հայկական կողմի դիւանագիտական յաղթանակն է, այլ ճիշտ հակառակը: Հայկական կողմը, դիւանագիտական անկարողութիւն կամ անճարակութիւն դրսեւորելով, փաստացի ինքն է թոյլ տալիս, որ Ատրպէյճանն աստիճանաբար առարկայական դարձնի Մինսքի Խմբակի համանախագահների այս ձեւաչափի անգործունակութիւնը: Նոյնիսկ այն բանից յետոյ, երբ Պերլինում Ալիեւի հետ հանդիպումից յետոյ Կանցլեր Անճելա Մերքըլը պարզ յայտարարեց Մինսքի Խմբակի համանախագահ դառնալու` Գերմանիոյ ձգտումների մասին, պաշտօնական Երեւանը իր արձանային վիճակից դուրս գալու որեւէ նշան հանդէս չբերեց: Այսպիսի անատամ եւ անսկզբունքային դիւանագիտութեան հետեւանքով է Ատրպէյճանը կարողանում արդարացնել ներկայումս սահմանին իրավիճակը լարելու, թէժացնելու իր մարտավարութիւնը` անարգել յայտարարելով, թէ դա արւում ու արուելու է իր ,գրաւուած տարածքներիցե հայկական զինուած ուժերը դուրս հանելու համար: Այսինքն` Պաքուն ոչ միայն հասել է Արցախի հակամարտութիւնը զուտ Հայաստանի կողմից իր տարածքների նկատմամբ նածայարձակման հետեւանք ներկայացնելուն, դրանով հակամարտութեան ողջ էութիւնը խեղաթիւրելուն, այլեւ արդէն իսկ անցել է դրանից բխող` յարձակողին ,իր տարածքներիցե հեռացնելուն ուղղուած ռազմական գործողութիւնների: Այս պայմաններում, երբ, առհասարակ, անիմաստ է դառնում նոյնիսկ բանակցութիւնների մասին խօսելը, Երեւանում կարծես մոռացել են Արցախին բանակցութիւններուն մասնակցելու խնդրի մասին, որն ատրպէյճանական այս քաղաքականութիւնը, Արցախի հիմնահարցի էութեան խեղաթիւրման ընթացքը կասեցնելու թերեւս միակ դիւանագիտական քայլն է: Որքան կարելի է հասկանալ, համանախագահներն յառաջիկայում հանդիպելու են նաեւ Հ.Հ. Արտաքին Գործոց նախարար Եդուարդ Նալպանտեանի հետ: Ոչ ոք չի կարող ասել, թէ նրանք ինչ յայտարարութիւն կ’անեն Նալպանտեանի հետ հանդիպումից յետոյ: Գուցէ նրա լուռ հայեացքի ներքոյ նաեւ Հայաստանի՞ն հրադադարի խախտման պատասխանատու համարեն: Քանի դեռ Հ.Հ. Արտաքին Գործոց նախարարութիւնը նիրուանայից իրատես իրականութիւն չի վերադարձել, ամէն ինչ արդէն հնարաւոր է: Սպասենք:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

ԱՏՐՊԷՅՃԱՆԸ ԾԱՂՐՈՒՄ Է ՄԻՆՍՔԻ ԽՄԲԱԿԻ ՀԱՄԱՆԱԽԱԳԱՀՆԵՐՈՒՆ… ՀԱՅԱՍՏԱՆԸ՝ ԾԱՓԱՀԱՐՈՒՄ

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Համով Պաղպաղակ, Անհամ «Բարբարակ». Տառացի Տառադարձութեան Տառապանքը

Խորհուրդներուս Աշխարհէն…«ՏԱՐԵԴԱՐՁ»-Ս…

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է