0
0
Շաբաթէ մը ի վեր, թէ՛ Արցախի եւ թէ՛ Սիւնիքի շրջանէն ներս, ատրպէյճանական ուժեր կը յառաջանան, առանց որեւէ դիմադրութեան։ Արդարեւ, Մարտ 25-26-ին Ստեփանակերտ-Լիսագոր հողային ճամբու հատուածին մէջ բարձունքի գրաւումէն եւ այլընտրանքային ճանապարհը վերահսկողութեան տակ առնելէ ետք, Ատրպէյճանի զինուած ուժերը դարձեալ յառաջխաղացք արձանագրեցին` բարելաւելով այդ ուղղութեամբ իրենց դիրքերը:
Արցախէն կը շարունակեն պնդել, որ ռուսերը կը բանակցին ատրպէյճանական կողմին հետ, հողային ճամբու գրաւած բարձունքէն ատրպէյճանցիները ելման դիրքերը վերադարձնելու համար:
Ատրպէյճանական յառաջխաղացքէն ետք, Արցախի 4 համայնքները` Լիսագորը, Մեծ Շէնը, Հին Շէնը եւ Եղցահողը կտրուած են Ստեփանակերտէն եւ Արցախի միւս բնակավայրերէն: Լիսագորի համայնաքապետ Գագիկ Նասիպեան կը յայտնէ, որ Ատրպէյճանի զինուժը այժմ հողային ճամբէն ընդամէնը 300 մեթր հեռաւորութեան վրայ կը գտնուի: Այդ ճանապարհով երթեւեկելը անկարելի է:
Իսկ Սիւնիքի Տեղ գիւղի բնակիչները, որոնք առանց հեռադիտակի արդէն կը հետեւին ատրպէյճանցիներու շարժումներուն, տեղեկացուցին, որ գիւղին մէջ դիրք բռնած ատրպէյճանցիները հոն կը գտնուին եւ կը շարունակեն խրամատաւորման աշխատանքները: Հայկական կողմը գիւղէն քիչ մը ներքեւ հսկիչ կէտ մը տեղադրած է, որպէսզի բնակիչները ատրպէյճանցիներուն գտնուած տարածքներուն կողմը չանցնին … բայց այդտեղ տակաւին կան հողատարածքներ, որոնք գիւղացիներուն կը պատկանին:
Պաշտպանութեան նախարարութիւնը ցարդ որեւէ տեղեկութիւն չէ տարածած Տեղ-Կոռնիձոր հատուածին մէջ ատրպէյճանական ներխուժման մասին: Միայն Ազգային անվտանգութեան ծառայութիւնը յայտարարեց, որ 5 սահմանային կէտերով ատրպէյճանցիները մինչեւ 300 մեթր առջեւ տեղակայուած են՝ չսպասելով նախապէս պայմանաւորուած ճշգրտումներուն:
Որեւէ գերատեսչութիւն՝ Պաշտպանութեան նախարարութիւնը, Ազգային անվտանգութեան ծառայութիւնը, նաեւ Սահմանազատման եւ սահմանային անվտանգութեան հարցերու յանձնաժողովը ղեկավարող փոխվարչապետ Մհեր Գրիգորեանի գրասենեակը չեն մեկնաբաներ, թէ յատկապէս ի՛նչ բարելաւման մասին է խօսքը:
