Ատրպէյճանական Լայնածաւալ Նախայարձակում

0 0
Read Time:3 Minute, 18 Second

 

Սեպտեմբեր 13 -ին Ատրպէյճանի կատարած նախայարձակումէն ի վեր, կացութիւնը լարուած կը մնայ: Հայոց բանակի զոհերուն թիւը հարիւրէն աւելի է:

Արտակարգ իրավիճակներու նախարարութեան մամլոյ խօսնակ Հայկ Կոստանեան իր կարգին դիտել տուաւ, որ ատրպէյճանական զինուժի կրակոցներուն եւ մարտական գործողութիւններուն պատճառով, Ջերմուկի անտառներուն մէջ հրդեհ բռնկած է: Ան աւելցուց, որ այն տարածքներուն մէջ, որոնք կը դիտարկուին հակառակորդին կողմէ, հրդեհաշիջման աշխատանքներ կարելի չէ կատարել, մնացեալ շրջաններուն մէջ հրշէջները կը փորձեն մարել հրդեհները: Ջերմուկ համայնքի ղեկավար Վահագն Արսէնեան տեղեկացուց, թէ           թշնամիին յարձակումէն անմիջապէս ետք, Ջերմուկի մէջ կազմուած են ինքնապաշտպանական ջոկատներ, որոնք պատրաստակամութիւն յայտնած են միանալու դիրքերուն մէջ կանգնած մեր զինուորներուն: «Ջերմուկը չենք լքել ոչ մի րոպէ, եւ անհրաժեշտութեան դէպքում բոլորս պատրաստ ենք պայքարելու մեր հայրենիքի, մեր հող ու ջրի համար: Կոչ եմ անում սեփական նախաձեռնութեամբ դիրքեր չբարձրանալ, հետեւել համայնքապետարանի եւ պաշտպանութեան նախարարութեան  ցուցմունքներուն», ըսաւ ան:

Վարդենիսի համայնքապետարանի բանբեր Էտկար Պետրոսեան նշեց, որ Գեղարքունիքի մարզին եւ Վարդենիս քաղաքին մէջ իրավիճակը կը շարունակէ մնալ լարուած: «Արկեր չեն ընկել քաղաքի վրայ ո՛չ երէկ, ո՛չ էլ այսօր: Արկեր ընկել են միայն սահմանամերձ գիւղերի՝ Սոթքի, Կութի, Նորաբակի ուղղութեամբ: Հրետակոծութիւնը գիւղերի ուղղութեամբ արդէն դադարել է, դրանք  միայն սահմանին են: Խուճապ քաղաքում չկայ, տարհանուել են այն բնակավայրերի բնակիչները, որոնք հակառակորդը հրետանակոծել է», ըսաւ Պետրոսեան՝ աւելցնելով, որ Վարդենիս քաղաքի դպրոցները եւ մանկապարտէզները փակ են:

Հայաստանի կրթութեան, գիտութեան, մշակոյթի եւ մարմնակրթութեան նախարարութենէն յայտնեցին, որ ստեղծուած վիճակին պատճառով Գեղարքունիքի, Վայոց Ձորի եւ Սիւնիքի մարզերու կարգ մը շրջաններուն մէջ դպրոցները փակուած են՝ ապահովական նկատառումներէ մեկնած:

Յայտնենք, որ տարբեր մարզերէ փոխանցուած անպաշտօն տեղեկութիւններ խօսեցան պաշտօնապէս յայտարարուած զոհերու թիւէն աւելի մեծ թիւի մասին, սակայն ոչինչ հաստատուեցաւ Հայաստանի համապատասխան կառոյցներուն կողմէ:

Ատրպէյճանական լրատուամիջոցներ յայտնեցին, որ ատրպէյճանական բանակը մեծ կորուստներ ունի, որոնց թիւը կը հասնի յիսունի:

Քաղաքական գետնի վրայ, Ա.Մ.Ն. արտաքին գործոց նախարար Էնթընի  Պլինքըն կոչ ուղղեց անյապաղ դադրեցնելուբոլոր զինուորական գործողութիւնները:

Ան  հեռաձայնային հաղորդակցութիւն ունեցաւ Հ.Հ. վարչապետին հետ, շեշտելով, որ Միացեալ Նահանգներ խորապէս մտահոգ են Հայաստան-Ատրպէյճան սահմանի երկայնքին յարձակումներու, ներառեալ Հայաստանի մէջ բնակավայրերու եւ քաղաքային ենթակառոյցներու դէմ հարուածներու մասին հաղորդումներով: Ան նշեց, որ ինչպէս նախապէս յստակօրէն նշուած է, տագնապը զինուորական լուծում չի կրնար ունենալ:

Մինչ այդ, Պլինքըն Հայաստանի վարչապետին հետ հեռաձայնային հաղորդակցութեան ընթացքին ամերիկեան կողմի խոր մտահոգութիւնը արտայայտած է ստեղծուած կացութեան նկատմամբ եւ անթոյլատրելի նկատած կացութեան հետագայ լարումը: Ան Միացեալ Նահանգներու պատրաստակամութիւնը յայտնած է ջանքեր գործադրելու` կացութիւնը կայունացնելու ուղղութեամբ:

Ա.Մ.Ն. արտաքին գործոց  նախարարը կապ հաստատեց Ատրպէյճանի նախագահ Իլհամ Ալիեւի հետ` մտահոգութիւն յայտնելով Հայաստան-Ատրպէյճան սահմանին զինուորական գործողութիւններու, ներառեալ Հայաստանի տարածքը գնդակոծելու առնչութեամբ:

Պլինքըն Ալիեւին կոչ ուղղեց դադրեցնելու զինուորական գործողութիւնները եւ ընդգծեց, որ Միացեալ Նահանգներ պիտի ձգտին բախումներու դադրեցման ու Հայաստանի եւ Ատրպէյճանի միջեւ խաղաղութեան հաստատման:

Ներկայացուցիչներու տան անդամ Էտըմ Շիֆ դիմատետրի իր էջին վրայ յայտնեց. «Ասիկա զինադադարի կոպտագոյն խախտում է եւ ուղղակի յարձակում Հայաստանի գերիշխանութեան վրայ: Միացեալ Նահանգներ պէտք է դադրեցնեն Ազրպէյճանին տրամադրուող բոլոր օգնութիւնները` անյապաղ եւ ընդմիշտ»:

Քոնկրէսի Ներկայացուցիչներու տան այլ անդամ մը՝ Ֆրենք Փըլոն գրառում կատարեց տեղեկացնելով, թէ խստօրէն կը դատապարտէ  Հայաստանի հարաւային շրջանին վրայ Ատրպէյճանի անխոհեմ զինուորական յարձակումը եւ թէ Արտաքին գործոց նախարարութիւնն ու արտաքին գործոց նախարար Էնթընի Պլինքընը պէտք է ԵԱՀԿ-ի Մինսքի խմբակին հետ աշխատին շրջանին մէջ խաղաղութիւն ապահովելու համար:

Քոնկրէսական Ճէքի Սփիր յայտարարեց. «Վրդոված եմ Ատրպէյճանի կողմէ հայկական խաղաղ քաղաքներու ուղղութեամբ զանգուածային հրետանային կրակ բանալու հաղորդագրութիւններով: Որպէսզի յստակ ըլլայ` անոնք միջազգայնօրէն ճանչցուած հայկական քաղաքներ են, ոչ թէ վիճելի տարածքներ: Անբարեխիղճ է, որ Միացեալ Նահանգներ կը շարունակեն զինուորական աջակցութիւն տրամադրել Ատրպէյճանին»:

Ծերակոյտի արտաքին յարաբերութիւններու յանձնախումբի նախագահ Ռապըրթ Մենենտէս յայտնեց, որ հայկական քաղաքներու եւ անմեղ բնակիչներու հրետակոծումը անընդունելի է եւ անօրինական: «Աշխարհը պէտք է դիմադրէ բռնատիրական դաժանութեան: Միացեալ Նահանգները պէտք է դադրեցնեն Ատրպէյճանի անվտանգութեան ապահովման ուղղուած աջակցութիւնը»:

Ներկայացուցիչներու տան անդամ Ճիմ Քոսթա, իր կարգին  գրեց. «Ես կը դատապարտեմ Ազրպէյճանի` Հայաստանի վրայ չսադրուած յարձակումը: Սիրտս կը ցաւի Հայաստանի ժողովուրդին համար, եւ ես ամուր կանգնած եմ անոնց կողքին: Ատրպէյճանը չ՛ուզեր ենթարկուիլ խաղաղութեան հոլովոյթին, եւ մենք պէտք է զանոնք պատասխանատուութեան ենթարկենք»:

Ռուսիոյ արտաքին գործոց նախարարութիւնը Հայաստան-Ատրպէյճան սահմանին վրայ Պաքուի շղթայազերծած յարձակումին վերաբերեալ հրապարակեց  հաղորդագրութիւն մը .մտահոգութիւն  յայտնելով եւ կողմերուն կոչ ուղղելով զերծ մնալու կացութեան հետագայ սրումէն, զսպուածութիւն ցուցաբերելու եւ խստօրէն պահպանելու զինադադարը:

Հուսկ, Ֆրանսան Մ.Ա.Կ.-ի Ապահովութեան խորհուրդի նիստի հրաւիրեց` քննարկելու համար Հայաստան-Ատրպէյճան սահմանի կացութեան սրումը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles