0
0
ՈՒԱՇԻՆԿԹԸՆ․- Քոնկրէսական Ատամ Շիֆ (Դեմոկրատական – Քալիֆորնիա) նամակ յղած է` դատապարտելով Կովկասեան բանակցութիւններու հարցերով Միացեալ Նահանգներու արտաքին գործոց նախարարութեան աւագ խորհրդական Լուի Պոնոյի վերջին յայտարարութիւնները: Պոնօ, Մարտ 8-ին շրջան կատարած այցելութեան ժամանակ յայտարարած էր, որ հիմա «պատժամիջոցներու ժամանակը չէ»:
Շիֆի նախաձեռնած նամակին մէջ, մասնաւորաբար, կը նշուի. «Մենք խորապէս մտահոգուած ենք ուղեւորութեան ընթացքին ձեր մեկնաբանութիւններէն, որոնք կը բացառեն Ատրպէյճանի դէմ տնտեսական եւ դիւանագիտական պատժամիջոցներու կիրարկումը` ի պատասխան անոնց ակնյայտ յարձակումին: Հաղորդուած է, որ դուք յայտարարած էք, որ «պատժամիջոցներու ժամանակը չէ… ատիկա այս պահուն նոյնիսկ քննարկման փուլի մէջ չէ»: Մինչ 120 հազար անմեղ մարդիկ երրորդ ամիսն է, որ զրկուած են իրենց հիմնական իրաւունքներէն Լեռնային Ղարաբաղի մէջ շրջափակման պատճառով, որ Արդարադատութեան միջազգային դատարանը Ատրպէյճանին հրամայած է դադրեցնել, հիմա ժամանակը չէ բացառելու որեւէ գործիքակազմ»:
Նամակին մէջ նաեւ կը շեշտուի, որ Միացեալ Նահանգները, նախագահն ու արտաքին գործոց նախարարութիւնը եւ ամբողջ վարչակազմը պէտք է օգտագործեն իրենց տրամադրութեան տակ եղած բոլոր գործիքները` ապահովելու Արցախի ժողովուրդի անվտանգութիւնը, ներառեալ դադրեցնեն ֆինանսական աջակցութիւնը Ատրպէյճանին եւ այդ երկրին դէմ պատժամիջոցներ կիրարկեն:
Ամերիկայի հայ դատի յանձնախումբը կը հաղորդէ, որ Ատամ Շիֆ ստորագրութիւններ կը հաւաքէ Միացեալ Նահանգներու Ներկայացուցիչներու տան նամակի համար: Նամակի հեղինակները եւ Հայ դատի յանձնախումբը դատապարտելի կը նկատեն այն, որ ամերիկացի պաշտօնատարը բացառած է պատժամիջոցները Ատրպէյճանի դէմ, որ արդէն երեք ամիսէ ի վեր Արցախի մէջ շրջափակման մէջ կը պահէ 120 հազար հայեր: Ըստ Ամերիկայի Հայ դատի յանձնախումբի գործադիր տնօրէն Արամ Համբարեանի, ամերիկացի դիւանագէտին կողմէ նման յայտարարութիւն կը հաստատէ, որ երկրի նախագահ Ճօ Պայտընի վարչակազմը որոշակի գործողութիւններ պիտի չձեռնարկէ Ատրպէյճանի դէմ, եւ Իլհամ Ալիեւ կրնայ շարունակել իր հակահայկական գործողութիւնները:
