«Ասիկա Իսկապէս Մեզի Բոլորիս Պէտք Է Դաս Ըլլայ:… Որեւէ Հաշուեյարդար Պէտք Չէ Կատարուի Այդ Անձերուն Նկատմամբ» Յայտնեց Հ.Յ.Դ. Բիւրոյի Քաղաքական Ներկայացուցիչ՝ Արմէն Ռուստամեան

0 0
Read Time:2 Minute, 1 Second

rustamn

ԵՐԵՒԱՆ.- Հ.Յ.Դ. Բիւրոյի քաղաքական ներկայացուցիչ Արմէն Ռուստամեան մեկնաբանեց Էրեբունի ոստիկանատունը գրաւած, եւ ապա անձնատուր եղած զինեալներուն յանձնուելու որոշումը, ինչպէս նաեւ այս բոլորին լոյսին տակ ստեղծուած քաղաքական իրավիճակը: Ան անդրադարձաւ զինուած խումբի անդամներուն այն գիտակցութեան, որ ըլլալով իրենց երկրի հայրենասէր զաւակ, եւ ընկալելով այն, որ այս բոլորը կրնան նոր զոհեր պատճառել, դիմեցին այս քայլին` քաջ գիտնալով, թէ ոչինչ աւելի կ՛արժէ, քան նոր զոհերու արձանագրութեան եւ նոր արիւնահեղութեան կանխարգիլումը: Նաեւ Ռուստամեան կարեւոր նկատեց շուտով վերացնել այն պատճառները, որոնք մարդիկը մղած են դիմելու նման յուսահատ քայլի` աւելցնելով, որ անոնք հասարակութեան մէջ խոր արմատներ նետած պատճառներ են, ուստի պէտք է աշխատիլ, որպէսզի Հայաստանի մէջ այս աստիճանի դժգոհութիւնները նուազին եւ վերանան:
Այս գծով, ան «Երկիր Մետիա»ին յայտնեց թէ.-
Մենք կ՛ողջունենք զինեալ խումբի անդամներուն յանձնուելու որոշումը, քանի որ ատիկա միակ ուղին էր նոր զոհերէ խուսափելու եւ արիւնահեղութիւնը բացառելու: Եւ, բնականաբար, մեր հիմնական հարցը այն էր, որ կարենայինք ճիշդ այս հանգուցալուծման հասնիլ: Ես ասիկա կը նկատեմ նաեւ երկու կողմերու ողջախոհութեան արդիւնք, որովհետեւ այն, ինչ որ իշխանութիւնները համբերատարութեամբ ըրին, հետեւելով գործընթացին, նոյնպէս նպաստեց այս մէկուն:
Ասիկա իսկապէս գնահատելի է, եւ այս կացութեան մէջ, բնականաբար, գլխաւոր հարցը կը մնայ հետեւեալը. մնացած առումներով գործընթացը պէտք է տեղի ունենայ այն տրամաբանութեամբ, որուն մասին մենք յայտարարած էինք: Որեւէ հաշուեյարդար պէտք չէ կատարուի այդ անձերուն նկատմամբ: Մենք պէտք է հետեւինք, եւ հասարակութիւնն ալ ատիկա պէտք է ընէ, որ իսկապէս օրինական եւ ամէնէն մեղմ տրամաբանութեամբ առաջադրուին մեղադրանքները` մեկնելով որոշ յանցագործութիւններէ, որոնք անհերքելի են, բայց մնացած խնդիրները, որոնք թոյլ կու տան, նաեւ օրէնսդրութիւնը կ՛արտօնէ, որ ամէնէն մեղմ կերպով վերաբերին կատարուածին հետ:
Ատոր համար մտածուած քայլեր անհրաժեշտ են: Ընդունելով այս դժգոհութիւնը վերացնելու բոլոր մօտեցումներն ու կարելիութիւնները, մենք չենք ընդունիր այն ուղին, որ կրնայ մեզ իսկապէս հեռացնել այդ նպատակներուն հասնելէ, եւ ասիկա հիմնական դասն է, զոր պէտք է քաղեն բոլորը` ե՛ւ իշխանութիւնները, ե՛ւ հասարակութիւնը, ե՛ւ քաղաքական ուժերը: Կուտակուած խնդիրները լուծելու միակ տրամաբանական ուղին այն ողջամիտ եւ ամբողջ աշխարհին մէջ յայտնի ձեւերն ու մեթոտներն են, որոնցմով պէտք է թէ՛ ժողովրդավարութիւն հաստատուի, թէ՛ իրաւական պետութիւն ամրագրուի, թէ՛ մարդու իրաւունքները պաշտպանուին, որ այս դժգոհութիւնն ու բողոքը, որոնք առարկայականօրէն ժողովուրդին եւ հասարակութեան մէջ առկայ են, տեսնենք, որ կը վերանան:
Սակայն ասոր համար պէտք է տքնաջան աշխատանք, գիտակցուած մօտեցում, մարդիկ, որոնք ասիկա կրնան ընել, այդ գործին պէտք է լծուին: Ասիկա իսկապէս մեզի բոլորիս պէտք է դաս ըլլայ, որ օր առաջ մեր երկրին մէջ հաստատենք այնպիսի կարգեր, այնպիսի համակարգ, որ ոչ ոքի մտքով անցնի, որ կրնայ ոտնահարել իր հայրենակիցին իրաւունքները եւ մեզ շեղել մեր ընդհանուր ազգային պետական նպատակներէն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles