0
0
Հ
Հինգշաբթի, Մայիս 4-ին, Արեւելեան Թեմի Առաջնորդ՝ Գերշ. Տ. Անուշաւան Արքեպիսկոպոս, Քանատայի Առաջնորդ՝ Գերշ. Տ․ Բաբգէն Արքեպիսկոպոս, եւ Արեւմտեան Թեմի Առաջնորդ՝ Գերշ. Տ. Թորգոմ Եպիսկոպոս, Քանատայի Ազգային Առաջնորդարանին մէջ ի հետեւումն իրենց որոշումին հերթական ժողով մը գումարեցին։
Հանդիպումը առիթ հանդիսացաւ, որ երեք Թեմակալ Առաջնորդները միասին քննարկեն հայ ժողովուրդի, Մեծի Տանն Կիլիկիոյ Կաթողիկոսութեան եւ թեմերն ու ազգային կեանքը յուզող կէտերը:
Անոնք անդրադարձան Ն.Ս.Օ.Տ.Տ. Արամ Ա. Վեհափառ Կաթողիկոսի Հիւսիսային Ամերիկայի երեք Թեմերու հովուապետական այցելութեան եւ վերջնականօրէն հաստատեցին ժամանակացոյցը:
Առաջնորդ Հայրերը անգամ մը եւս յոյս յայտնեցին, որ Վեհափառ Հայրապետի հովուապետական այցելութիւնը պիտի սատարէ երեք շրջաններու հայութեան հաւատքի նորոգութեան, ազգային ինքնութեան նորօրեայ արժեւորման եւ հոգեւոր ու մշակութային կեանքի յաւելեալ ծաղկումին:
Սրբազան Հայրերը զեկոյցներ լսեցին քրիստոնէական եւ հայեցի դաստիարակութեան մասին եւ քննարկեցին, թէ ինչպէս կարելի է կարծիքներ փոխանակել եւ օգտուիլ այդ աշխատանքներէն։ Անոնք երեք թեմերու Քրիստոնէական Դաստիարակութեան բաժանմունքներու վարիչներու միացեալ հանդիպում մը յանձնարարեցին, թափ տալու դաստիարակչական ու հրատարակչական միջ-թեմական ծրագիրներու:
Առաջնորդ Սրբազան Հայրերը վերահաստատեցին իրենց որոշումը պարբերաբար ունենալ նման հանդիպում-ժողովներ՝ միացեալ աշխատանքներ յառաջ տանելու եւ եկեղեցւոյ առաքելութիւնը վերարժեւորելու հայ կեանքին մէջ ի փառս Աստուծոյ։
ԴԻՒԱՆ
ՔԱՆԱՏԱՅԻ ԵՒ ԱՄԵՐԻԿԱՅԻ ԱՐԵՒԵԼԵԱՆ ՈՒ ԱՐԵՒՄՏԵԱՆ
ԱԶԳԱՅԻՆ ԱՌԱՋՆՈՐԴԱՐԱՆՆԵՐՈՒ
