ԱՊԱՐԴԻՒՆ ՀԱՆԴԻՊՈՒՄ ՄԸ ԵՒՍ…

0 0
Read Time:1 Minute, 33 Second

kerry serj aliev

ՀԱՅՐԵՆԻՔ

Սեպտեմբեր 8, 2014

Խմբագրական

Համեմատած, վերջերս Վիեննայի, Սէնթ Փիթըրզպըրկի եւ Սոչիի հանդիպումներուն, Սեպտեմբեր 4-ին, Կալէսի Նիւփորթ քաղաքի մէջ, Հայաստանի եւ Ատրպէյճանի նախագահներ Սերժ Սարգսեանի եւ Իլհամ Ալիեւի հանդիպումը, եղաւ սպասուածին եւ ենթադրուածին նման ապարդիւն:

Յատկապէս, ՆԱԹՕ-ի վեհաժողովի ծիրէն ներս հանդիպում մը ըլլալով, ոչ մէկ նորութիւն կամ շօշափելի յառաջխաղացք կը սպասուէր: Աւելին, Միացեալ Նահանգներու Արտաքին Գործոց նախարար Ճոն Քերիի հովանաւորութեամբ կամ կնքահայրութեամբ նմանօրինակ հանդիպում մը, այդպիսի պայմաններու տակ, կարելի է շուտով եզրակացնել թէ պարզապէս դէմ-դիմաց “փրոթոքոլային“ տեսակցութիւն մըն էր պատահածը:
Ուքրայինայի եւ յատկապէս Միջին Արեւելքի (Սուրիա, Իրաք եւ Պաղեստին) ներկայ պայթուցիկ կացութեան դիմաց, բնականաբար այս հանդիպումէն ոչ մէկ անակնկալ կամ անկիւնադարձային որոշում կը սպասուէր:
Արդէն իսկ, շաբաթներ առաջ, Արցախի սահմանամերձ շրջանէն ներս ատրպէյճանական ոտնձգութիւններն ու հերթական ձեւով զինադադարի խախտումը, բաւական մը գործի լծուած էին քաղաքական բեմը:
Եւ այս իրավիճակին լոյսին տակ, սպասելի էր Քերիի կրկնած “Լափալիսեան“ իրականութիւնները, թէ պէտք է այս հանգրուանին բացառել որեւէ իրավիճակի լարման բացառում, ընդգծելով տագնապի խաղաղ լուծման այլընտրանքի առաջնահերթութիւնը:
Նմանօրինակ արտայայտութիւն մը ունեցաւ նաեւ ԵԱՀԿ-ի Մինսքի խմբակի ամերիկացի համանախագահ Ճէյմս Ուորլիք, որ ձեռք երկարեց յաչս Արցախեան հիմնախնդիրի խաղաղ լուծման ուղիներու որոնման:
Հայաստանի նախագահին համար, նմանօրինակ կացութեան մը առջեւ գտնուիլը աւելի դիւրին էր, մանաւանդ որ, արդէն իսկ այլ ղեկավարներ կանխած էին իր կարծիքները, նշելով որ պիտի յաղթէ Արցախի տագնապի խաղաղ լուծման հոլովոյթը, որ բնականաբար կ՛երաշխաւորուի ԵԱՀԿ-ի Մինսքի խմբակին կողմէ:
Այս իրավիճակին դիմաց, բնականաբար անտեղի եւ անբացատրելի պիտի ըլլար որեւէ ծայրայեղ մօտեցում Ատրպէյճանի նախագահին կողմէ: Հետեւաբար, Ալիեւ թէեւ զայրացած, սակայն ստիպողաբար անտարբեր, քննարկեց Արցախի տագնապի լուծման հոլովոյթին ներկայ հանգրուանին եւ հեռանկարին վերաբերող հարցերը, ներկայացնելով իր երկրի դիրքորոշումները բանակցային հոլովոյթին մէջ:
Նմանօրինակ Սարգսեան – Ալիեւ, այլ հանդիպում մըն ալ պիտի դասաւորուի յառաջիկայ ամիսներուն, այս անգամ հովանաւորութեամբ Ֆրանսայի նախագահ Ֆրանսուա Հոլանտի:
Ներկայիս պարզուած աշխարհաքաղաքական գոյավիճակին ի տես, լոյսերու քաղաքին մէջ, ոչ մէկ փոփոխութիւն ակնկալելի է: Այս անգամ Քերիի փոխարէն Հոլանտն է որ կոչ պիտի ուղղէ Արցախեան հիմնահարցի խաղաղ լուծման:
Եւս….Այլ ապարդիւն հանդիպման մը սեմին:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles