ԱՆԲԱՆ ԲԱՆԱՎԷՃ

0 0
Read Time:1 Minute, 53 Second

khemp-trump-vs-clinton

ՀԱՅՐԵՆԻՔ

Խմբագրական
Սեպտեմբեր 27, 2016
Հոկտեմբեր 13, 1992-ին, Ա.Մ.Ն.-ի նախագահական ընտրութիւններու անկախ թեկնածու՝ Ռոս Փըրոյի նկատի առած փոխ-նախագահութեան թեկնածու՝ Ուիլիըմ Սթոքտէյլ, իր անդրանիկ բանավէճի բացման խօսքին մեծ զարմանք յառաջացուցած էր, ամենայն համեստութեամբ յայտնելով.- «Ո՞վ եմ ես, ինչո՞ւ հոս եմ…Քաղաքագէտ մը չեմ»:
Հոս տեղին է հարց տալ, թէ արդեօք պարագան միեւնոյնը չէ՞ր Սեպտեմբեր 26, 2016-ին կատարուած բանավէճին՝ դրամատէրի մը եւ «Քլինթըն Էսթապլիշմընթ»ի իգական ներկայացուցիչին միջեւ:
Այսպէս, իւրայատուկ եւ տարօրինակ էր շաբաթասկիզբին տեղի ունեցած, Ա.Մ.Ն. նախագահական ընտրութիւններուն դէմ առ դէմ անդրանիկ բանավէճը:
Բիւրաւոր անտարբեր տեղացիներու կողքին, նոյնքան հետեւողներ պարզապէս կը հետեւէին իրենց ամբողջական հակակրանքը յայտնելու Հանրապետական կամ Դեմոկրատական թեկնածուին:
Նշելի էր թէ այս նիւթական շահ ապահովող պատկերասփռուած բանավէճին թեկնածուներու, զրուցավարին ու նոյնիսկ հետեւող զանգուածին մակարդակը…միջակութիւն մըն էր:
Թեկնածուները իրենց կեանքի անցեալէն պատահած դէպքեր օգտագործելով, ցեխարձակումներ կատարեցին, գերագոյն նպատակ ունենալով՝ «Ամէն գնով համաձայնիլ՝ անհամաձայնութեան շուրջ»:
Յստակ է թէ երկու թեկնածուներու պարագային ալ, ո՛չ խոր գաղափարաբանութիւն գոյութիւն ունի, ո՛չ ալ` յստակ ու թափանցիկ ղեկավարութիւն: Յատկապէս, Միջազգային քաղաքականութեան բնագաւառէն ներս, մութ դաշինքներ ու պայմանագրութիւններ կատարելով, այլ պետութիւններու իրաւասութիւններ տրուած են ամերիկեան քաղաքականութիւնը վարելու, աշխարհի զանազան տարածաշրջաններէն ներս:
Յոյժ յիշատակելի է Թրամփի այդ աղերսը՝ Ռուսաստանի ղեկավար Փութինի, յաւելեալ գործի լծելու համար իր երկրի մասնագէտ ցանցահէնները, յաւելեալ գաղտնի մանրամասնութիւններ ձեռք ձգելու համար տիկին Քլինթընի ե-նամակի հասցէէն:
Իսկ եթէ Թրամփի առաջարկած պատի մը կառուցումը՝ հարաւի դրացի Մեքսիքայի լայնատարած սահմանին վրայ անըմբռնելի եւ գէթ անհադուրժելի նկատուի, նոյնքան աղիողորմ ու խղճալի է Քլինթընի միջազգային քաղաքականութեան բնագաւառէն ներս, խոստացուած անգտանելի եւ անկառուցելի կամուրջները:
Առ հասարակ, Ա.Մ.Ն. նախագահական ընտրութիւններու թեկնածուները միշտ ալ համախմբել ժողովուրդն ու ապահովել «քար քուէ»ներ, իրենց ղեկավարած ընտրապայքարի գործելաձեւով եւ անոր ընդմէջէն արտացոլացող քաղաքականութեան շուրջ:
Այս երեւոյթն ալ բացակայ կը թուի ըլլալ:
Թրամփ մեծ սխալ մը կատարեց այս բանավէճին, երբ արծարծեց նախագահ Օպամայի անցագրի հարցը, թէ անոր ծննդեան վկայագիրը կեղծ է եւ թէ, ան Ա.Մ.Ն.-ի ընտրական օրէնքներով, չէր կրնար իր թեկնածութիւնը ներկայացնել եւ ընտրուիլ: Բնականաբար Քլինթընի պատասխանը կարճ ու կտրուկ էր՝ Թրամփ կարմիր գիծը անցած էր եւ կատարած ցեղապաշտական ստախօսութիւն:
Պարզ բաղդատական մը կատարելով անցեալի կարգ մը բանավէճերու հետ, այս դէմ առ դէմը, նշոյլ մըն իսկ չէր ներկայացնէր վաթսունականներու Ճոն Քեննետի – Ռիչըրտ Նիքսըն,եւ նոյնիսկ ութսունականներու Ճիմի Քարթըր – Ռոնըլտ Ռէկըն բանավէճերէն:
…Նոյնիսկ հետաքրքրութիւն ստեղծող բանավէճերն ալ սկսած են անբան ու անբնական դառնալ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles