0
0
Յատուկ հաղորագրութեամբ մը, կը տեղեկանանք թէ, այս տարի, յաջորդաբար 61-րդ անգամ ըլլալով պիտի նշուի “Պոսթըն Փոփս“ի հայկական յատուկ երեկոն, հանրածանօթ “Սիմֆընի Հօլ“ սրահին մէջ:
Այս տարուան հայրենի արուեստագէտն է` Նարեկ Յարութիւնեան (աւագասրինգ – քլարինէթ), որ պիտի ներկայացնէ Վիթորիօ Մոնթիի հռչակաւոր “Չարտաս“ գործը, Կոմիտասի “Կռունկ“ն ու ճէզ հանրածանօթ աւագասրնգահար Արթի Շոյի “Համանուագ“ը:
19 գարուններ բոլորած Նարեկ Յարութիւնեան երկու տարի առաջ շահած էր միջազգային կարեւոր մրցանակներէն մէկը` the 2010 Young Concert Artists International Auditions, Նիւ Եորքի մէջ: Ան նաեւ ելոյթներ ունեցած է Ուաշինկթընի եւ Պաֆըլոյի մէջ:
Ծնած Գիւմրի եւ հազիւ երեք տարեկանին փոխադրուած Մոսկուա, ան աշակերտած է ծանօթ Եւկենի Փեթրովին: Այժմ, ան կը բնակի Նիւ Եորքի մէջ, եւ կ՛ուսանի Juilliard School –ի մէջ, ուսուցիչ ունենալով Չարլզ Նայտիշը:
Ան ելոյթ ունեցած է Ֆրանսայի Լուվր թանգարանի սրահին մէջ, նաեւ Ճենովայի Փալազօ Տէլ Փրինչիփէ սրահէն ներս: Նաեւ, ան ելոյթ ունեցած է Փրակայի “ Radio Symphony Orchestra“ի, Մոսկուայի “Virtuosi Chamber Orchestra“ի եւ Քալինկրատի նուագախումբերուն հետ: Իսկ իր աւագասրինգը ձօն մըն է կատարուած ջութակահար եւ մաէսթրօ Վլատիմիր Սփիքարովի կողմէ:
Նշենք թէ, “Պոսթըն Փոփս“ի ղեկավարն է մաէսթրօ Քիթ Լոքըրթ:
Յաւելեալ տեղեկութիւններու համար.- www.FACSBoston.org.
