0
0
Տոքթ. Արա Գաբրիէլեան
Յունուար 21էն 28ը տեղի ունեցաւ Ամերիկահայ Մշակութային Միութեան 15-րդ տարեկան նաւապտոյտը, մասնակցութեամբ 1,300 հայրենակիցներու, որոնք եկած էին Միացեալ Նահանգներէն, Գանատայէն, Հայաստանէն ինչպէս նաեւ Եւոպայի, Հարաւային Ամերիկայի եւ Միջին Արեւելքի երկիրներէն: Հակառակ համաշխարհային տնտեսական լուրջ ճգնաժամին, որ տակաւին իր ազդեցութիւնը զգալի կը դարձնէ ամէն տեղ, պատկառելի թիւով հայեր իրենց ետին ձգելով ձմեռուայ աննպաստ ցուրտն ու ձիւնը, հաւաքուած էին Florida-ի Ft. Lauderdale քաղաքը, ուրկէ ճամբայ ելաւ MSG Paesia նաւը: Նախորդ նաւապտոյտի մասնակցողները, որոնք մեծամասնութիւն կը կազմէին, ինչպէս նաեւ առաջին անգամ եկողները, անհամբեր կը սպասէին վայելելու բնութեան հրաշալիքները, նաւին կողմէ ու մանաւանդ մեր մատուցելիք բազմաթիւ ու բազմապիսի ծրագիրները` հայկական ջերմ ու հարազատ մթնոլորտի մէջ: Ու կարելի է անվարան յայտարարել, որ մէկ շաբաթ յետոյ ոչ ոք յուսախաբ եղաւ նաւապտոյտէն, ընդհակառակը մեր հայրենակիցները վերին աստիճանի գոհունակ նաւապտոյտ յանձնախումբի տարած բծախնդիր ծրագրումներէն ու հաճոյակատար պատրաստակամութենէն, հրաժեշտ տուին իրարու` միաժամանակ խօսք տալով, որ պիտի մասնակցին գալ տարուան այսինքն` 16րդ նաւապտոյտին: Ի դէպ, յանձնախումբս արդէն իսկ լծուած է աշխատանքի գալ տարուան նաւապտոյտը նոյնքան եթէ ոչ աւելի անմոռանալի դարձնելու համար:
Մեր հայրենակիցները, ինչպէ՞ս անցուցին այդ երանելի շաբաթը: Օրը կը սկսէր ամբողջ նաւով մէկ հայերէնով մեր ծրագիրներու յայտարարութեամբ հակառակ անոր որ առաջին իսկ վայրկեանին իւրաքանչիւր սենեակի մէջ դրուած էին գրքոյկներ, ուր նշուած էին շաբաթուան մեր ծրագիրները:
Առաւօտեան հոգեպարար ժամերգութիւն կը կատարուէր առաջնորդութեամբ Արք. Թապագեանի: Տեղի կ՛ունենային խօսակցական հայերէնի եւ հայկական աւանդական, տոհմիկ պարերու դասաւանդութիւններ: Օրուան մէջ տեղի կ՛ունենային դասախօսութիւններ, զեկոյցներ, կլոր սեղանի շուրջ հայկական այժմէական հարցերու մասին զրոյցներ (մասնակցութեամբ Տոքթ. Անդրանիկ Գասպարեանի, Քէն Խաչիկեանի, Աբօ Ճապարեանի, Պօղոս Գուբելեանի), միութենական հաւաքներ (Հ.Օ.Մ.ի, Վարդանանց Ասպետներու եւ Դստերք Վարդանանցի):
Երկու գիրքեր ներկայացուեցան, մէկը դատաւոր Ա. Արապեանի իսկ միւսը հոգեբան Պերճ Մինասեանի կողմէ:
Մեծ թատերասրահի մէջ երկու անգամ ելոյթ ունեցաւ Լոնտոնէն հրաւիրուած մեծատաղանդ կատարկերգակ ու դաշնակահար Քեւ Օրքեան եւ Մոնրէալի Համազգայինի “Անի“ պարախումբը: Յոտնկայս ծափահարութիւններով գնահատուեցան զոյգ ելոյթները: Մէկ երեկոյ Սթիւ Իսքենտէրեան հրամցուց ոգեշնչող ազգայինևյեղափոխական երգերու համերգ: Ցուցադրուեցան հայկական շարժապատկերներ, ի մասնաւորի Էրիք Խաչիկեանի Voyage to Amasea մրցանակի արժանացած փաստավաւերագրական ֆիլմը: Ամէն երեկոյ մինչեւ ուշ ժամեր, տեղի կ՛ունենար հայկական պարահանդէս Գէորգ Արթինեանի եւ Սթիվ Իսկենտէրեանի առաջնորդութեամբ, ինչպէս նաեւ յատուկ խրախճանք երիտասարդ ամուրիներու համար:
Հինգշաբթի լողաւազանի շուրջ կայացաւ հայկական փառատօն` երաժշտութեամբ, պարով եւ հայկական ուտելիքներու սպասարկութեամբ: Մրցանակի տրուեցան եռագոյնով կարուած ամէնէն գեղեցիկ, ինքնատիպ տարազին ու լաւագոյն տարազներուն: Շաբթուայ վերջաւորութեան գաւլու եւ պըլօթի մրցախաղերու յաղթողներուն տրուեցան մրցանակներ:
Նաւապտոյտի յոբելինական 15 ամեակը պատշաճօրէն նշելու համար տեղի ունեցաւ յատուկ երեկոյթ, ուր նաւապտոյտի կեդրոնական վարչութիւնը իը սրտի խօսքը ներկաներուն փոխանցեցինԱնդրանիկ Պուտաքեան, Վազգէն Այվազեան (փոխևատենապետ) եւ Պետրոս Պանտազեան (ատենապետ): Այս առիթով բաժնուեցան 15 տարիներու նաւապտոյտի պատմութիւնը ընդգրկող պատկերազարդ գրքոյկներ ինչպէս նաեւ գալ տարուան նաւապտոյտի մանրամասնութիւններ, որուն յաջորդեց քոքթէյլի շքեղ հիւրասիրութիւն: Խանդավառուած գալ տարուան նաւապտոյտի հեռանկարով եւ մեծագումար զեղջերէն աւելի քան 500 հոգի արդէն արձանագրուեցան 2013ի համար (ժամանակ առ ժամանակ հետեւեցէք մամուլի միջոցաւ տրուելիք ծանուցումներուն):
Վերոյիշեալ բոլոր ձեռնարկներէն զատ այցելեցինք St. Thomas, (US Vergune Islands), San Juan (Puerto Rico) եւ Nassau (Bahamas) կղզիները, ուր մեր հայրենակիցները վայելեցին ծովի ջինջ ու զուլալ ջուրի մէջ լողալու հաճոյքը, այցելեցին տեսարժան վայրեր կամ գնումներ կատարեցին տուրքէ զերծ մատչելի գիներով:
Անմոռանալի էր այն պահը երբ յայտարարուեցաւ, Ֆրանսայի Ծերակոյտի քուէարկութեան արդիւնքը, ըստ որուն Եղեռնի ժխտումը այսուհետեւ պիտ նկատուի քրէական պատժելի յանցանք: Այդ պատմական որոշումը ընդունուեցաւ իբրեւ մէկ քայլ եւս Հայ Դատի վերջնական լուծման ճանապարհին:
Ահա մօտաւորապէս ամփոփ պատկերը մեր անցնող նաւապտոյտին: Իբրեւ եզրափակում կ՛ուզենք կարեւորութեամբ ընդգրծել այն հիմնականն ու կենսականը, որն էր մէկ ու անբաժան ընտանիքի մը պատկանելելու զգացումը բոլորի մօտ ամբողջ նաւապտոյտի տեւողութեան: Այդ զգացումով անհամբեր կը սպասենք գալ տարուայ նաւապտոյտին, երբ մեր նաւը գագաթին ծածանող եռագոյնով դարձեալ պիտի ընդունի մեր հայրենակիցները:
Նիւ Եորք
