ԱՄԱՌՆԱՅԻՆ ԴԱՍԸՆԹԱՑՔ ԳՈՐԾԱԿՑՈՒԹԵԱՄԲ Մ.Ա.Կ.-Ի ՄՕՏ Հ.Հ. ԴԵՍՊԱՆԱՏԱՆ

Read Time:7 Minute, 19 Second

Եօթ երիտասարդներ կը մասնակցին այս տարուայ Միացեալ Ազգերու Կազմակերպութեան մօտ Հ.Հ. դեսպանատան հետ գործակցաբար, կատարուած ամառնային դասընթացքին: Հովանաւորութեամբ, Ա.Մ.Ն. Արեւելեան շրջանի Հ.Յ.Դ.-ին, այս երիտասարդները, պիտի հետեւին զանազան դասընթացքներու, դասախօսութիւններու եւ կլոր սեղաններու:

Դեսպան Կարէն Նազարեան ողջոյնի խօսք ուղղեց եւ յոյս յայտնեց թէ երիտասարդ սերունդը պիտի կարենայ ամէն տարի միեւնոյն կամքով եւ հետաքրքրութեամբ շարունակել այս աշխատանքը: Եօթ երիտասարդներն են.- Գոհար Յարութիւնեան, Քրիսթին Մանուկեան, Թալար Քաքիլեան, Վերժինէ Թուլումեան, Անուշ Գասպարեան, Ռուբէն Ճամպազեան եւ Գեղամ Մաղնեցեան:

Ստորեւ, այս դասընթացքին առթիւ, գրութիւն մը պատրաստուած Վերժինի Թուլումեանի կողմէ.-

ՅԱՐԳԱՆՔ ՁԵԶԻ ԿԵԱՆՔ ՏԵՍԱԾ ԸՆԿԵՐՆԵՐ

ՎԵՐԺԻՆԻ ԹՈՒԼՈՒՄԵԱՆ

Շնորհակալութիւն… Վեց վանկերէ բաղկացած այս բառը կը յայտնեմ քեզի ո՞վ կեանք տեսած ընկեր: Այն անձերուն որոնք իրենց սիրած ճիւղը զատորոշելով նուիրուեցան գործի ասպարէզը ունենալով Հայաստանը իբր իրենց հեռանկար: Աշխատասէր…Տաղանդաւոր…Մշակութասէր… կարգ մը բառեր որոնք հայուն նկարագրին մաս կը կազմեն եւ կազմած են մեր ժողովուրդի սկզբնական շրջաններէն մինչեւ օրս, ուր հայը իր զօրաւոր կամքով կը պահէ իր մշակոյթը եւ կը պայքարի օտարութեան ալիքներուն դէմ: Մեր վեց հազար տարուայ պատմութիւնը ունեցած է իր վերիվայրումները, որոնք թէկուզ ընկճեցուցած են մեր ազգը, սակայն հայ ազգը երբեք չէ դադրած ստեղծագործելէ եւ իր կնիքն ու ինքնութիւնը ողջ պահելէ:

Վերջին ամսուան ընթացքին, Նիւ Եորքի մէջ առիթը ունեցանք ծանօթանալու տարբեր անձերու, որոնք արժանացած են բարձր պաշտօններու Միացեալ Ազգերու Կազմակերպութեան տարբեր կառոյցներուն մէջ: Այդ անձերու շարքին էր Հայաստանի ներկայացուցիչները Մ.Ա.Կ.-ին մէջ որոնք ամէն ջանք թափելով, կրնան պահել դիւանագիտական յարաբերութիւններ տարբեր երկիրներու հետ: Թղթակից` Ֆլորէնս Աւագեան, լրագրութեան ճիւղը բռնելով խուճապի մատնած է տարբեր ղեկավարներ երբ հարցուցած է Հայաստանի կամ Արցախի մասին հարցումներ: Պրն. Մովսէս Աբելեանը` Մ.Ա.Կ.-ի Անվտանգութեան Խորհուրդի տնօրէն է, որ կը ղեկավարէ Մ.Ա.Կ.-ի կարեւորագոյն գործերն ու հարցերը: Պրն. Գարեգին Մանուկեանը` Մ.Ա.Կ.-ի Ընկերային եւ Տնտեսական խորհուրդի ղեկավար եւ Օր. Արփինէ Կորեկեանը, տարբեր կառոյցներու մէջ տարած է տարբեր աշխատանքներ եւ վարած տարբեր պաշտօններ: Ծանօթացանք Ընկերուհի Քիմ Հագիմեանին հետ, որ Հայաստանի Բ. Անկախութենէն ի վեր քարոզչութիւն կը տանի նոր մայրեր դաստիարակելու Հայաստանի մէջ: Վարժողական Ծրագիրը արդէն իսկ կը հասնի իր աւարտին, եւ առիթը ունինք որ ծանօթանանք ուրիշ անձերու ինչպէս Պրն. Վարդան Գրիգորեանին որ եղած է “Պրաուն Համալսարան“ի տնօրէն եւ այժմ նախագահն է “Carnegie Corporation“-ին:

Այս անձերը իրենց ամէնօրեայ կեանքի ընմէջէն գտած են ձեւ մը աշխատելու ու իրենց մասնագիտութեան հետեւելու այս օտար ափերուն մէջ: Հայ ազգը ոչ վախճանի ճամբուն վրայ է եւ ոչ ալ նահանջի մէջ: Հայ ազգը կ՛արձանագրէ նորանոր յաջողութիւններ: Մ.Ա.Կ.-ի այս պաշտօնեաները անուղղակիօրէն մեր Հայ Դատի զինուորներն են որոնք ամէնէն պարզ հանդիպումներու ընդմէջէն կրնան օտարներուն սորվեցնել պատմութեան դաս մը մեր հայութեան մասին:

Ամէն հայ երիտասարդի նման, ես ալ մտածած եմ իմ ապագայիս մասին: Ունէի ցանկութիւնը ըլլալու ուսուցչուհի, իրաւաբան, եւ օդաջու: Կեանքը աւելի դիւրին կ՛ըլլար եթէ յաւիտեանս մնայինք աշակերտ բայց կեանքի պայմաններ այդ չպիտի ներեն ըսելով որոշեցի սորվիլ “Business Management“ եւ “Politics and History“: Հայ ըլլալս չ՛ունէր որեւէ մէկ ազդեցութիւն իմ ապագայի ծրագիրներուս վրայ, բայց ապագային հայ ըլլալուս պատճառով պիտի ունենամ աւելի մեծ պարտաւորութիւն: Հայրենասէր ըլլալու եւ “Լաւ Հայ“ ըլլալու համար հազար ու մէկ բան կրնանք ընել, բայց բոլորը կու գայ նոյն արմատներէն: Ամէն Հայ պարտաւոր պէտք է զգայ որ նուազագոյնը իրենց շրջապատին մէջ քարոզջութիւն կատարէ եւ այդ ճամբով, պաշտպանէ Հայ ժողովուրդի արդար իրաւունքները:

Նոր սերունդը հայ ազգը չպիտի փրկէ, արդէն իսկ այս սերունդը փրկելու սկսած է: Ինքնաշխատութեամբ եւ մեր զօրաւոր կամքով արդէն իսկ հայերը կրցած են հասնիլ այդ բարձր պաշտօններուն եւ նոր ու կազմաւորուած սերունդ մը կ՛առաջանայ: Այս մտաւորականներու խաւը ներշնչում պատճառեց մեզի եւ հպարտութեամբ ականատես եղանք թէ ինչպէս իրենց տարբեր ճիւղերով կրցած են ոչ միայն ըլլալ լաւ քաղաքացի եւ տարբերութիւն ստեղծել այս գաղութին մէջ, այլեւ հայութեան օգնել եւ Հայ անունն ու ինքնութիւնը միշտ բարձր պահել:

Շնորհակալութիւն եւ յարգանք ձեզի կեանք տեսած ընկերներ որ կրցաք ձեր կեանքի օրինակով մեզի սորվեցնել թէ մեր ապագան ու հեռանկարը Հայաստանն է: Իսկ իբր երիտասարդներ պատրաստ ենք ստանձնելու տարբեր պարտականութիւններ որպէսզի դառնանք ջահակիրները մեր սերունդին ու հայ ազգին պարգեւենք Ազատ, Անկախ ու Միացեալ Հայաստանի իրականացած երազի տեսլականը:

Վերժինի Թուլումեան ծնած է Պէյրութ, Լիբանան եւ այժմ կ՛ապրի Լոս Անճելըս ուր կ՛ուսանի “Woodbury“ Համալսարան “Business Management“ եւ “Politics and History“ ճիւղերու մէջ: Տարիներու ընթացքին, Վերժինին եղած է գործօն անդամ Լոս Անճելըսի հայ գաղութին մէջ եւ այժմ Ատենապետուհին է Հայ Երիտասարդաց Դաշնակցութեան Կլէնտէյլի “Ռուբէն“ Ուխտին: Վերժինին ունի ցանկութիւնը զբաղելու Միջազգային հարցերով, յոյսով որ օր մը կրնայ ներկայացնել Հայաստանը իբր Դեսպան: