Ահարոնեան Սրահի Անուանակոչումը ի յիշատակ Վեր. Յովհաննէս Փ. Ահարոնեանի՝ Պէյրութի Հայ Աւետարանական Առաջին Եկեղեցւոյ Մէջ
Մերձաւոր Արեւելքի Հայ Աւետարանական Եկեղեցիներու Միութեան (ՄԱՀԱԵՄ-UAECNE) հովանաւորութեամբ, Մերձաւոր Արեւելքի 20-րդ դարու ամենաերեւելի եկեղեցական եւ էքիւմենիք դէմքերէն մէկը՝ հանգուցեալ Վեր. Յովհաննէս Փ. Ահարոնեան (1909–1986), մեծ յարգանքի արժանացաւ՝ իր անունով կոչուելով Պէյրութի Հայ Աւետարանական Առաջին Եկեղեցւոյ մէջ գտնուող վերանորոգուած սրահ մը։ Սրահի նուիրման արարողութիւնը տեղի ունեցաւ 27 Սեպտեմբեր, 2025-ին, որ նաեւ խորհրդանշեց «Ահարոնեան Սրահ»-ի պաշտօնական բացումը։
ՄԱՀԱԵՄ-ի հոգեւոր առաջնորդներ, հրաւիրեալներ եւ էքիւմենիք առաջնորդներ հաւաքուեցան նուիրման յատուկ պաշտամունքին։
Վեր. Դոկտ. Փօլ Հայտօսթեան՝ ՄԱՀԱԵՄ-ի Նախագահի Տեղապահը եւ Միջին Արեւելքի Եկեղեցիներու Խորհուրդի Նախագահը, ողջունեց ներկաները եւ հատեց մուտքին դրուած ժապաւէնը, որմէ ետք ներկաները երգեցին փառաբանութեան երգ՝ «Աստուած Իմ, Երբ Հոգիս Նայի»։ Ներս անցնելէ առաջ՝ հիւրերը կանգ առին յուշատախտակի մը առջեւ որ կը ցուցադրէր Վեր. Ահարոնեանի Հայ Աւետարանական եւ միջ-եկեղեցական գլխաւոր ծառայութիւններու եւ առաջնորդութեան կարեւոր հանգրուանները։ «Վեր. Ահարոնեանի անունը կը շարունակէ պատիւ բերել ոչ միայն Մերձաւոր Արեւելքի Հայ Աւետարանական Եկեղեցիներուն, այլեւ մեր շրջանի աւելի լայն քրիստոնէական համայնքին» նշեց Վեր. Հայտօսթեան իր բացման խօսքին մէջ։
Նուիրման աղօթքէն ետք ընթերցուեցան շնորհաւորական պատգամներ՝ այն բազմաթիւ կազմակերպութիւններէն, ուր Վեր. Ահարոնեան ծառայած էր։
Հիւրերու շարքին էին՝ Գերշ. Տ. Շահէ Արքեպիսկոպոս Փանոսեան՝ Լիբանանի Հայ Առաքելական Եկեղեցւոյ առաջնորդը՝ ներկայացնելով Ն.Ս.Օ.Տ.Տ. Արամ Ա. Վեհափառը, Դոկտ. Միշէլ Ապս՝ Միջին Արեւելքի Եկեղեցիներու Խորհուրդի (MECC) Ընդհանուր Քարտուղարը, Վեր. Ռիատ ժարժուր՝ ներկայացնելով Ռոզանճելա Ժարժուրը՝ Միջին Արեւելքի Աւետարանական Եկեղեցիներու Ընկերակցութեան (FMEEC) Ընդհանուր Քարտուղարը, Դոկտ. Մարթին Աքքատ՝ Մերձաւոր Արեւելքի Աստուածաբանական Ճեմարանի (NEST) նախագահը, եւ Վեր. Ժոզէֆ Քասսապ՝ Սուրիոյ եւ Լիբանանի Աւետարանական Համայնքի Գերագոյն Խորհուրդի Նախագահը։
Իր խօսքին մէջ, Դոկտ. Միշէլ Ապս ըսաւ. «Այսպիսի ճանաչումը ոչ միայն շնորհակալութեան արտայայտութիւն մըն է, այլ նաեւ միջոց՝ պատուաւոր օրինակ դարձնելու, ուրիշներուն ներշնչելու իր գործերով եւ ուսուցումնրով—յատկապէս այն հասարակութիւններուն մէջ, որոնք պէտքը ունին իրենց ղեկավար տարրերուն՝ կառուցողական եւ դրական ներդրում ունենալուն»։
Տոքթ. Վիգէն Ահարոնեան (Վեր. Ահարոնեանի որդին) եւ իր տիկինը՝ Սօսի, առցանց մասնակցեցան ԱՄՆ-էն՝ յայտնելով իրենց գոհունակութիւնը եւ փափաքը, խրախուսելով տեղական եկեղեցւոյ եւ լայն էքիւմենիք շարժման առաքելութեան շարունակական նուիրումը՝ ի սպաս համայնքին եւ շրջանին։
Արարողութիւնը իր աւարտին հասաւ «Հայր Մեր»-ի երգեցողութեամբ եւ Վեր. Հայտօսթեանի Օրհնութեան աղօթքով։
Վեր. Յովհաննէս Ահարոնեան ծնած էր Զէյթուն՝ 1909-ին։ Ան իր ամբողջ կեանքը նուիրեց հովուական ծառայութեան եւ աստուածաբանական առաջնորդութեան։ Վեր. Ահարոնեան ծառայած է որպէս ՄԱՀԱԵՄ-ի նախագահ (1951–1979) եւ NEST-ի նախագահ (1959–1978)՝ ստանալով «Նախագահ Պատուաւոր» կոչումը Յուլիս 1978-ին։ Ան նաեւ FMEEC-ի հիմնադիրն ու առաջին նախագահն էր (1974), ինչպէս նաեւ MECC-ի համահիմնադիր Նախագահը (1974–1985), ապա ստանալով «Նախագահ Պատուաւոր» կոչումը՝ 1985-ին։
Վեր․ Ահարոնեան լայնօրէն ճանչցուած էր որպէս տեսլական ունեցող առաջնորդ եւ մտաւորական, որ տարիներ շարունակ ուղղեց եւ կրթեց բազմաթիւ Հայ (Աւետարանական թէ Առաքելական) եւ ոչ Հայ հովիւներ ու հոգեւորականներ։ Ան ամուսնացած էր Լիտիա Հայտօսթեանի հետ, եւ ունին երկու զաւակ՝ Տօքթ. Հ. Սթիվըն Ահարոնեան եւ Տօքթ. Վիգէն Ահարոնեան։ Վեր. Ահարոնեան վախճանեցաւ Պէյրութի մէջ՝ 1986-ին։
