ԱԼԱՍՔԱՑԻ ՀԱՅԸ ՀԱՅԱՍՏԱՆ ԺՈՂՈՎԻ Կ’ԵՐԹԱՅ

0 0
Read Time:2 Minute, 6 Second

 

            Համաճարակէ եւ մահէ չվախցող Հայաստան ժողովի գացողներ կան: Ժողովը բեմ՝ Ծառուկեանի թղթէ կապարճին: Անով կը վերականգնի՞նք:

            Կեդրոնականցին հանդիպեր է Ալասքայէն Հայաստան գացող Մայքըլ Սթիվընի, Միքայէլ Ստեփանեանի: Միասին ճաշած են:

            Հանդիպեցանք հայկական սրճարանը:

            – Մակա՛րս, Հայաստան չեմ կրնար երթալ,  մեծ ծրագիրներ, աթոռ եւ քսակ չունիմ: Ուզեցի միտքերս Մայքըլի ճամբով հասցնել մեծերու: Վանեցիի թոռ Մայքըլը Ալասքայի մայրաքաղաք Անքորէյճի մէջ արեւելեան ուտեստներու վաճառատան մը տէր է:

            – Աշխարհի ծայրը որո՞ւ համար արեւելեան ուտեստ,- ըսի:

            – Ես ալ զարմացայ: Ըսաւ որ Անքորէյճ  արեւելքցիներ կան: Բժիշկը լիբանանցի է, ատամնաբոյժը հայ կին մըն է, ատաղձագործը՝ սուրիացի, ինքնաշարժ նորոգողը լիբանանցի, թուրքը եւ քիւրտը խորոված կը ծախեն: Ըսաւ որ ինք ալ  Ատիս Ապեպայէն հոն գացեր է:

            – Ի՞նչ ընելու կ’երթայ Հայաստան:

            – Հայաստան-Ալասքա առեւտրական կապեր հաստատելու: Ըսած է, որ բոլոր ծախսերը ինք կը ստանձնէ: Պիտի նշանակուի Ալասքայի մէջ պատուակալ հիւպատոս: Այսինքն՝ անվճար: Մտածեցի, որ այս մէկը Հայաստան չ’երթար որպէս փրկարար ջուր ծեծելու, հեռատեսիլէն խօսելու, վերադարձին՝ փքուելու:

            – Մայքըլ ո՛չ ատենապետ է ո՛չ նախագահ, Ալասքայի հայերը միութիւն-կուսակցութիւն ունի՞ն:

            – Չունին: Հայաստանէն բերել տուած է գինի, ծիրանի չիր, խաղողի շարոց, գեղանկար, ձեռային աշխատանք, որոնք շուտով ծախուած  են:

            – Ուրեմն Հայաստանի նոր յոյսը Ալասքան է: Եթէ իմացուի, որ հոն հիւպատոս կայ, հայերը կը բազմանան:

            – Մայքըլ ըսաւ, որ Ալասքան Ամերիկայի ամենէն մեծ նահանգն է, մէկուկէս միլիոն քառ. քիլոմեթր: Մեծ ապագայ ունի: Ըսաւ, որ գինիէն աւելի խաղողի շարոցները վաճառուած են: Ցուրտին դէմ շարոց տարած են աշխատանքի, մանաւանդ ալքոլի դէմ եղողները:

            – Ուրեմն հայաստանեան շարոցը հաւատացեալներու օգնած է:

            – Չէի մտածած:

            – Մտածա՞ծ է արտագաղթող հայերը Անքորէյճ տանիլ:

            – Ըսաւ, որ եթէ մեծ թիւով հայեր գան Անքորէյճ, ընտրութիւններուն կը մասնակցին, օր մը Ալասքան ալ կը ճանչնայ ցեղասպանութիւնը:

            – Արմենա՛կ, ըսիր որ Մայքըլ վանեցի է, կը մտածէ՞ Աղթամարի եկեղեցիի պաշտպանութեան մասին: Կամ՝ Վանի հանրապետութիւն ստեղծելու՝ Ալասքա:

            – Այդ մասին չխօսեցանք: Վերադարձին պիտի տեսնուինք: Կու գաս եւ իրեն հետ Վանի կամ Նոր Վանի մասին կը խօսիս:

            – Արմենա՛կ, ան վերադարձին ֆորմաթէ եղած կ’ըլլայ, եւ Երեւանէն անդին չի նայիր:

            Երբ կը բաժնուէինք, Արմենակ ըսաւ որ օր մը հիւր կ’երթանք Մայքըլին եւ շարոց կը ճաշակենք:

            – Մակարուհիին եւ Էլպիսին չըսես: Վաղն իսկ ճամպրուկ կը պատրաստեն:

            Վանեցիի թոռը Ճիշդ մտածած է: Շարոցը յիշատակ կը պահէ, ինչպէս խորովածը, գինին, հայաբարբառ ճազը:

            Նոր հիւպատոս Սթիվընի վերադարձին պիտի լսենք Հայաստանի ալասքայական յաջողութիւնները:

            Երբ կը բաժնուէինք, Արմենակ ըսաւ.

            – Մինչեւ Ալասքա երթանք, հոն հայաստանեան նոր գաղութ կ’ունենանք, Արտաշէս Աշխարհակալի գործը շարունակելով: Եթէ սառցային տարածութիւններէն 50.000 քառ.ք.մ. սառած հող տան հայերուն, հոն կը ստեղծենք նոր Հանրապետութիւն, կուսակցութիւնները հոն կ’երթան, Հայաստանն ալ հանգիստ կ’ընէ:

            Ինչպէ՞ս իր տեսած-լսածի ցաւով Արմենակ սրտաճագ չ’ըլլար:

 

Մակար ի Գաղիա, 30 Յունուար 2022

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱԿՆԱՐԿ.- «ՈԳՈՒ ՍՈՎ»-Ը ՊԻՏԻ ԿԱՍԵՑՈՒԻ…
Next post Գալուստ Կիւլպէնկեան Հիմնարկութիւն․- ՄԽԻԹԱՐԵԱՆ ՄԻԱԲԱՆՈՒԹԵԱՆ ԳՐԱԴԱՐԱՆԻ ՀԱՆԴԷՍՆԵՐԸ ԱՅԺՄ ՀԱՍԱՆԵԼԻ ԵՆ ԱՌՑԱՆՑ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles