ԱԶԳԱՅԻՆ ՈՒՍՈՒՄՆԱԿԱՆ ԽՈՐՀՈՒՐԴԻՆ ՅԱՋՈՂ ՍԵՄԻՆԱՐԸ ՆԻՒ ԵՈՐՔԻ ՄԷՋ

0 0
Read Time:3 Minute, 0 Second
Սօսի Էսաճանեան՝ ելոյթի ժամանակ
Սօսի Էսաճանեան՝ ելոյթի ժամանակ

Շաբաթ, Օգոստոս 23-ին, Ազգային Ուսումնական Խորհուրդը կազմակերպած էր ուսուցչական միօրեայ սեմինար մը Նիւ Եորքի Ազգ. Առաջնորդարանին մէջ, որուն ներկայ եղան ութը շաբաթօրեայ դպրոցներէ (Նիւ Եորք, Նիւ Ճըրզի, Ֆիլատելֆիա, Պոսթըն եւ Շիքակօ) եկած 23 ուսուցիչներ, ինչպէս եւ շահագրգռուած առանձին անհատներ։ Յայտագիրը, զոր վարեց Ուս. Խորհուրդի գործավար Դոկտ. Վարդան Մատթէոսեան, շատ լաւ ընդունելութեան արժանացաւ լսարանին կողմէ։

Ուս. Խորհուրդի անդամ եւ Նիւ Եորքի Ս. Լուսաւորիչ Մայր Տաճարի հոգեւոր հովիւ Արժ. Տ. Մեսրոպ քհնյ. Լագիսեան ողջունեց ներկաները՝ յանուն թեմիս բարեջան առաջնորդ Օշական արք. Չօլոյեանի։ Տէր Հայրը նշեց ուսուցիչներու եւ տնօրէններու ներկայութիւնը հետեւեալ շաբաթօրեայ դպրոցներէն՝ «Ս. Լուսաւորիչ» (Նիւ Եորք), «Նարեկ» (Նիւ Ճըրզի), «Հայկազեան» (Ֆիլատելֆիա), «Ս. Ստեփանոս» (Պոսթըն) եւ «Դանիէլ Վարուժան» (Շիքակօ),  որոնք Ուս. Խորհուրդի իրաւասութեան տակ կը գտնուին։ Անոնց կողքին, ան յատկապէս անդրադարձաւ Ա.Մ.Ն.-ի արեւելեան թեմին կապուած երեք  շաբաթօրեայ դպրոցներէ (Ս. Վարդան, Պրուքլին եւ Սրբոց Ղեւոնդեանց) ուսուցիչներու, ինչպէս եւ արեւելեան թեմի հայագիտական բաժնի վարիչ տիկ. Կիլտա Պչաքճեանի ներկայութեան։

Առաւօտեան դասախօսն էր Ուս. Խորհուրդի անդամներէն Օր. Սօսի Էսաճանեանը, որ Նիւ Եորքի ՄԱԿի միջազգային դպրոցի օգնական ուսուցչուհի է։

Դոկտ. Վարդան Մատթէոսեան կը ներկայացնէ տիկ. Անահիտ Կարմիրեանը
Դոկտ. Վարդան Մատթէոսեան կը ներկայացնէ տիկ. Անահիտ Կարմիրեանը

Ան խօսեցաւ մանկապարտէզի եւ նախակրթարանի առաջին դասարաններու դասաւանդութեան լաւագոյն կերպերուն մասին, ինչպէս եւ անոնց կիրարկումին՝ մեր դպրոցներուն մէջ։ Մանուկի զարգացման տարբեր տեսութիւններուն ակնարկէ մը ետք, ան կեդրոնացաւ գրագիտութեան զարգացման վրայ, որ մեր դպրոցներուն գլխաւոր մտահոգութիւնն է։ Այնուհետեւ, ան կարգ մը շահեկան գաղափարներ ներկայացուց՝ ընթերցանութեան զարգացման մասին, ուր սահունութիւնը վճռական գործօն մը պէտք է ըլլայ։ Օր. Էսաճանեան յետոյ քննարկեց գործնական գաղափարներ ու թելադրանքներ՝ մտիկ ընելու եւ խօսելու ուսուցումի, դասարանի նախագծումի, դասարանային ժամանակացոյցի ծրագրումի եւ հայերէն որպես երկրորդ լեզու ուսուցումի մասին։ Այս գաղափարները յարմարցուած էին հայերէն շաբաթօրեայ դպրոցներու կարիքներուն եւ սահմանափակումներուն։
Օր. Էսաճանեան անգլերէն խօսեցաւ, իսկ իր խօսքերը համալրուած էին հայերէն Power Point-ով մը, որ արդէն տրամադրելի է Ազգ. Առաջնորդարանի կայքէջի Ազգ. Ուսումնական Խորհուրդի բաժնէն (www.armenianprelacy.org/anec/teachers-resources)։

Սեմինարի մասնակիցներուն մէկ մասը
Սեմինարի մասնակիցներուն մէկ մասը

Ճաշէն ետք, երկրորդ դասախօսն էր տիկ. Անահիտ Կարմիրեանը՝ Նիւ Ճըրզիի «Յովնանեան» վարժարանի երկարամեայ տնօրէնուհին, որ վերջերս նշանակուած է «Գալուստ Կիւլպէնկեան» հիմնարկութեան (Լիզպոն) արեւմտահայերէնի ծրագրի պատասխանատուն։ Տիկ. Կարմիրեանի դասախօսութիւնը մտածելու տեղի տուող խորագիր մը ունէր ՝ «Ուսուցի՞չ, թէ չուսուցիչ. երկլեզուութեան գրաւականները»։ Ան սկսաւ ասպարէզ կարդալով աւանդական այն գաղափարին, որ ուսուցիչը կը պատկերացնէ որպէս մէկը որ ամէն ինչ գիտէ կամ բան մը աւելի լաւ գիտէ, եւ հաստատեց, որ ուդուցիչները սորվողներ ենք, որոնց առաքելութիւնը ուսուցանել չէ, այլ աշակերտները մղել գիտելիք իւրացնելու, այս պարագային՝ լեզուն իբրեւ իւրացնելու միջոց գործածելով։ «Չուսուցիչ» ըլլալը, ըսաւ ան, կը նշանակէ լեզու սորվողի մը դիրքը ստանձնել եւ լեզուի իւրացումը առողջ փորձառութեան մը վերածել։ Հայերէնի որպէս երկրորդ լեզու ուսուցումը, ինչպէս որ է մեր պարագան, կ նշանակէ գիտնալ ի՞նչ ընել՝ սորվողին բոլոր միջոցները հայթայթելու լեզուի իւրացումին համար։ Դասագիրքերը կ՚օգնեն դասը կարգի դնելու, բայց մեր դիմաց կը գտնենք սորվողներ, որոնք այդպէս չեն տեսներ հարցը՝ իւրացումի հոլովոյթին մէջ։ Մեր գործն է պայմաններու ստեղծումը, որպէսզի լեզուն լսելի դառնայ եւ հաղորդակցութեան միջոց դառնայ։ Ասիկա լեզուն սորվելու կը մղէ, զայն սորվելու պահանջը կը ստեղծէ եւ աշակերտին հետաքրքրութիւնը կ՚արթնցնէ։
Տիկ. Կարմիրեան յատկապէս շեշտեց կարեւորութիւնը հասկնալու, որ լեզուի իւրացումը մասնակցութեան հոլովոյթ մըն է, ուր ոչ ոք լեզուի տէրն է, եւ պէտք է աշխատինք այն համոզումով որ բոլորը կրնան սորվիլ։ Պէտք է ապահովել յարմար միջավայրը՝ լեզուն իւրացնելու ստեղծագործական միջոցներ կիրարկելու համար, ինչպէս լեզուական խաղեր, թատրոն, նկարչութիւն եւ շատ ուրիշներ, փոխանակ կեդրոնանալու հանդէսներու պատրաստութեան վրայ, յայտնեց ան։

Օրակարգին վերջին կէտը դպրոցներու յաջող եւ անյաջող փորձառութիւններու քննարկումն էր, զոր կը համադրէր Ուս. Խորհուրդի անդամներէն դոկտ. Ասպետ Վասիլեան։ Իւրաքանչիւր դպրոց կարճ զեկոյցներ ներկայացուց, որոնք հետաքրքրական մտքերու փոխանակումներու առիթ տուին։

Մասնակիցները մեկնեցան գոհ տրամադրութեամբ՝ շահեկան նիւթերու արծարծումէն, դպրոցական տարին նոր լիցքով սկսելու համար։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles