ԱԶԳԱՅԻՆ ԿԵԴՐՈՆԱԿԱՆ ՎԱՐՉՈՒԹԵԱՆ ԿՐՕՆԱԿԱՆ ՈՒ ՔԱՂԱՔԱԿԱՆ ԺՈՂՈՎՆԵՐՈՒ ՄԻԱՑԵԱԼ ՀԱՆԴԻՊՈՒՄ ԱՆԹԻԼԻԱՍԻ ՄԱՅՐԱՎԱՆՔԻՆ ՄԷՋ

Անցնող երկու օրերու ընթացքին Ազգային Կեդրոնական Վարչութեան Կրօնական ու Քաղաքական ժողովներու լիակատար նիստերէն ետք, Ուրբաթ, Դեկտեմբեր 3-ին, նախագահութեամբ Ն.Ս.Օ.Տ.Տ. Արամ Ա. Վեհափառ Հայրապետին, յիշեալ ժողովները միացեալ հանդիպում ունեցան Անթիլիասի Մայրավանքին մէջ: Նիստին իրենց մասնակցութիւնը բերին կարգ մը թեմերու առաջնորդները: Կաթողիկոսութեան կանոնագրութեան համաձայն նման միացեալ հանդիպման օրակարգին մաս կը կազմեն Կաթողիկոսութեան, հայ եկեղեցւոյ, Հայաստանին, Արցախին եւ ընդհանրապէս մեր ժողովուրդին առնչուած ընդհանրական հարցեր: Նորին Սրբութիւնը իր բացման խօսքին մէջ ընդհանուր գիծերով պարզեց մեր ժողովուրդին, եկեղեցւոյ եւ հայրենիքին դիմագրաւած ներկայ մարտահրաւէրները: Լիբանանի Հայոց Թեմի առաջնորդ Շահէ Արք. եւ Բերիոյ Հայոց Թեմի առաջնորդ Մասիս Եպս. յաջորդաբար զեկոյցներ ներկայացուցին իրենց թեմերուն մասին: Զեկոյցները ներառեցին կրօնական, վարչական, տնտեսական ու յարաբերական աշխատանքներ ու հարցեր: Ապա, առաջնորդ սրբազան հայրերը ժողովականներուն հարցումներուն պատասխանեցին: Վեհափառ Հայրապետը իր եզրափակիչ խօսքին մէջ շեշտեց, թէ Սփիւռքի յիշեալ մայր գաղութներուն զօրակցութիւնը հրամայական է: Ան իր գնահատանքը յայտնեց անցնող տարիներուն Լիբանանի ու Սուրիոյ հայութեան վերականգնումին օժանդակող կառոյցներուն, բարերարներուն ու ազգայիններուն եւ վստահեցուց, որ յիշեալ գաղութներու վերականգնումը պիտի շարունակէ առաջնահերթութիւն մնալ Մեծի Տանն Կիլիկիոյ Կաթողիկոսութեան համար: Նկատի ունենալով, որ կարգ մը թեմեր թեմական կանոնագրային որոշ յօդուածներու փոփոխութիւններ առաջարկած էին, Վեհափառ Հայրապետը թելադրեց, որ բոլոր թեմերը իրենց փորձառութեան լոյսին տակ ճշդեն կանոնագրութեանց մէջ վերատեսութեան կարօտ բաժինները, որպէսզի Ազգային Կեդրոնական Վարչութիւնը եւ յառաջիկային գումարուելիք Ազգային Ընդհանուր Ժողովը անհրաժեշտ քննարկումն ու վաւերացումը կատարեն: Դոկտ. Նորա Պայրագտարեան, իբրեւ անդամ Սիսի Կաթողիկոսարանի վերադարձի դատական յանձնախումբին, զեկուցեց դատի ներկայ հանգրուանին մասին: Նորին Սրբութիւնը յայտնեց, որ յառաջիկայ հանգրուանին այս գծով կարեւոր է մեր ժողովուրդին անհրաժեշտ տեղեկութիւնները փոխանցել, որովհետեւ յիշեալ դատը մեր եկեղեցւոյ ու ժողովուրդին դատն է: Կաթողիկոսարանի դիւանապետ Խաչիկ Տէտէեան զեկոյց ներկայացուց Կաթողիկոսութեան կողմէ Արցախի մէջ կառուցուած «Նոր Կիլիկիա» գիւղին մասին: Ան յայտնեց, որ գիւղը Արցախի եւ Ատրպէյճանի բաժանման գիծին վրայ կը գտնուի՝ մաս կազմելով Արցախի ներկայ տարածքին: Հարցումներուն պատասխանելով՝ ան տեղեակ պահեց ժողովը, որ գիւղը կը կարօտի որոշ օժանդակութեան: Վեհափառ Հայրապետը յիշեցուց, որ անհրաժեշտ է որ այս գծով մեր ստանձնած յանձնառութիւնը շարունակուի՝ խորհրդակցաբար Արցախի իշխանութեան հետ: Հայրապետը անդրադարձաւ Նուիրապետական Աթոռներու գործակցութեան՝ ընդգծելով անոր հրամայական անհրաժեշտութիւնը, իբրեւ մղիչ ոյժը մեր եկեղեցւոյ առաքելութեան առաւել կենսաւորման: Ան յիշեցուց, թէ Նուիրապետական Աթոռները տարբեր պայմաններու մէջ կ՚ապրին, տարբեր դրուածքներ ունին ու տարբեր մարտահրաւէրներ կը դիմագրաւեն, սակայն այս բոլորէն վեր՝ մեր եկեղեցւոյ ու ազգին հաւաքական արժէքներուն ու իտէալներուն ամուր կապուածութիւնը հիմքն է մեր եկեղեցւոյ ներքին միասնականութեան եւ անոր հոգեւոր ու ազգային առաքելութեան: Վեհափառ Հայրապետը անդրադարձաւ Արցախի վերջին պատերազմէն ետք ստեղծուած կացութեան եւ այդ ծիրէն ներս Հայաստան-Սփիւռք գործակցութեան: Ժողովը շեշտեց, թէ հաւատարմութիւնն ու զօրակցութիւնը Հայաստանի պետութեան, անոր անկախութեան, հողային ամբողջականութեան, գերիշխանութեան ու անվտանգութեան պէտք է մնայ ամուր ու ներհայաստանեան խնդիրներէն վեր: Մեր ազգի կեանքին ներկայ ճակատագրական հանգրուանը պէտք է բոլորս մղէ մէկդի դնելու բաժանարար մօտեցումները եւ մեր հայրենիքին հզօրացման նպաստող աշխատանքները պէտք է դառնան միացուցիչ շաղախը մեր ժողովուրդի զաւակներուն: Արամ Ա. Կաթողիկոս նաեւ ընդհանուր գիծերով ներկայացուց Կաթողիկոսարանի յառաջիկայ աշխատանքներուն գլխաւոր երեսները: Այս շրջագիծէն ներս ան յիշեց.- առաջին՝ մինչեւ 1972 թուականը երկարող Կիլիկիոյ Կաթողիկոսութեան Պատմութեան պատրաստութիւնը պիտի շարունակուի. երկրորդ՝ պատրաստութեան ընթացքի մէջ է Կաթողիկոսարանի հնատիպներու ու ձեռագիրներու ամբողջացումը ու ապա հրատարակութիւնը. եւ երրորդ՝ կը ծրագրուի «Կիլիկիա» եւ Հայոց Ցեղասպանութեան Որբերու «Արամ Պէզիքեան» թանգարաններուն յատուկ առանձին լայնածաւալ գրացուցակներ պատրաստել: Այս ծրագիրները կը կարօտին լուրջ աշխատանքի, որուն անմիջապէս պիտի ձեռնարկենք, ինչպէս նաեւ՝ մեկենասներու, ըսաւ Վեհափառ Հայրապետը: Հայր Յովակիմը ներկայացուց Վեհափառ Հայրապետին գահակալութեան 25-ամեակին առնչուած աշխատանքներուն ընդհանուր պատկերը: Ան ըսաւ, որ 2020 թուականը Վեհափառ Հայրապետին գահակալութեան 25 ամեակն էր, սակայն թէ՛ Վեհափառ Հայրապետին փափաքին ընդառաջելով եւ թէ՛ ներկայ պայմանները նկատի ունենալով հրապարակային ձեռնարկները ջնջուեցան: Սակայն, այս կարեւոր առիթով շուտով երկու հատորներ լոյս պիտի տեսնեն՝ Նորին Սրբութեան գահակալութիւնը արժեւորող յօդուածներ ներառող շուրջ 600 էջերէ բաղկացած հատոր մը եւ երկլեզուեան նկարազարդ գրքոյկ մը: Թեմակալ առաջնորդները առաջարկեցին, որ Վեհափառ Հայրապետը այցելէ թեմերը՝ իր գահակալութիւնը նշելու եւ ժողովուրդին իր պատգամը ուղղելու համար: Նորին Սրբութիւնը ներկայ պայմաններուն մէջ յարմար չտեսաւ թէ՛ իր հովուապետական այցելութիւնը եւ թէ՛ իր գահակալութեան 25-ամեակի նշումը՝ յայտնելով, որ էականը մեր ժողովուրդին ու հայրենիքին ծառայելն է: Վեհափառ Հայրապետը տեղեակ պահեց ժողովը, որ 2022 թուականը որոշած է հռչակել «Սփիւռքի Տարի» եւ այս մասին իր Հայրապետական պատգամը Յունուար 2022-ին սկիզբը պիտի հրապարակուի: Ժողովականները իրենց գոհունակութիւնը յայտնեցին Վեհափառ Հայրապետին այս իմաստուն որոշման համար՝ շեշտելով Սփիւռքի վերակազմակերպման անյետաձգելի անհրաժեշտութիւնը: Նորին Սրբութիւնը ըսաւ, թէ յառաջիկային այս ուղղութեամբ աւելի լայն բացատրութիւններ պիտի տրուին մեր ժողովուրդի զաւակներուն: Ապա, Հայրապետին առաջարկին ընդառաջելով ժողովը ճշդեց Միւռոնօրհնէքի եւ Ազգային Ընդհանուր Ժողովի թուականները: Իր փակման խօսքին մէջ Վեհափառ Հայրապետը շեշտեց, թէ հակառակ ստեղծուած դժուար պայմաններուն, Աստուծոյ օրհնութեամբ ու ժողովուրդին զօրակցութեամբ, Մեծի Տանն Կիլիկիոյ Կաթողիկոսութիւնը վերանորոգ հաւատքով ու նուիրումով պիտի շարունակէ իր ծառայական առաքելութիւնը:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

ԱԶԳԱՅԻՆ ԿԵԴՐՈՆԱԿԱՆ ՎԱՐՉՈՒԹԵԱՆ ԿՐՕՆԱԿԱՆ ՈՒ ՔԱՂԱՔԱԿԱՆ ԺՈՂՈՎՆԵՐՈՒ ՄԻԱՑԵԱԼ ՀԱՆԴԻՊՈՒՄ ԱՆԹԻԼԻԱՍԻ ՄԱՅՐԱՎԱՆՔԻՆ ՄԷՋ

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Շաքիի Հատուած Կարմիր Գիծը

Աւելի Քան 100 Քոնկրէսականներ Կը Պահանջեն Դադրեցնել Ատրպէյճանին Ռազմական Օժանդակութիւնը

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է