0
0
ՈՒԱՇԻՆԿԹԸՆ.- Յունիս 7-ին, Ամերիկահայ Մշակութային Ընկերակցութեան «Արցախ Ֆոնտ»ի եւ «Հայրենիք»ի հրաւէրով, Ա.Մ.Ն. Արեւելեան Շրջան այցելող՝ Լեռնիկ Յովհաննիսեան (Արցախի Հանրապետութեան խորհրդարանի անդամ), այցելեց Քեփիթըլ Հիլ, եւ տեսակցեցաւ քանի մը քոնկրէսականներու եւ ծերակուտականներու հետ, ընկերակցութեամբ Հայ Դատի Կեդրոնական գրասենեակի ներկայացուցիչ՝ Րաֆֆի Քարաքաշեանի եւ Արեւելեան Շրջանի Հայ Դատի գրասենեակի ներկայացուցիչ՝ Արմէն Սահակեանի:
Ան յաջորդաբար տեսակցեցաւ Տէյվիտ Սիսիլինի (Դեմոկրատական – Րոտ Այլընտ), Աննա Իշուի ((Դեմոկրատական – Գալիֆորնիա), եւ Ռապըրթ Տոլտի (Հանրապետական – Իլինոյ) հետ, եւ արծարծեց Արցախի հիմնահարցին գծով վերջին ամիսներու իրադարձութիւնները, շեշտելով թէ ամէն ճիգ պէտք է որ թափուի Ատրպէյճանի բանակին զինուորական օժանդակութիւնը դադրեցնելու:
Նաեւ, Յովհաննիսեան շեշտեց թէ հայ-ատրպէյճանական սահմանի շփման գիծին վրայ զինադադարի պահպանման մասին, քոնկրէսականներ՝ Էտ Ռոյսի եւ Էլիըթ Էնկըլի հետեւողական հսկումի առաջարկները պէտք է որ կիրարկուին: Նշենք թէ, անցեալ տարեվերջին Էտ Ռոյս կոչ ըրած էր, որ Հայաստանի եւ Արցախի վրայ Ատրպէյճանի սաստկացող յարձակումներուն գծով լսումներ կազմակերպուին ԵԱՀԿ-ի Մինսկի խմբակի ամերիկացի համանախագահ Ճէյմզ Ուորլիքի հետ։ Ռոյսի եւ Էնկըլի կողմէ Ուորլիքին եւ Միացեալ Նահանգներու արտաքին գործոց նախարարութեան հասցէագրուած առաջարկներուն զօրակցած են աւելի քան 90 քոնկրէսականներ։
Առաջարկներն են՝ արձակազէններու հեռացումը շփման գիծէն, յարձակումներու պատասխանատուն բացայայտելու նպաստող սարքերու տեղադրում եւ ԵԱՀԿի յաւելեալ դէտերու հաստատում։ Հայաստան եւ Արցախ արդէն իսկ համաձայնութիւն յայտնած են այս պայմաններուն, սակայն Ատրպէյճան տակաւին կ՛ընդդիմանայ անոնց։
Յովհաննիսեան նաեւ տեսակցութիւններ ունեցաւ ծերակուտական Մարք Քըրքի (Հանրապետական – Իլինոյ), Ֆրանք Փըլոնի (Դեմոկրատական – Նիւ Ճըրզի), Ճէքի Սփայըրի (Դեմոկրատական – Գալիֆորնիա), Քրիս Սմիթի (Հանրապետական – Նիւ Ճըրզի), Ատամ Շիֆի (Դեմոկրատական – Գալիֆորնիա), եւ Պրէտ Շըրմընի (Դեմոկրատական – Գալիֆորնիա) հետ գործող պատասխանատուներու հետ:
