Հ.Մ.Ը.Մ.-Ի ՕՐԻՆԱԿՈՎ

ՀԱՅՐԵՆԻՔ

Խմբագրական

Յուլիս 1, 2017

Ա.Մ.Ն. արեւելեան շրջանի Հ.Մ.Ը.Մ.-ի 27-րդ Նաւասարդեան խաղերուն առթիւ, անգամ մը եւս բեմահարթակւի վրայ է Հայ Մարմնակրթական Ընդհանուր Միութիւնը:
Օրինակելի միութիւն մըն է Հ.Մ.Ը.Մ.-ը: Անսասան ու անդեդեւ՝ Տորմիղ հրաթեւ մըն է այս միութիւնը՝ տիպար ու գործօն կազմակերպութիւն մը, որ կը թակէ իր հիմնադրութեան հարիւրամեակը:
Այս առթիւ, անգամ մը եւս աշխատանքի եւ գործունէութեան հրամայականը սեղանի վրայ է, իբրեւ անմիջական ուսումնասիրուելիք օրակարգ:
Շարունակ նոր գաղափարներ, իրագործումներ եւ ծրագրեր, եւ այդ ալ համաշխարհայնացման այս ճեպընթացային օրերուն:
Հաւանաբար ժամանակն է մտածելու վաղուան մասին:
Այսօր, շատ աւելի դժուար է Հ.Մ.Ը.Մ.-ին համար հաւասարակշռութիւն պահելը միջավայրէն ներս պարտադրած իրականութիւններուն եւ հայեցի դաստիարակման հրամայականին միջեւ:
Հ.Մ.Ը.Մ.-ը որպէս պատասխանատու եւ փորձառու համահայկական կազմակերպութիւն, հետեւողական աշխատանք ունի կատարելիք, իր ամբողջական ներուժը տրամադրելով ազգային հաւաքական աշխատանքին:
Յատկապէս Սփիւռքի զանազան գաղթօճախներէ ներս, Հ.Մ.Ը.Մ.-ը հայեցի շունչ, ոգի եւ մշակոյթ կը ջամբէ, նաեւ կը դաստիարակէ պատանի-պարմանուհի տարիքի հայորդիներ:
Ի վերջոյ, Հ.Մ.Ը.Մ.-ը իր ծննդոցէն կազմակերպութիւն մըն է որ կը հաւատայ հաւաքական նպատակի, եւ այդ բոլորին մէջ ալ արժէք կը տեսնէ: Այսուամենայնիւ, նաեւ որպէս կազմակերպութիւն կը հաւատայ հաւաքական նպատակին եւ ազգային ռազմավարութեան:
Միութիւն մըն է Հ.Մ.Ը.Մ.-ը, որ միշտ ալ կը հաւատայ փոփոխութեան եւ միեւնոյն ժամանանակ բարելաւման: Եւ այս մէկը բնազդային պահանջ է, որ անբաժանելի մասնիկն է Հ.Մ.Ը.Մ.-ական դաստիարակութեան:
Կարգապահութիւնն ու վեհանձնութիւնը Հ.Մ.Ը.Մ.-ի ենթահողը կը կազմեն: Ի վերջոյ այս մեծագոյն կազմակերպութիւնը, իր օրինակելի գործունէութեամբ, կը դաստիարակէ մատղաշ սերունդը:
Պարզ ու մեկին, մարզական հանդիպումներէն եւ մրցակցութիւններէն աւելի, Հ.Մ.Ը.Մ.-ական մթնոլորտն է առաջնահերթութիւնը, եւ վստահաբար Փրովիտէնսի մէջ կատարուելիք այս տարուայ Նաւասարդեան խաղերուն այս իւրայատուկ եւ եզակի Հ.Մ.Ը.Մ.-ական տիպարն է որ յաղթական դուրս պիտի գայ:
Հ.Մ.Ը.Մ.-ի այս խաղերուն, կրկին պիտի բնորոշուի Հ.Մ.Ը.Մ.-ի առաքելութիւնը:
Նմանօրինակ ձեռնարկներով Հ.Մ.Ը.Մ. ենթահողը կը պատրաստէ ապագայ սերունդին, ապագայ տեսլականին՝ ապառնիի Հ.Մ.Ը.Մ.-ին:
Միշտ ալ հպարտ է Հ.Մ.Ը.Մ.-ականը, եւ յատկապէս յանձնառու՝ իր հայ պատկանելիութեամբ:

 

Be the first to comment

Leave a Reply

Your email address will not be published.


*