«ՀԱՄԱԶԳԱՅԻՆ»Ի ԲԵՂՈՒՆ ԳՈՐԾՈՒՆԷՈՒԹԻՒՆԸ ՖԻԼԱՏԵԼՖԻՈՅ ՄԷՋ

ՖԻԼԱՏԵԼՖԻԱ.- Կիրակի, Ապրիլ 30-ին Սուրբ Գրիգոր Լուսաւորիչ եկեղեցւոյ սրահին մէջ տեղի ունեցաւ հաւաք մը, մասնակցութեամբ տեղւոյն շրջանի «Համազգային»ի անդամներուն եւ համակիրներուն: Յատկապէս ներկայ էին «Մեղրի» պարախումբի անդամներն ու օգնականները:
Այս հանդիպման նաեւ մասնակից դարձան Արեւելեան Ա.Մ.Ն.-ի «Համազգային»ի Կեդրոնական Վարչութեան ներկայացուցիչ Հրայր Պարոնեան եւ Շրջանային Վարչութեան անդամներ՝ Անի Աղաճանեան (ատենադպիր) եւ Քարի Աղաճանեան (գանձապահ):
Հաւաքին բացումը կատարեց շրջանի մասնաճիւղի ներկայացուցիչ Հրանդ Ճիլիզեան, որ բարի գալուստի խօսքէն ետք, բեմ հրաւիրեց Կեդրոնական Վարչութեան ներկայացուցիչ Հրայր Պարոնեանը, հակիրճ կերպով «Համազգային»ի կատարած եւ կատարելիք աշխատանքներուն մասին տեղեկութիւններ փոխանցելու համար:
Պարոնեան շեշտեց թէ, նոր սերունդն է որ պէտք է շարունակէ աշխատանքը նոր գործելաձեւով: Այս նպատակին հասնելու համար «Համազգային»ը կը գործէ զանազան ուղիներով, որոնց կարգին՝ նոր սերունդին հայեցի կրթութիւն տալ, նպաստել չափահասներու ինքնազարգացման եւ մշակել հայեցի կրթութիւնը:
Այս գծով, ան յատուկ շնորհակալութիւն յայտնեց Ֆիլատելֆիոյ «Համազգային»ի մասնաճիւղին, որուն հետեւողական աշխատանքին արդիւնք, մասնաճիւղի անդամներուն թիւը հետզհետէ կ՛աւելնայ: Արդարեւ, վերջերս հինգ երիտասարդ անդամներ միացած էին մասնաճիւղին:
Նաեւ կատարուեցաւ հանդիպում-զրոյց, տեղւոյն «Մեղրի» պարախումբին անդամներուն եւ ծնողներուն հետ: Աւարտին տեղի ունեցաւ հիւրասիրութիւն:

Be the first to comment

Leave a Reply

Your email address will not be published.


*