ԻՒՐԱՅԱՏՈՒԿ ՕՐԵՐ ԵՒ ՑԱՅՏՈՒՆ ԴԷՄՔԵՐ

Ցողիկ Աշըգեան
Երեւան
Կան օրեր որ պարզապէս օրեր չեն, ինչպէս որ կան մարդիկ եւ սերունդներ, որոնք պարզապէս մարդիկ եւ սերունդներ չեն: Անոնք ուրիշ են, տարբեր են , ի՚րապէս անզուգական են: Օրե՜ր եւ անձե՜ր: Մէկ օր ՝ Մայիս 28, եւ անկրկնելի սերունդ՝ Անկախութեան սերունդ:
Մէկ տարիէ պիտի լրանայ Անկախութեան հարիւրամեակը: Թէ Անկախութեան կերտիչ , յեղափոխական գործիչ եւ մտաւորական ,համեստ եւ գաղափարական Մեծն Արամ Մանուկեանը, յեղափոխական ականաւոր ղեկավար՝ Ռուբէն Տէր Մինասեանը ,մանկավարժ ,հասարակական եւ քաղաքական գործիչ Նիկոլ Աղբալեանը, վրիժառու , Հ.Հ. առաջին Ռազմական նախարար Դրաստամատ Կանայեանը ին՞չ խորհուրդ կրնայ ըլլալ փոխանցէին մեր սերունդին: Հաստատ գիտեմ , որ անոնք մեզի ցոյց պիտի տային մէ՚կ ուղղութիւն եւ մէ՚կ հաւատամք: Անոնք պիտի առաջնորդէին մեզ ցոյց տալով գաղափարականութեան ուղին: Մեզ պիտի տոգորէին ժողովրդավար մտածողութեամբ եւ ընկերվար սկզբունքներով: Պիտի ներշնչէին մեզի ծառայութեան ոգի, եւ հաստատէին, թէ ա՚յդ է միակ ճանապարհը ազգակերտման: Յուսալքման ամէն մտածում պիտի վանէին մեր մտքերէն եւ փոխարէնը պիտի ծաղկեցնէին մտասլաց եւ նպատակադրուած յստակ գործելակերպ: Այլ խօսքով, պիտի ուղղէին եւ առաջնորդէին մեզ Հայ Յեղափոխական Դաշնակցութեան:
Այս տարի Մայիս 28ը տօնակատարեցինք Բիւրականի բանակավայրին մէջ , Հ.Յ.Դ. Երեւանի քաղաքային կոմիտէի կազմակերպած հաւաքով մը: Խնճոյքի ժամանակ, երբ երգիչը կ՚երգէր «Արարատը մեր լեռն է» ես գոհունակ, սակայն միաժամանակ վրդովումով աչքս յառած էի Արարատին, որ իր դիւթական անվեհութեամբ վկան է մեր պատմութեան օրհասական եւ փառահեղ բոլոր իրադարձութիւններուն: Ականատեսն է եղած մեր աննկարագրելի տառապանքներուն, մեր ազգի հազարամեայ պատմութեան,մեր արի զաւակներուն սխրագործութւիւններուն :
Եւ հարցում մը կը պարտադրէր ինքզինք… արդեօք այս օրուան մէջ ի՞նչ կը մտածեն եւ ի՞նչ կ՚ընեն փշաթելերէն անդին պատմական հայրենիքին մէջ ապրող մեր հայրենակիցները: Արդեօք անոնք գիտե՞ն թէ այսօր Մային 28 է , թէ այսօր մեր Անկախութեան փառաւոր տօնն է , թէ այսօր մեր Յա՚ղթանակի տօնն է. կը գիտակցի՞ն թէ Մայիս 28ի օրինակով մեր ազգի պայքարի ոգին եւ ուժը անպարտելի են եւ թէ այդ ոգին իրենց մէջ ալ անթեղուած է եւ անպայման օր մը պիտի արեգակէ:
Այ՚ո, Մայիս 28 սովորական տօն մը չէ: Անիկա մեր նորագոյն պատմութեան մեկնակէտն է: Եւ պէտք է տօնուի արժանավայել կերպով, պետականօրէն իր ամբողջական իմաստով , մանաւանդ Հ.Յ.Դաշնակցութեան անուրանալի դերը արժեւորելով անոր կայացման մէջ: Մայիս 28-ը ա՚յն տօնն է, որ տակաւին երկար ժամանակ իր գաղափարական խորհուրդով եւ քաղաքական առաջադրանքներով պիտի միախմբէ մեզ Հայաստանէն Միջին արեւելք , Եւրոպայէն Ամերիկաներ, մինչեւ Պոլիս ու Տիգրանակերտ , մինչեւ Համշէնի սէգ լեռներ եւ Տերսիմի լայն դաշտեր: Մայիս 28 ը հայ նոր սերունդները պիտի առաջնորդէ դէպի նոր ազատագրումներ:

 

Be the first to comment

Leave a Reply

Your email address will not be published.


*