ՆՇՄԱՐ.- «ՕՐՈՐԱ»Ն ՆԱԽԱՆՁ ԿԸ ԳՐԳՌԷ…

Ս. ՄԱՀՍԷՐԷՃԵԱՆ
28 Մայիս 2017

Կիրակի, 28 Մայիսին, Հայաստանէն ուղղակի հեռասփռուեցաւ »Օրորա« մրցանակի բաշխումի հանդէսը, որ իսկապէս ողջունելու եւ գովասանքի արժանի նախաձեռնութիւն մըն է եւ Հայաստանն ու իր Մշակոյթը, բառին ամէնէն լայն իմաստով, կը բերէ միջազգային լուսարձակի տակ, ցոյց կու տայ, թէ Հայաստանն ու Հայը, հայրենի ու սփիւռքեան կէսերով, սքանչելի ամբողջութիւն մը կը մարմնաւորեն, գործնական հրաւէր մը կþուղղեն մարդկութեան, որպէսզի արթնութիւն ցուցաբերէ աշխարհատարած անմարդկայնութեանց դէմ, նաեւ մարդասիրական առաքելութիւններու լծուած եւ լուսարձակներէ հեռու մնացող նուիրեալներ պատիւի ու յարգանքի արժանացնեն։
«Օրորա»ն ծնունդ առաւ Ցեղասպանութեան 100-ամեակին, մտայղացումն էր սփիւռքցի մտաւորականներու եւ բարերարներու, որոնց նախաձեռնութեան ընդառաջեցին Հայաստանի իշխանութիւնն ու միջազգային ճանաչում ունեցող դէմքեր։ Անոնք, որոնք առիթը ունեցան հետեւելու Կիրակիի հեռասփռումին, վստահաբար չափսոսացին, որ անիկա տեղի կþունենար Հայաստանի Հանրապետութեան ծննդեան տարեդարձի օրը, որովհետեւ Մայիս 28-ն ու Սարդարապատը իրենց տեղը ունեցան բեմէն լսուող արտայայտութիւններուն մէջ։
Պէտք չէ անտեսել դրօշակիրի հանգամանք ունեցող այս նախաձեռնութեան քաղաքական երեսը (եթէ պահ մը մէկդի ձգենք անշրջահայեացութեան մը պարագան), մանաւանդ այս օրերուն, երբ մեր ձայնը կը միացնենք Թուրքիոյ անմարդկային դիմագիծը արար աշխարհին ցուցադրողներուն, մասնաւորաբար նախագահ Էրտողանի Ուաշինկթըն այցելութեան առիթով անոր թիկնապահներուն գործած վայրագութեանց լոյսին տակ։ Մարդասիրութեամբ լեցուած ու աշխարհի տարածքին վայրագութեան ալիքները դատապարտող ոեւէ ժողովուրդ վստա՛հաբար բարի նախանձով պիտի դիտէ հայկական այս նախաձեռնութիւնը։

***

Խօսելով նախանձի մասին, կարելի է երեւակայել, որ… Թուրքիոյ իշխանաւորներն ալ նախանձով կը դիտեն այս մրցանակը։
Եթէ չեն ուզեր մեզմէ ետ մնալ աշխարհի բեմին վրայ, կրնան դիմել իրե՛նց հասկցած ձեւով մրցանակի մը հաստատման։ Օրինակ, հաստատել Ճենկիզ Խանի անունով մրցանակ մը, եւ ամէն շաբաթ զայն շնորհել աշխարհի տարածքին ամէնէն դատապարտելի ոճիրները գործողներուն, որոնց ներշնչման գլխաւոր աղբիւրը՝ նոյնինքն բռնատիրական Թուրքիան է։
Եւ որքա՜ն մեծ պիտի ըլլայ շարք բռնողներուն թիւը, սկսելով նոյնինքն Էրտողանի թիկնապահներէն, հասնելով եւրոպական քաղաքներու անմեղ բնակիչները ահաբեկողներուն ու Իրաքէն Սուրիա, Եգիպտոս ու այլուր նախճիրներ գործողներուն։

 

Be the first to comment

Leave a Reply

Your email address will not be published.


*