Հ.Օ.Մ.-Ի «ՄՕՐ ՈՒ ՄԱՆԿԱՆ»Ը ԻՐ ԵՐՐՈՐԴ ՏԱՍՆԱՄԵԱԿԻ ՍԵՄԻՆ…

Արդէն իսկ երկու տասնամեակ բոլորած, Հայ Օգնութեան Միութեան Ախուրեանի «Մօր ու Մանկան» Առողջական ու Մանկաբարձական կեդրոնը, անընդհատօրէն յառաջադէմ ու արդիւնաւետ իր ազգանուէր ծառայութենէն ետք, այս տարի կը տօնակատարէ իր 20-րդ տարեդարձը՝ արդարօրէն գիտակից ու գոհունակ իր բազմակողմանի աշխատանքներուն յաջող իրականացումէն։
Մեր նորագոյն պատմութեան ճակատագրական մէկ շրջանին յղացուած եւ հայրենի հողի վրայ, Ախուրեանի՛ մէջ իրականացուած Հ.Օ.Մ.-ի այս առողջապահական հաստատութիւնը, 1988-ի աւերիչ երկրաշարժէն ինը տարի ետք, 1997-ին բացաւ իր դռները Ախուրեանի եւ շրջակայ աւաններու եւ գիւղերու շուրջ 40,000 բնակիչներուն արգասաւոր տարիքի կիներուն եւ մանուկներուն մատչելի դարձնելով որակաւոր նախա- եւ յետ-ծննդաբերական խնամք, դարման եւ ապաքինում՝ նկատելի վերելք արձանագրելով շրջանի առողջապահական վիճակի բարելաւման։
Որպէս յարատեւ յառաջդիմութեան ձգտող արդիական հաստատութիւն, «Մօր ու Մանկան» կեդրոնը, համասփիւռքեան Հ.Օ.Մ.-ի միաւորներու գործունեայ մասնակցութեամբ, 2005-ի ապրիլին, բացաւ իր արդիական սարքերով ու մասնագէտներու անձնակազմով օժտուած Ծննդաբերական բաժինը։ Երէք աշխատունակ տարիներէ ետք, 2008 թուին, Կեդրոնի նորահաստատ Ատամնաբուժարանը սկսաւ հիւանդներ ընդունիլ՝ սատարելով մայրերու ընդհանուր առողջական վիճակին կայունացման, մասնաւորաբար անոնց յղութեան շրջանին։
Այսօր, Ախուրեանի «Մօր ու Մանկան» Առողջական ու Մանկաբարձական կեդրոնը, բժշկական արդիական սարքաւորումներու կողքին, ունի անընդհատ ջեռուցման եւ ելեկտրական հոսանքի ինքնաբաւ մեքենականութիւն, մանկաբուժական ու կանացի հիւանդութիւններու դարմանումի յատուկ արձագանգային քննութեան, ստինքազննութեան եւ անմիջական օգնութեան բաժիններ, ընդարձակելով ու ամբողջացնելով իր բժշկական ծառայութիւններու յարաճուն ծիրը։
Արժանաւորապէս տօնակատարելու համար Կեդրոնին 20-րդ տարեդարձը, ու մանաւանդ քաջալերելու համար մեր հայրենիքի տարածքին իգական սեռի նորածիններու բարեբաստիկ գալուստն ու բազմացումը, Հ.Օ.Մ.-ի Կեդրոնական վարչութիւնը, իր 14-րդ լիագումար նիստին, մշակեց «Ծնունդի Խնամակալ» իր նոր ծրագիրը՝ որուն հիման վրայ Հ.Օ.Մ.-ի «Մօր ու Մանկան» ծննդատունէն ներս, ծնած իւրաքանչիւր երկրորդ աղջիկ նորածինով մը բախտաւորուած ընտանիք, կը ստանայ 150 ամերիկեան տոլար՝ որպէս շնորհաւորական։
Հայ Օգնութեան Միութիւնը, այս առթիւ կը դիմէ իր բոլոր համակիրներուն ի մտի ունենալ այս ուրախառիթ ու կենսատու ծրագիրը՝ Խնամակալ դարնալով նոր կեանքի մը գալուստին։
Հ.Օ.Մ.-ի Կեդրոնական վարչութիւնը, կը շնորհաւորէ Կեդրոնի ներկայ եւ անցեալ անձնակազմերը՝ իրենց 20 տարիներու նուիրեալ աշխատանքին համար եւ շնորհակալութիւն կը հատնէ Հ.Օ.Մ.-ի մեծ ընտանիքին, եւ բոլոր անհատներուն, որոնց օժանդակութեան կը պարտինք այն արդիւնքները՝ որոնք կը շարունակեն իրականութիւն դառնալ:

Be the first to comment

Leave a Reply

Your email address will not be published.


*