Հ.Յ.Դ. Երիտասարդականը Մասնակցեցաւ Հոլանտայի Բազմակուսակցական Ժողովրդավարութեան Հիմնարկի Դասընթացքին

ԵՐԵՒԱՆ.- Ապրիլ 2017-ին Վրաստանի մայրաքաղաք Թիֆլիսի մէջ տեղի ունեցաւ Հոլանտայի բազմակուսակցական ժողովրդավարութեան հիմնարկին կողմէ հայ երիտասարդ քաղաքական գործիչներու համար նախաձեռնուած հերթական հանդիպում-դասընթացքը, որ կը կրէր «Պայքար քարոզչութեան եւ կեղծ տեղեկատուութեան դէմ» խորագիրը:
Դասընթացքին մասնակցեցան Հայաստանի քաղաքական կուսակցութիւններու երիտասարդական կազմակերպութիւններու ներկայացուցիչներ: Հ.Յ.Դ. Երիտասարդականը դասընթացքին մասնակցեցաւ երկու ներկայացուցիչով` Գէորգ Ղուկասեան եւ Անուշ Յովհաննիսեան:
Հ.Յ.Դ. Բիւրոյի երիտասարդական գրասենեակը յաւելեալ մանրամասնութիւններ փոխանցելով, կը տեղեկացնէ թէ, դասընթացքի ընթացքին խօսուեցաւ կեղծ տեղեկատուութեան տարածման մեթոտներու եւ հասարակական կարծիքի ձեւաւորման վրայ անոնց ազդեցութեան մասին: Նաեւ քննուեցաւ գրաւոր, տեսաձայնային եւ լուսանկարային կեղծ տեղեկատուութիւններու դէմ պայքարին` անոնց բացայայտման եւ չէզոքացման արդի մեթոտաբանութեան ու ծրագրային կարելիութիւններուն մասին նիւթը:
Դասընթացքի աւարտին տեղի ունեցաւ քննարկում, նաեւ մասնակիցները զրուցեցին իրենց տպաւորութիւններուն մասին:

Be the first to comment

Leave a Reply

Your email address will not be published.


*