Մարսէյի Հրապարակներէն Մէկը Պիտի Կոչուի «Սողոմոն Թեհլիրեան»

ՄԱՐՍԷՅ («Նոր Յառաջ», «Նուվէլ Տ՛Արմէնի»).- Հարաւային Ֆրանսայի Հայ Դատի բաժնի զօրակցութեամբ եւ 6-րդի եւ 8-րդի թաղապետ Իվ Մորենի նախաձեռնութեամբ, Մարսէյի հրապարակներէն մէկը պիտի կրէ «Սողոմոն Թեհլիրեան» անունը: Քաղաքի 6-րդ թաղամասի Վալոն տը Մոնթեպելլօ եւ Գամպոճի փողոցներու խաչմերուկին գտնուող հրապարակի անուանակոչութեան արարողութիւնը տեղի պիտի ունենայ Ապրիլ 21-ին:
Հանդիսութեան ներկայ պիտի ըլլան Ծերակոյտի փոխնախագահ եւ Մարսէյի քաղաքապետ Ժան-Քլօտ-Կօտէն, ինչպէս նաեւ քաղաքական թէ այլ բազմաթիւ անձնաւորութիւններ, հայ համայնքի ներկայացուցիչներ:
Սողոմոն Թեհլիրեան 1915-ին իր մօր եւ եղբօր սպանութեան, ինչպէս նաեւ իր երեք քոյրերու բռնաբարման եւ սպանութեան ականատես ըլլալէ ետք, 1921-ին ընդգրկուած էր Հ.Յ.Դ.-ի «Նեմեսիս» գործողութեան մէջ, որու առաքելութիւնն էր պատժել Հայոց ցեղասպանութիւնը կազմակերպողները եւ գործադրողները: Թեհլիրեան, Մարտ 15, 1921-ին Պերլինի մէջ սպաննած էր Թալէաթ փաշան: Արարքէն ետք՝ ան չէր դիմած փախուստի եւ իսկոյն ձերբակալուած էր:
Թեհլիրեան դատուեցաւ այդ ոճիրին համար, բայց անպարտ հռչակուեցաւ գերմանական արդարադատութեան կողմէ: Անոր դատավարութիւնը նշանաւոր դարձած է, դատարանը քննարկած ըլլալով ոչ միայն իր յանցանքը, այլ նաեւ Թալէաթ փաշայի պատասխանատւութիւնը Հայոց տարագրութեան եւ ջարդերուն մէջ:
Ազատ արձակուելէ ետք՝ Թեհլիրեան հաստատուած է Սերպիա, ամուսնացած է Անահիտ Թաթիկեանի հետ, որ իր նման երզնկացի էր: Զոյգը այնուհետեւ հաստատուած է Պելճիքա ուր ապրած է մինչեւ 1945: Այդ թուականին անոնք մեկնած են Սան Ֆրանսիսքօ: Թեհլիրեան մահացած է 1960-ին եւ թաղուած է Ֆրեզնոյի «Արարատ» գերեզմանատան մէջ:

Be the first to comment

Leave a Reply

Your email address will not be published.


*