ԱՆՆԱԽԸՆԹԱՑ ՅԱՋՈՂՈՒԹԻՒՆ՝ Հ.Օ.Մ.-Ի ԿԱԶՄԱԿԵՐՊԱԾ ԱՐԹՈՒՐ ՓԻՆԱՃԵԱՆԻ ԳՈՐԾԵՐՈՒ ՑՈՒՑԱՀԱՆԴԷՍԻՆ

Անցեալ շաբաթավերջին Նիւ Եորքի Սուրբ Լուսաւորիչ Մայր Տաճարի «Ճան Փաշալեան» ներքնասրահին մէջ տեղի ունեցաւ ամերիկահայ գեղանկարիչ Արթուր Փինաճեանի գործերուն ցուցահանդէսը, որ կազմակերպած էր Հ.Օ.Մ.-ի Արեւելեան Ամերիկայի Շրջանային Վարչութիւնը։ Ցուցահանդէսին պաշտօնական բացումը տեղի ունեցաւ Շաբաթ, Ապրիլ 1-ին։ Այս ձեռնարկին նպատակն էր վաճարուած գեղանկարներուն հասոյթով նիւթական ներդրում ապահովել Հ.Օ.Մ.-ի Կրթական Հիմնադրամին։
Բացման հանդիսութիւնը սկսաւ Հ.Օ.Մ.-ի Արեւելեան Ամերիկայի Շրջանային Վարչութեան անդամ եւ այս ձեռնարկի կազմակերպիչ յանձնախումբի ատենապետ Սոնիա Պզտիկեանի բարի գալուստի խօսքով։ Ան շնորհակալութիւն յայտնեց ներկաներուն իրենց քաջալերանքին համար եւ գնահատեց յանձնախումբի տարած աշխատանքը, որուն շնորհիւ Փինաճեանի գործերը ներկայացուեցան հայ հասարակութեան։ Ան ներկաներուն պատմեց, թէ ինչպէս Փինաճեանի գործերուն ծանօթացած էր երեք տարի առաջ ճիշտ նոյն վայրին մէջ, երբ Սուրբ Լուսաւորիչ Մայր Տաճարի հոգեւոր հովիւ Տ. Մեսրոպ Քհն. Լաքիսեանի ջանքերով ցուցադրուած էին անոր գործերը։ Իսկ երբ Շրջանային Վարչութիւնը ցուցահանդէս մը կազմակերպելու պարտականութիւնը յանձնեց Սոնիա Պզտիկեանին, ան անմիջապէս որոշեց որ այդ նուիրուած ըլլար Փինաճեանի գործերուն։ Տ. Մեսրոպ Քհն. Լաքիսեանի անվարան միջնորդութեամբ ընկերուհին կապ հաստատեց Փինաճեանի գործերուն խնամակալ Թոմաս Շուլցին հետ, եւ մէկ տարի տեւող բանակցութիւններէ ետք կարելի եղաւ իրականացնել այս ցուցահանդէսը։ Պզտիկեան իր խորին շնորհակալութիւնը յայտնեց Տէր Հօր, որուն ջանքերուն շնորհիւ կարելի եղաւ ներկայացնել Փինեճեանի գործերէն նախապէս հազուադէպօրէն երեւցած փունջ մը, իր քսաներորդ դարու կէսերուն պատկանող վերացական եւ կեանքին վերջին շրջանէն առնուած բնանկարներ, որոնք ծախու դրուեցան հանրութեան մատչելի գիներով, յատուկ այս ցուցահանդէսին համար։
Ապա անգլերէնով խօսք առաւ Հ.Օ.Մ.-ի Արեւելեան Ամերիկայի Շրջանային Վարչութեան անդամ Սանտրա Վարդանեան։ Ան խօսեցաւ Հ.Օ.Մ.-ի առաքելութեան մասին եւ քաջալերեց ներկաները սատար կանգնելու այս միութեան՝ գնելով Փինաճեանի հազուագիւտ գործերը, զարդարելով իրենց բնակարանները ու հասոյթ ապահովելով Հ.Օ.Մ.-ին հայ ուսանողներու կրթական նպաստ հայթայթող ֆոնտին։
Ցուցահանդէսին պաշտօնական բացումը կատարեց Առաջնորդական Փոխանորդ Անուշաւան Եպս. Դանիէլեան։ Սրբազանը դրուատիքով խօսեցաւ Հ.Օ.Մ.-ի տարած աշխատանքին մասին։ Սրբազան Դանիէլեան հրաւիրեց Փինաճեանի Արուեստի Տան նախագահ Թոմաս Շուլցը, որուն ջանքերուն շնորհիւ փրկուած են Փինաճեանի գործերը եւ անոր փոխանցեց իր շնորհակալութիւնը։
Այդ օր Նիւ Եորքի Սուրբ Գրիգոր Լուսաւորիչ Մայր եկեղեցւոյ ներքնասրահը կերպարանափոխուած էր ու դարձած էր մասնագիտական ցուցադրասրահ մը։ Անհաւատալի էր պատկերացնել, թէ ցուցադրուած արուեստագէտը՝ Փինաճեան, իր ամբողջ կեանքին ընթացքին գծած ու նկարած էր, բայց իր գործերէն ոչ մէկը կրցած էր ցուցադրել, գնահատանքի արժանացնել կամ վաճարել։ Իր բոլոր գործերը անխնամ կերպով նետուած էին իր տան նկուղին մէջ։ Միայն իր մահէն ետք էր, որ անոնք լոյս աշխարհ եկած էին ու արժանացած՝ բարձր գնահատանքի։
Հոս տեղին է նշել, թէ ցուցահանդէսը իր աւարտին հասաւ արձանագրելով աննախադէպ ու անկանխատեսելի յաջողութիւն։ Շնորհիւ վաճարուած կտորներուն, այս միջոցառումը կրցաւ իր նպատակին հասնիլ առաւելագոյն չափով, ապահովելով Հ.Օ.Մ.-ին նիւթական ներդրում, որ ամբողջութեամբ պիտի ծառայէ անոր բարեսիրական նպատակներուն։

Be the first to comment

Leave a Reply

Your email address will not be published.


*