Ո՛Չ… ԷՐՏՈՂԱՆԻ «ԱՅՈ՛»ԻՆ

ՀԱՅՐԵՆԻՔ
Խմբագրական
Ապրիլ 11, 2017

Կիրակի, Ապրիլ 16, 2017-ին Աշխարհը պիտի տօնէ Սուրբ Զատիկը: Իսկ Թուրքիոյ մէջ, այդ միեւնոյն օրը պիտի նշուի տարբեր զատիկ, կամ տեղական գունաւորումը պահելու համար՝ տարբեր պայրամ:
Քաղաքական բեմահարթակէն ներս պիտի նշուի այս զատիկը:
Ո՞վ պիտի նշէ այս տօնը:
«Այո՛»՞ն թէ՞ «ո՛չ»ը: Թուրքիոյ մէջ տեղի ունեցող անցուդարձերով հետեւողներուն համար անհասկնալի չեն այս կարճ ու կտրուկ դրական եւ ժխտական բառերը:
Թուրքիան այս կիրակի որոշում պիտի առնէ թէ «այո՛» համաձայն է նախագահական համակարգին կամ ալ «ո՛չ», այսինքն պահել ներկայ խորհրդարանական համակարգը:
Եւրոպայի զանազան թրքահոծ գաղութներու մէջ, արդէն իսկ կատարուած են ընտրութիւնները: Գաղութներ, որոնք վերջին ամիսներ շատ մելան հոսեցուցին սկսելով ամենէն աւելի թիւ հաշուող Գերմանիայէն մինչեւ Հոլանտա, Պելճիքա, Ֆրանսա, Դանիա եւայլն:
Այսպէս Թուրքիոյ նախագահ Ռեճեպ Թայիպ Էրտողանը իր պաշտօնին եւ բնականաբար ամէն բանէ վեր նկատուող իր անձին համար այցելեց զանազան «բանալի» քաղաքներ (իր ղեկավարած երկրէն ներս թէ դուրս) եւ իր ընտրարշաւի աշխատանքները կատարեց: Այս անգամ, ան հանդիպեցաւ բաւական մը արգելքներու, որոնց մասին անդրադառնալով՝ յայտնեց թէ եւրոպացիները կը հալածեն իրենց երկիրներէն ներս ապրող թուրքերը, եւ թէ ասոր պատասխանը շուտով պիտի տայ Ապրիլ 16-ի ընտրութեան արդիւնքը:
Վերջերս Պոլսոյ եւ Իզմիրի մէջ կատարած, իր հաւաքներուն ընթացքին, Էրտողան աւելցուց թէ եւրոպացիք իր դէմ լարած թակարդին սուղ գին պիտի վճարեն:
Էրտողան եւ իր քարոզչական մեքենան միշտ ալ բեղուն գործունէութիւն տարած է եւ շարունակ կրցած է յաղթական դուրս գալ:
Կարեւորագոյն հարցադրումը այն է թէ ի՞նչ կը ներկայացնէ իրավիճակը Ապրիլ 16-ի նախօրեակին:
Էրտողանի «Արդարութիւն եւ Բարգաւաճում» կուսակցութիւնը (AKP), իր կողքին ունենալով ազգայնամոլ «Ազգայնական Շարժում» (MHP) կուսակցութիւնը կը վայելէ բաւական մը ժողովրդականութիւն ի դէմ ընդդիմադիր «Հանրապետական Ժողովուրդի» կուսակցութեան (CHP) եւ քրտամէտ «Ժողովուրդներու Ժողովրդավարական» կուսակցութեան (HDP): Այս վերջինը, Նոյեմբեր 4, 2016-էն ի վեր քաշուած է խորհրդարանէն եւ ցայսօր պոյքոթի կ՛ենթարկէ որեւէ ընտրութիւն:
Էրտողան ձերբակալել տուած էր այդ կուսակցութեան կարեւոր 11 ղեկավարները, որոնց կարգին համանախագահներ՝ Սելահետին Տեմիրթաշ եւ Ֆիկեն Եուքսեքտաղ, պատճառաբանելով եւ ահազանգ հնչեցնելով թէ, դաւադիր ուժեր կը փորձեն գործել յաչս իր ղեկավարած երկրի փլուզման: Իսկ «Հանրապետական Ժողովուրդի» կուսակցութեան քարոզչական գործելաձեւը նոյնքան գործօն չէ որքան «Արդարութիւն եւ Բարգաւաճում» կուսակցութեան կատարած արշաւը:
Այսուամենայնիւ, Էրտողանի դէմ «ո՛չ»ը կրնայ ժայթքիլ ներսէն, այսինքն իր շրջապատէն, յանձին նախկին գաղափարակից գործընկերներ՝ Ապտիւլլա Կիւլի (նախկին նախագահ) եւ Ահմետ Տաւութօղլուի (նախկին վարչապետ), որոնք տարակարծիք ըլլալով, հեռու կը մնան սուլթանամիտ Էրտողանէն: Անոնք հետզհետէ աւելի մտերմացած կը թուին ըլլալ եւ շարունակ յաճախակի հանդիպումներու ընթացքին, շարունակ դէմ կ՛արտայայտուին սահմանադրական փոփոխութիւններուն եւ կառավարման նախագահական համակարգի որդեգրման:
Ինչ որ ալ ըլլայ այս կիրակի օրուայ արդիւնքը, Թուրքիան դուրս պիտի չկարենայ գալ ստեղծուած «այո՛» եւ «ո՛չ» խոր ճեղքէն:

Be the first to comment

Leave a Reply

Your email address will not be published.


*