Նախագահ Սերժ Սարգսեանի Յայտարարութիւնը


Հ.Հ. նախագահ Սերժ Սարգսեան Ապրիլ 2-ին կատարուած ընտրութիւններուն վերաբերեալ հանդէս եկաւ յայտարարութեամբ մը:
Նածագահը յայտնեց թէ.-

Երէկ կարեւորագոյն օր էր մեր պետութեան կեանքին համար: Մենք կազմակերպեցինք խորհրդարանական ընտրութիւններ, որոնք աւելին էին, քան բոլոր այն խորհրդարանական ընտրութիւնները, որ մենք ունեցած ենք անկախացումէն ի վեր: Այսօր մենք մեծագոյն քայլը կատարեցինք Սահմանադրական բարեփոխումներու իրականացման, կիսանախագահականէն խորհրդարանական կառավարման համակարգին անցման ճամբով:

Մենք այս ընտրութիւններուն ընթացքին տեսանք քաղաքական ուժերու աննախադէպ համախմբում: Քաղաքական համակարգին մէջ, ըստ էութեան, չկար որեւէ ազդեցիկ քաղաքական ուժ, որ դուրս մնացած ըլլար ընտրապայքարէն: Ասիկա եւս մէկ վկայութիւն էր այն բանին, որ սահմանադրութեամբ կանխորոշուած` մեր քաղաքական համակարգի շինարարութիւնը կ՛ընթանայ ճիշդ ճամբով:

Ընդդիմութեան պատկառելի ներկայացուածութիւնը խորհրդարանին մէջ այսուհետեւ կարելիութիւն պիտի տայ վերջինիս ամբողջութեամբ օգտուելու խորհրդարանական համակարգին մէջ ընդդիմութեան ընձեռուած վերահսկողական գործիքակազմի ամբողջ համալիրէն, ինչ որ հաւասարակշռուած, վերահսկելի եւ արդիւնաւէտ կառավարման գլխաւոր գրաւականն է:

Շնորհակալութիւն կը յայտնեմ Հայաստանի Հանրապետութեան բոլոր քաղաքացիներուն ընտրութիւններուն այսպիսի աշխուժ մասնակցութեան համար. ասիկա իւրաքանչիւրի ներգրաւուածութեան եւ իւրաքանչիւրի դերակատարութեան կարեւորութեան ընկալման լաւագոյն ցուցիչն է:

Շնորհակալ եմ մեր քաղաքական ուժերուն աշխուժ եւ ընդհանուր առմամբ բարեկիրթ քաղաքական մրցակցութեան համար: Ասիկա գեղեցիկ պայքար էր, որուն նպատակը մեր երկրի զարգացման հարցով կարծիքներու եւ դիրքորոշումներու բախումն ու համադրումն էր:

Շնորհակալ եմ մեր ընդդիմութեան, հասարակական հատուածի ներկայացուցիչներուն եւ միջազգային մեր գործընկերներուն ընտրութիւններու նախապատրաստման եւ կազմակերպման հարցով` քաղաքական փոխհամաձայնութեան, ընտրական հոլովոյթը ամէնէն ժամանակակից արհեստագիտական միջոցներով կազմակերպման օժանդակելու համար:

Շնորհակալ եմ ընտրութիւններու կազմակերպման հարցով ներգրաւուած բոլոր հիմնարկներուն, Կեդրոնական ընտրական յանձնախումբին, ընտրական յանձնախումբերու անդամներուն, բոլոր անհատներուն. դուք մեծ գործ կատարեցիք:

Շնորհակալ եմ իրաւապահ համակարգին` արձանագրուած խախտումներուն շատ պատշաճ արձագանգելու համար. վստահ եմ` սկսած իրաւական հոլովոյթները բնականոն շարունակութիւն կ՛ունենան:

Ապրիլ 2-ը մենք սկսանք Եռաբլուրի մէջ` խնկարկելով քառօրեայ պատերազմին նահատակուած մեր հերոսներու շիրիմներուն: 2 ապրիլը մենք աւարտեցինք անոնց շիրիմներուն տրուած մեր խոստումը իրականացնելու հարցով մէկ քայլ յառաջ երթալով: Մենք խոստացած ենք աւելի ամուր, աւելի ուժեղ եւ զարգացող պետութիւն կառուցել, եւ մենք կառուցած ենք: Բոլորս միասին պիտի կատարենք այս գործը:

Be the first to comment

Leave a Reply

Your email address will not be published.


*