Ա.Մ.Ն. Արեւելեան Շրջանի «Համազգային»ի Դրամահաւաքի Ձեռնարկը Ֆիլատելֆիոյ Մէջ

 

Շաբաթ, Մարտ 11-ին, Արեւելեան Ա.Մ.Ն.-ի «Համազգային»ի կազմակերպութեամբ, տեղի ունեցաւ հաւաք մը Ֆիլատելֆիոյ շրջանին մէջ: Այս ձեռնարկը կազմակերպուած էր Ֆիլատելֆիոյ Տէվըն շրջանի Մարք եւ Անի Սեմերճեաններու երդիքին տակ եւ մտերմիկ մթնոլորտի մէջ զրուցել, յաւելեալ տեղեկութիւններ ստանալ Համազգայինի գործունէութեան մասին: Փենսիլվանիոյ շրջանի գաղութը հրաւիրուած էր այս հաւաքին, որու աւարտին կատարուեցաւ դրամահաւաք, օժանդակելու համար «Համազգային»ի գործունէութիւնը զանազան բնագաւառներէ ներս:
Արեւելեան Ա.Մ.Ն.-ի «Համազգային»ի Շրջանային Վարչութեան անդամներ՝ Արեւիկ Գաբրիէլեան, Անի Աղաճանեան, Քարի Ղազարեան եւ Յասմիկ Աբրահամեան ներկայ էին այս հաւաքին, իրենց կողքին ունենալով «Համազգային»ի Կեդրոնական Վարչութեան ներկայացուցիչ՝ Հրայր Պարոնեան եւ Ա.Մ.Ն. Արեւելեան շրջանի Հ.Յ.Դ. Կեդրոնական Կոմիտէի անդամներ Յովսէփ Աւագեան եւ Արա Չալեան: Նաաեւ ներկայ էր շրջանի Սուրբ Գրիգոր Լուսաւորիչ եկեղցւոյ հովիւ՝ Հայր Ներսէս Մանուկեան:
Արեւելեան Ա.Մ.Ն.-ի «Համազգային»ի ներկայացուցիչ Արեւիկ Գաբրիէլեան, իր կողքին ունենալով փոխներկայացուցիչ Յասմիկ Աբրահամեանը, ներկայացուց հայութեան եւ հայ մշակոյթի պահպանման «Համազգային»ը:
Կարճ պատմական մը եւ զանազան տեղեկութիւններ փոխանցուեցան:
Սփիւռքի մէջ հիմնուած է «Համազգային»ը, որուն ծննդոցին պատճառը Հայոց Ցեղասպանութենէն ճողոպրած եւ ցիր ու ցան եղած հայութեան վերակազմակերպումն էր: Հակառակ հարիւր տարիներ թաւալած ըլլալուն, տարբեր պայմաններու տակ գործը կը շարունակուի:
Յատկապէս արդի դաստիարակութեան եւ նոր սերունդի պատրաստութեան մասին անդարադառնալով, Գաբրիէլեան եւ Աբրահամեան շարունակեցին իրենց խօսքը, ներկայացնելով «Համազգային»ի զանազան ծրագրերը, որոնց կարգին՝ համախմբում (ֆորում), Արուեստի եւ մշակոյթի հաւաք (Արթլինքս): Այս վերջինը, համեմատած համազգային բնոյթ ունեցող համախմբումին, շրջանային բնոյթ ունի, եւ միայն Գանատայի, Արեւելեան եւ Արեւմտեան Ա.Մ.Ն.-ի շրջաններն են, որոնք կը մասնակցին: Յաջորդաբար երրորդ անգամն է որ պիտի կազմակերպուի Արթլինքսը, որուն ազդանշանը տուած էր Արեւելեան Ա.Մ.Ն.-ի «Համազգային»ը, իսկ անցեալ տարի Գանատայի շրջանը կազմակերպած էր: Այս տարուայ Արթլինքսը պիտի կատարուի Արեւմտեան Ա.Մ.Ն.-ի «Համազգային»ի կազմակերպութեամբ:

Նախքան այս հետաքրքրական զեկուցումը, Արեւիկ Գաբրիէլեան օրուան հաւաքին բացումը կատարելով, խօսք տուած էր քանի մը ներկաներու, որոնց կարգին յատկապէս օրուան պատգամաբեր՝ Յովսէփ Աւագեանին (Ա.Մ.Ն. Արեւելեան շրջանի Հ.Յ.Դ. Կեդրոնական Կոմիտէ):
Այս վերջինը, խօսք առնելով յատկապէս անդրադարձաւ հայ տունէն ներս հայ լեզուին, մշակոյթին եւ ընդհանրապէս հայապահպանութեան կարեւորութեան մասին:
Ան յատկապէս շեշտեց թէ, այս գիշեր իսկ, իրենց տան դռները լայնօրէն բացած Սեմերճեաններու տուն մուտք գործելով, երբեք անծանօթ եւ օտարացած չէր զգացած, դրան առջեւ իսկ նկատելով, պատին վրայ կախուած Մեսրոպաշունչ ամբողջական այբուբենին պաստառը:
Հայոց պատմութենէն օրինակներ բերելով Աւագեան աւելցուց թէ «Համազգային»ը կը գործէ զանազան բնագաւառներէ ներս, նոր սերունդին հայեցի կրթութիւն տալով, եւ անշուշտ հետեւողականօրէն նպաստելով ինքնազարգացման եւ զարկ տալով հայագիտութեան: Աւագեան եզրակացուց թէ, բոլոր հատուածներուն մէջ պէտք էր կապ ստեղծել եւ անպայմանօրէն ու անյապաղ պէտք էր մշակել բոլոր այն միջոցները, որոնք կրնան նպաստել հայութեան միացման եւ յարատեւման:
Ապա խօսք առաւ Ֆիլատելֆիոյ գաղութի ներկայացուցիչներէն՝ տոքթ. Արա Չալեան, որ իր կարգին յայտնեց թէ յատկապէս նոր սերունդի դաստիարակութիւնը ամէնէն կարեւորն էր, ամէնէն ընդարձակը եւ մեծ ճիգ ու նիւթական միջոցներ պահանջողը: Ան շեշտեց թէ հայեցի դաստիարակութիւնը կը մնայ անհրաժեշտութիւն մը:
Հուսկ, փակման խօսքը «Հայրենիք»ի խմբագիր Զաւէն Թորիկեան, օրինակներ բերելով Լեւոն Շանթէն եւ Նիկոլ Աղբալեանէն, շեշտեց թէ ջահը պէտք է բարձր պահել, յատկապէս ներկայ համաշխարհայնացման դժնդակ պայմաններուն տակ:
Նշենք թէ, հիւրասիրութեան եւ ընթրիքի կողքին, նաեւ տեղի ունեցաւ գեղարուեստական յայտագիր: Փունջ մը հայրենաշունչ երգերով, ելոյթ ունեցաւ Կարինէ Անտոնեան, իսկ Ֆիլատելֆիոյ «Համազգային»ի «Մեղրի» պարախումբէն քանի մը անդամներ իրենց կարգին ելոյթ ունեցան, տպաւորելով ներկաները:
Նշենք թէ, Արեւելեան Ա.Մ.Ն.-ի «Համազգային»ը կը գործէ ութ մասնաճիւղերով՝ Նիւ Եորք, Նիւ Ճըըրզի, Ֆիլատելֆիա, Պոսթըն, Փրովիտենս, Ուաշինկթըն, Շիքակօ եւ Տիթրոյթ:

Թղթակից

Be the first to comment

Leave a Reply

Your email address will not be published.


*