Արցախի Հիմնահարցին Մասին Ձեռնարկներ Մասնակցութեամբ Մարդկային Իրաւունքներու Պաշտպան Ռուբէն Մելիքեանի

 

ՈՒԱՇԻՆԿԹԸՆ.- Արեւելեան Ամերիկայի Հայ Դատի յանձնախումբը կը տեղեկացնէ, թէ Մարտ 8էն 18ի միջեւ Միացեալ Նահանգներ այցելած Արցախի մարդկային իրաւունքներու պաշտպան Ռուբէն Մելիքեան (Ֆլեչըր համալսարան յաճախած, մարդկային իրաւունքներու պաշտպան եւ քաղաքական միջնորդ), որ զանազան շրջաններ այցելելով մասնակցած է հաւաքներու, կլոր սեղաններու եւ զրոյցներու: Մարտ 9-ին, Պոսթընի հանրածանօթ MIT համալսարանին մէջ, տեղւոյն համալսարանի հայ աշակերտներու հիմնարկին, Հայագիտական Ուսումնասիրութիւններու Կեդրոնի (NAASR) եւ Լիզպոնի Գալուստ Կիւլպէնկեան հիմնարկի կազմակերպութեամբ, տեղի ունեցաւ կլոր սեղան – զրոյց մը, որուն նիւթն էր Արցախի հիմնահարցը:
Զրուցավարն էր Թիւֆենքեան հիմնարկի տնօրէն Անդրանիկ Գասպարեան, իսկ Ռուբէն Մելիքեանի կողքին կլոր սեղանի մասնակցողներն էին Անի Սարգսեան (Ֆլեչըր համալսարան յաճախած եւ Արցախի արտաքին գործոց նախարարութեան բանբեր), եւ Միացեալ Նահանգներու մօտ, Հայաստանի Հանրապետութեան նախկին դեսպան՝ Ռուբէն Շուկարեան (այժմ դասախօս Թաֆթս համալսարանէն ներս):
Հայագիտական Ուսումնասիրութիւններու Կեդրոնի (NAASR) ներկայացուցիչ Մարք Մամիկոնեան կատարեց բացումը, եւ բեմ հրաւիրեց բանախօսները, որոնք մանրամասնօրէն ներկայացուցին իրենց զեկուցումները:
Մելիքեան բազմաթիւ օրինակներով ներկայացուց թէ Ատրպէյճան չէ յարգած միջազգային օրէնքները, շարունակ չարչարելով եւ նոյնիսկ գլխահատելով անշունչ հայորդիներու դիակներ:
Անի Սարգսեան, իր կարգին շեշտեց թէ Պաքու շարունակ կը մերժէ զինաթափ ընել արձակազէնները:
Նախկին դեսպան Շուկարեան անդրադարձաւ Ատրպէյճանի վարած քաղաքականութեան մասին: Ան շեշտեց թէ Ալիեւի ղեկավարութիւնը կը փորձէ կրօնական բնոյթ տալ հիմնահարցին, որ շատ աւելի վտանգաւոր կացութիւններ կը ստեղծէ:
Աւարտին, զրուցավար Անդրանիկ Գասպարեան առիթ տուաւ հարց-պատասխաններու, որ տեւեց աւելի քան երեսուն վայրկեան:
Մարտ 10ին, Ռոտ Այլընտի մէջ Ռուբէն Մելիքեան հանդիպումներ ունեցաւ Ներկայացուցիչներու տան Արտաքին յարաբերութեանց յանձնախումբի անդամ Տէյվիտ Սիսիլինի, Միացեալ Նահանգներու Ծերակոյտի անդամ Շելտըն Ուայթհաուսի ու Ներկայացուցիչներու տան անդամ Ճիմ Լենկվինի ներկայացուցիչներուն, ինչպէս նաեւ՝ նոյն նահանգի պետական քարտուղար Նելլի Կորպէայի հետ:
Սուրբ Վարդանանց եկեղեցւոյ մէջ կայացաւ համայնքային հանդիպում մը, ուր Մելիքեան խօսեցաւ Արցախի վերջին իրադարձութիւններուն մասին:
Ան շեշտեց, թէ պէտք է լուսարձակի տակ պահել Ատրպէյճանի կողմէ շարունակուող Արցախի ժողովուրդի իրաւունքներուն ոտնակոխումները եւ պէտք է պահանջել, որ ԵԱՀԿը յստակօրէն դատապարտէ Ատրպէյճանի կողմէ զինադադարի խախտումները։

Be the first to comment

Leave a Reply

Your email address will not be published.


*