Հ. Հ. Նախագահ Սերժ Սարգսեանի Այցը Ֆրանսա

ՓԱՐԻԶ («Նուվել Տ՛Արմենի», «Նոր Յառաջ»).- Մարտ 7էն 9, 2017-ին, Հ.Հ. նախագահ Սերժ Սարգսեան այցելեց Ֆրանսա, նախագահ Ֆրանսուա Հոլանտի հրաւէրով։ Հայաստանի նախագահին պաշտօնական եռօրեայ այցը յատկանշուեցաւ շարք մը կարեւոր հանդիպումներով: Առաջին հերթին՝ Ֆրանսախօս երկիրներու միջազգային կազմակերպութեան ղեկավարութեան հետ, որուն յաջորդեց եւրոպահայ համայնքներու ներկայացուցիչներուն հետ ընթրիքը։ Երկրորդ օրուան յայտագիրը կը բաղկանար Փարիզի քաղաքապետուհի Անն Հիտալկոյի տուած ընդունելութենէն, ապա՝ Ֆրանսայի գործարարներու շարժումին կեդրոնին մէջ կլոր սեղանէն, նախագահ Հոլանտի հետ հանդիպումէն, անոր յաջորդած՝ Էլիզէի կողմէ Հայաստանի Հանրապետութեան նախագահին ի պատիւ տրուած ճաշէն եւ այլազան պաշտօնական հանդիպումներէ։
Էլիզէի պալատին մէջ Մարտ 8-ին տեղի ունեցաւ Ֆրանսայի նախագահ Ֆրանսուա Հոլանտի եւ Հ.Հ. նախագահ Սերժ Սարգսեանի հանդիպումը, որուն աւարտին ստորագրուեցան շարք մը մարզերու մէջ հայ-ֆրանսական համագործակցութեան զարգացման ու խորացման ուղղուած փաստաթուղթեր:
Հայաստանի եւ Ֆրանսայի նախագահները բանակցութիւններու արդիւնքները ամփոփեցին միացեալ յայտարարութեամբ:
Նախագահ Հոլանտ իր խօսքին մէջ յիշեցուց, որ Ֆրանսան որպէս Մինսքի խումբի անդամ երկիր, ներգրաւուած է Լեռնային Ղարաբաղի հակամարտութեան կարգաւորման գործընթացին մէջ: «Մենք կը փափաքինք աշխատիլ կարգաւորում գտնելու ուղղութեամբ։ Հաստատեցինք, որ վերջին շաբաթներուն եւ ամիսներուն տեղի ունեցան շարք մը միջադէպեր։ Միջադէպերու հետաքննութեան միջոցներու գործադրութեամբ միայն կրնանք կանխարգիլել զանոնք եւ պատժել այն գործողութիւնները, որոնք հակոտնեայ են խաղաղութեան», շեշտեց Ֆրանսայի նախագահը, որ անգամ եւս կրկնեց, որ իր երկիրը կ՚ուզէ գտնել խնդրին քաղաքական լուծում:
Ֆրանսայի նախագահը յայտարարեց նաեւ որ Հայոց Ցեղասպանութեան ճանաչումը Ֆրանսայի համար յիշեցում մըն է, որ միջազգային հանրութիւնը երբեք չի կրնար ընդունիլ որեւէ ժողովուրդի ոչնչացումը: «Հայոց ցեղասպանութեան ճանաչումը մենք միշտ ալ գնահատած ենք որպէս խաղաղութեան հաստատման քայլ. խաղաղութիւն՝ մենք մեզի հետ, ինչպէս նաեւ խաղաղութիւն երկիրներու միջեւ։ Մենք միշտ դիտարկած ենք Հայոց ցեղասպանութեան խնդիրը աւելի ընդհանուր ենթախորքի վրայ եւ ուշադիր ենք մարդկութեան դէմ բոլոր ոճիրներուն եւ պատերազմական ոճիրներուն նկատմամբ», շեշտեց Ֆրանսայի նախագահը:
Հոլանտ յիշատակեց նաեւ Հայոց Ցեղասպանութեան հարիւրամեակի ոգեկոչման ձեռնարկներուն մասնակցելու նպատակով իր այցը Երեւան, որ իրեն համար խիստ յուզիչ եղած է: «Ես կ՚ուզէի իմ ներկայութեամբ հաստատել, որ Ֆրանսա կը շարունակէ զօրակցիլ Հայոց ցեղասպանութեան ճանաչման գործընթացին», ընդգծեց Ֆրանսայի նախագահը:

Իսկ նախագահ Սարգսեան իր ելոյթին, յայտնեց.- «Հէնց նոր աւարտեցինք մեր բանակցութիւնները եւ քննարկեցինք երկուստեք հետաքրքրութիւն ներկայացնող բազմաբնոյթ հարցեր։ Ուրախութեամբ եմ արձանագրում, որ բոլոր հարցերի շուրջ մեր մօտեցումները շատ մօտ են միմեանց։ … Գոհունակութեամբ փաստեցինք մեր ձեռքբերումները՝ կայուն քաղաքական երկխօսութիւն, միջխորհրդարանական շատ ամուր կապեր, տնտեսական, գիտակրթական ու մշակութային ակտիւ կապեր, ապակենտրոնացուած համագործակցութեան խորացում, միջազգային հարթակներում փոխշահաւէտ համագործակցութիւն, Ֆրանսայի կողմից Հայաստանում իրականացուող աջակցութեան ծրագրեր, միջազգային կարեւորագոյն հարցերում սատարում միմեանց, ինչպէս նաեւ ընդգրկուն իրաւապայմանագրային դաշտ։ Մենք այսօր եւս մի քայլ կատարեցինք մեր յարաբերութիւնների խորացման՝ ստորագրելով փաստաթղթեր զբօսաշրջութեան, միջհամալսարանական-գիտակրթական համագործակցութեան ոլորտներում։ … Անշուշտ, բարձր մակարդակի քաղաքական երկխօսութիւնը ամուր հիմք է նաեւ արդիւնաւէտ տնտեսական համագործակցութեան համար։ Եւ որքան էլ որ մեր տնտեսական յարաբերութիւնները դեռ չեն հասել քաղաքական յարաբերութիւնների մակարդակին, մենք հաստատուն քայլեր ենք ձեռնարկում այդ ուղղութեամբ։ Եւ ինչպէս պարոն Նախագահն ասաց՝ ես այսօր առաւօտեան ՄԵՏԵՖ-ում (Ֆրանսացի գործարարներու շարժում) փորձում էի համոզել ֆրանսիացի գործարարներին, որ Հայաստանում ներդրումային բարենպաստ պայմաններ կան, առաջարկեցի նրանց գալ Հայաստան եւ ներդրումներ կատարել։ Փորձեցի համոզել այն իրականութեամբ, որ այսօր Հայաստանը, լինելով Եւրասիական տնտեսական միութեան անդամ, կարող է հարթակ լինել նրանց համար՝ արտադրելու Հայաստանում եւ իրացնելու Եւրասիական տնտեսական միութեան 170 միլիոնանոց շուկայում։ Եւ երկրորդ՝ ունենալով Իրանի հետ լաւ յարաբերութիւններ, Իրանի դէմ պատժամիջոցների կիրառման ընթացքում այդ երկրի հետ պահպանելով լաւ յարաբերութիւններ, ճանաչելով իրանական շուկան եւ Իրանի ժողովրդին՝ Հայաստանը եւս կարող է այստեղ առաջատար ֆրանսիական ընկերութիւններին օգտակար լինել, եւրոպական ընկերութիւններին հարթակ ծառայելով՝ ունենալով հնարաւորութիւններ եւ այդ հնարաւորութիւններն ի սպաս դնել մեր այս յարաբերութիւնների զարգացմանը…»։
Մարտ 7-ին Հայաստանի դեսպանատանն ալ կազմակերպած էր շքեղ ընթրիք մը, որուն հրաւիրուած էին Ֆրանսայի հայկական կազմակերպութիւններու պատասխանատուներ, ինչպէս նաեւ Եւրոպայի զանազան երկիրներէն հայ համայնքներու ներկայացուցիչներ։ Առաջին անգամն էր, որ Հայաստանի նախագահին այցելութիւնը կը նշուէր այսքան մեծ շուքով։ Ընթրիքը տեղի ունեցաւ «Cercle de l’Union Interalliee»-ի մէջ, որ կը գտնուի Էլիզէ պալատ մօտակայքը։ Աւելի քան 120 հրաւիրեալներու մասնակցութեամբ այս ձեռնարկին կազմակերպչական բոլոր աշխատանքները եւ ծախսերը յանձն առած էր դեսպանատունը։
Ընթրիքին բացումը կատարեց Ֆրանսայի մէջ Հայաստանի դեսպան պրն. Վիգէն Չիտեչեան, որմէ ետք խօսք առաւ Ֆրանսահայ կազմակերպութիւնները համակարգող յանձնախումբի համանախագահ Մուրատ Փափազեան: Ան ներկայացուց Հայ Դատի, Հայաստանի ամրապնդման եւ Արցախի անկախութեան ճանաչումին, Սփիւռք-Հայաստան փոխյարաբերութիւններուն մասին համայնքին մօտեցումներն ու տեսակէտներն ու յուզող հարցերը։ Ապա հանդէս եկաւ ռումանահայ երեսփոխան պրն. Վարուժան Ոսկանեան: Յաջորդեց Աւստրիայէն տիկ. Ճգնաւորեան-Ազենպաուըր, որ կարեւորեց Հայաստանին եւ հայրենիքին ծառայելու հրամայականը։
Հուսկ խօսք առաւ նախագահ Սարգսեան, որ անդրադարձաւ սփիւռքահայ համայնքներու անցեալին ու ձեռքբերումներուն աշխարհի զանազան երկիրներուն մէջ։ Նոյնքան հպարտութեամբ ոգեկոչեց Հայոց բանակի սխրագործութիւնները, Արցախի պատերազմին յաղթանակները, յիշեց Ցեղասպանութեան զոհերու յիշատակին համազգային ձեռնարկները։ Անդրադառնալով Հայաստան-Սփիւռք յարաբերութիւններու նիւթին՝ ան ընդգծեց Սփիւռքի ներդրումը, շեշտելով՝ «Դուք մեր քարիւղն էք, մեր ծովն էք եւ Հայաստանը կարիքն ունի ընկերութիւններ կառավարելու ձեր կարողութիւններուն»։ Ան աւելցուց, թէ Հայաստանը այն վայրն է ուր կարելի է լաւ ու հանգիստ ապրիլ։ Սարգսեան խօսեցաւ նաեւ Սահմանադրական փոփոխութիւններուն մասին։ Սուրիահայութեան օրինակը բերելով Սարգսեան յայտնեց, թէ անոնք բերին նոր մշակոյթ եւ թէ հայրենիքը նոյն ակնկալութիւնները ունի նաեւ Եւրոպահայութենէն։ Անդրադառնալով քաղաքացիական կազմակերպութիւններու ցանցերուն, զանոնք երկրին համար շարժիչ ուժ նկատեց եւ եզրակացուց նշելով, թէ հայութիւնը դժուար պահերուն միշտ միացած է, ինչո՞ւ չմիանալ, չզօրակցիլ նաեւ այսօր աւելի խաղաղ պայմաններու մէջ։ Աւարտին, նախագահ Սարգսեան ընդգծեց Հայաստան-Սփիւռք համագործակցութեան կարեւորութիւնը։
Նախագահին գլխաւորած պաշտօնական պատուիրակութեան մաս կը կազմէին Արտաքին գործոց եւ Տնտեսութեան նախարարները, Սփիւռքի նախարարուհին եւ նախագահական գրասենեակի մամլոյ պատասխանատուները։
Մարտ 8-ին, Փարիզի քաղաքապետուհի Անն Հիտալկօ ի պատիւ Հայաստանի նախագահին՝ կէսօրուան ժամերուն ընդունելութիւն մը կազմակերպեց քաղաքապետարանի մեծ դահլիճին մէջ։
Հիտալկօ բացման խօսքը առնելով, դրուատեց հայութեան մշակութային ներդրումը Փարիզին եւ ընդհանրապէս Ֆրանսային։ Հայաստան կատարած իր այցելութեան տպաւորութիւնները մեկնաբանելով՝ ան ըսաւ, թէ Երեւանը գեղեցիկ մայրաքաղաք մըն է, ուր իւրաքանչիւր անկիւնին մէջ կարելի է ապրիլ մշակութային պահեր։ Այցելելով «Կոմիտաս» թանգարանը՝ անդրադարձած է Վարդապետին նշանակալից աւանդին ու վայելած մեծ ժողովրդականութեան՝ իւրաքանչիւր քաղաքացի ծանօթ ըլլալով անոր հրաշալի ստեղծագործութիւններուն։ Հիտալկօ նկատել տուաւ որ Հայաստանի մէջ մշակութային արժէքները վերապահուած չեն միայն յատուկ դասակարգի մը, այլ՝ ժողովրդային լայն խաւերը իրենց մասնակցութեամբ կը զարգացնեն արուեստն ու մշակոյթը։ Ան մեծապէս տպաւորուած է նաեւ «Թումօ» նորարարական, ստեղծարար կեդրոնէն, ուր կը յաճախեն մանուկներ, պատանիներ ու երիտասարդներ, որոնք այնտեղ արհեստագիտական եւ ճարտարագիտական հմտութիւններ կ՚ամբարեն եւ մեծ հաւանականութեամբ ապագային նոր գաղափարներու հիմքը պիտի դնեն։ Քաղաքապետուհին ըսաւ, թէ մտադիր են Փարիզի մէջ որդեգրելու «Թումօ»-ի օրինակը, հետեւցնելով թէ Փարիզն ալ սորվելիք բաներ ունի Երեւանէն։ Այնուհետեւ խօսքը ուղղելով Ֆրանսահայութեան՝ յայտնեց, թէ երկար ժամանակէ ի վեր կը խօսուի հայկական կեդրոն մը ստեղծելու մասին, որպէսզի Հայաստանի տուն մը հաստատուի Փարիզի մէջ։ Առ այդ հաւաստեց, թէ իրենք այդ ուղղութեամբ աշխատանք կը տանին եւ քաղաքապետարանը անպայման իր ներդրումը պիտի ունենայ այդ գործին մէջ, շրջանային խորհուրդին եւ պետութեան մասնակցութեան կողքին։
Հիտալկօ տեղեկացուց թէ նախաձեռնած են Փարիզի փողոցներէն մէկը ծանօթ հայ գրող, իգական սեռի իրաւունքներու ջատագով Զապէլ Եսայեանի անունով վերանուանելու գործին։

Ապա ելոյթ ունեցաւ Հայաստանի նախագահը։ Ան շնորհակալութիւն յայտնեց քաղաքապետուհիին ընդունելութեան համար եւ անդրադարձաւ Ֆրանսա-Հայաստան երկկողմանի սերտ յարաբերութիւններուն։ Հիացումով արտայայտուեցաւ Փարիզի մշակութային հարստութիւններու ճոխութեան, գրադարաններու բազմազանութեան մասին։ Դրուատիքով խօսեցաւ Երեւանի դպրոցներուն՝ Փարիզի քաղաքապետարանի կարեւոր ներդրումին մասին, ինչ կը վերաբերի ֆրանսախօսութեան զարկ տալու նպատակով գիրքեր եւ գրենական պիտոյքներ ապահովելու աշխատանքին։ Սերժ Սարգսեան պաշտօնական հրաւէր ուղղեց քաղաքապետուհիին՝ մասնակցելու Երեւանի հիմնադրութեան 2800-ամեակի տօնակատարութեան, որ տեղի պիտի ունենայ 2018-ին, Երեւանի մէջ։
Կոկիկ հիւրասիրութեամբ աւարտեցաւ հաւաքը։
Նախագահ Սարգսեան Մարտ 9-ին Փարիզէն մեկնեցաւ Լիոն, ուր հանդիպում ունեցաւ քաղաքապետ Ժերար Գոլոնի հետ: Մինչ այդ Հանրապետութեան նախագահի գլխաւորած պատուիրակութիւնը այցելեց քաղաքի «Պելքուր» հրապարակը եւ ծաղկեպսակ զետեղեց Հայոց Ցեղասպանութեան զոհերու յիշատակին նուիրուած յուշարձանին` յարգանքի տուրք մատուցելով Ցեղասպանութեան զոհերու յիշատակին:
Լիոնի քաղաքապետարանին մէջ տեղի ունեցած հանդիպումի ընթացքին նախագահ Սարգսեան շնորհակալութիւն յայտնեց քաղաքապետ Ժերար Գոլոնին ջերմ ընդունելութեան համար։
Սերժ Սարգսեան նշեց, թէ տեղեակ է, թէ ո՛րքան հոգածութեամբ քաղաքապետ Գոլոն կը վերաբերի Հայութիւնը յուզող հարցերուն եւ իր երախտագիտութիւնը յայտնեց ատոր համար: Նախագահը մաղթեց, որ Ժերար Գոլոն իր արժէքաւոր փորձառութիւնն ու գիտելիքները շարունակէ ծառայեցնել երկու քաղաքներու` Երեւանի եւ Լիոնի միջեւ համագործակցութեան յետագայ խորացման։
Հանդիպումի ընթացքին զրուցակիցները քննարկեցին ապակեդրոնացուած համագործակցութեան, գիտակրթական, տնտեսական եւ շարք մը այլ ուղղութիւններով գործակցութեան խորացման վերաբերող հարցեր:

Be the first to comment

Leave a Reply

Your email address will not be published.


*