Խորհրդարանական Ընտրութիւններ եւ… Նախընտրութիւններ

ՀԱՅՐԵՆԻՔ
Խմբագրական
Մարտ 6, 2017

«Այսօր Հ.Յ. Դաշնակցութիւնը լուրջ գործընթացի սկսած է, արդէն քանի տարիէ ի վեր, եւ այդ գործընթացը շարունակելու առաքելութիւն ունի: Մենք պարտաւորութիւն ունինք սկսածը անշրջելի դարձնելու, բարեփոխումներն ալ աւարտին հասցնելու»:

   Արմէն Ռուստամեան

Կը մօտենայ Հ.Հ. խորհրդարանական ընտրութեան օրը:
Կիրակի, Ապրիլ 2, 2017 թուականը այն օրն է, ուր նոր սահմանադրական դրութեամբ պիտի կատարուին ընտրութիւնները: Նոր ընտրական օրէնքն է որ պիտի գործադրուի եւ նախագահական կարգավիճակէն խորհրդարանական կարգավիճակ փոխադրուելով, նժարը բեռցուած պիտի ըլլայ Ազգային Ժողովի նորընտիր անդամներուն վրայ:
Հետաքրքրական երեւոյթներէն մէկը այն է թէ, շատ մը քաղաքական հոսանքներ, որոնք սահմանադրական ընտրութեան դէմ քուէարկած էին, կամ ալ նոյնիսկ պոյքոթի ենթարկած էին, այժմ լրջօրէն պատրաստութիւններու մէջ են, այս ընտրապայքարին իրենց մասնակցութիւնը բերելու: Դիտորդներու շարքին ալ պիտի ըլլան մարդիկ, որոնք դէմ էին ի նպաստ խորհրդարանական կարգավիճակի սահմանադրական ընտրութեան:
Մինչ այդ ընտրարշաւին ազդանշանը տրուեցաւ Կիրակի Մարտ 5-ին, եւ այդ օրն իսկ Հ.Յ.Դաշնակցութիւնը ներկայացուց իր փլաթֆորմը, ուր յստակօրէն նշուեցաւ թէ, յետ երկար տարիներու հետեւողական աշխատանքի արդիւնք կարելի է հասնիլ այս անկիւնադարձային ընտրապայքարի սեմին, ուր ժողովրդավարական կանոնները պիտի գերազանցեն անձն ու անձնականը:
Այս իրադարձութիւններու լոյսին տակ «Նոր Սկիզբ, Արդար Հայաստան» կարգախօսով Հ.Յ.Դաշնակցութիւնը կը կատարէ իր ընտրապայքարը:
Անոր շարքերն ու համակիրները կ՛ընդգրկեն աշխատաւորը, պաշտօնեան, մշակը, զինուորն ու մտաւորականը, որոնք ընտրարշաւին պիտի մասնակցին յաչս հայ հիմքերու հիմքին՝ արդարութեան, որ կ՛ընդգրկէ նոյնքան հաւասարութեամբ թէ՛ արական եւ թէ՛ իգական իրաւունքներն ու գործունէութեան կարելիութիւնները:
Նաեւ Հ.Յ.Դաշնակցութեան համար արդար Հայաստանը ազատ, ժողովրդավար, խաղաղ, ինքնիշխան, բարեկեցիկ, ուժեղ, զարգացող, երիտասարդ, իրաւունքի հայրենիքն է: Կարեւոր է երիտասարդութեան ներդրումը, եւ այդ ալ Հայաստանի մէջ, հայրենիքի երդիքին տակ, հեռու օտար ամայի գաղթատենչ ճանապարհներէ:
Ի վերջոյ համակարգային, որակական փոփոխութիւններու նոր աւիշի մը ազդանշանն է որ կը կատարէ Հ.Յ.Դաշնակցութիւնը, մասնակցելով առանց որեւէ դաշինքի:
Արդեն իսկ տասնեակ տարիներ շարունակ պայքարիլը ի նպաստ խորհրդարանական կարգավիճակին կարելի է նկատել շօշափելի յաղթանակ:
Միեւնոյն գործընթացով, տասնեակ տարիներ կրնան տեւել հասնելու համար «Արդար Հայաստան»ի տեսլականին:
Տեղին է անգամ մը եւս կրկնել Հ.Յ.Դ. Բիւրոյի քաղաքական ներկայացուցիչ, Ազգային ժողովի Հ.Յ.Դ. խմբակցութեան ղեկավար, Հ.Յ.Դ. համամասնական ցուցակը գլխաւորող Արմէն Ռուստամեանի վերոյիշեալ հաստատումը թէ,
մենք պարտաւորութիւն ունինք սկսածը անշրջելի դարձնելու, բարեփոխումնե՛րն ալ իրենց աւարտին հասցնելու համար:

Be the first to comment

Leave a Reply

Your email address will not be published.


*