ԵՐԱԺՇՏԱԿԱՆ ԵՐԵԿՈՅ.- ՆՈՒԻՐՈՒԱԾ ԵԹՈՎՊԻԱՀԱՅ ԵՐԱԺՇՏԱԳԷՏ ՆԵՐՍԷՍ ՆԱԼՊԱՆՏԵԱՆԻ

ՊՈՍԹԸՆ.- Հայ Մշակոյթի Բարեկամներու Հիմնարկը (Friends of Armenian Culture Society) կը տեղեկացնէ թէ, յառաջիկայ Փետրուար 19-ին, երեկոյեան ժամը՝ 7:00-ին, Ուաթըրթաունի «Մովսէսեան» սրահին մէջ, կազմակերպած է երաժշտական երեկոյ մը, նուիրուած Եթովպիահայ երաժիշտ Ներսէս Նալպանտեանի, որ օրին մեծ ներդրում ունեցած է երաժշտութեան բնագաւառէն ներս, եթովպիական կշռոյթն ու արդի ճազ երաժշտութեան երանգները ներմուծելով եւ նոր ստեղծագործութիւններ կատարելով:
Ներսէս Նալպանտեան ծնած է Այնթապ 1915-ին, եւ ընտանիքը կրցած է խոյս տալ Հայոց Ցեղասպանութենէն, փոխադրուելով Հալէպ: Երաժշտութիւն ուսանած եւ դասաւանդած, ան իր հօրեղբօր՝ Գէորգի ցուցմունքներուն հետեւելով, 1938-ին կը գաղթէ Եթովպիա, ուր կը ղեկավարէ կայսեր Հայլէ Սելասիէի «Քառասուն Մանուկներ»ու (Arba Lijoch) խումբը, յատկապէս բաղկացած փողահարներէ: Անոնք քառասունն ալ հայ որբեր էին: 1924-ին, Երուսաղէմ այցելութեան ժամանակ կայսեր Հայլէ Սելասիէ, ընբոշխնած էր այս որբերուն երաժշտութիւն եւ գեր-տպաւորուած, որոշած էր որդեգրել:
Նալպանտեան, այս նուագախումբը ղեկավարելու կողքին, նաեւ ստանձնած էր բարձր պաշտօններ, ստանձնելով պետական երաժշտանոցէն ներս բանալի պաշտօններ:
Արեւմտեան եւ տեղական գործեր օգտագործելով, Նալպանտեան մեծ հռչակ սփռած է: Համա-Ափրիկեան Միութեան քայլերգն ալ յօրինած է Նալպանտեան, գործ մը որ պիտի ներկայացուի ելոյթին օրը:
Յատուկ հանդիսութեամբ մը, եւ Հայլէ Սելասիէի հրամանով, Նալպանտեան ստացած է Եթովպիական հպատակութիւն:
Նալպանտեանի զաւակներուն հրաւէրով, 2004-ին Պոսթընէն Either Orchestra խումբը այցելեց Եթովպիա եւ քանի մը ելոյթներ ունեցաւ: Այս տեսակի երաժշտութեան մէջ մասնագիտացած խումբին անդամներն են հիմնադիր Ռաս Կերշըն, որ իր կողքին պիտի ունենայ սրնգահար Մարք Զելեսքի, դաշնակահար Կիլսըն Շաշլիք, հարուածային գործիքներու մասնագէտներ՝ Վիչենթէ Լըպրոն եւ Ճէք Սմիթ, թաւջութակահար Ռիք ՄըքԼաֆլին, եւ փողահարներ՝ Թոմ Հալթըր, Տան Ռոզընթալ, Ժոել Եննիոր եւ Չարլի Քոլհասը: Հիւրաբար ելոյթ պիտի ունենան Պրուք Թեսֆայէ, Ռոնըլտ Մըրֆի, Մանոլօ Մայրենա եւ Սերենա Չորպաճեան:
Նախքան այս ելոյթը, խօսք պիտի առնէ Պորիս Աճեմեան (Փարիզի Պօղոս Նուպար Գրադարանէն), փոխանցելու համար յաւելեալ տեղեկութիւններ:
Մուտքի սակ՝ $25 եւ $35.-
https://web.ovationtix.com/trs/pesptps/10137251/1065567 կամ հեռաձայնել.-
(617) 923-8487 (Երեքշաբթիէն՝ Կիրակի, ժամը 12:00-5:00 կ.ե.):

Be the first to comment

Leave a Reply

Your email address will not be published.


*