ՅԱՅՏԱՐԱՐՈՒԹԻՒՆ

Յունուար 27-ին, յատուկ հրամանագրով մը, Ա.Մ.Ն.-ի նախագահ Տոնըլտ Թրամփ ցնոր տնօրինում, որոշած է եօթը երկիրներու — մեծամասնութեան իսլամ — հպատակութիւն ունեցող անհատներու մուտքը Միացեալ Նահանգներ արգիլել:
Այս որոշումը տրուեցաւ Հրեաներու Ողջակիզման օրը, այն օրը ուր կը քննադատուին կրօնամոլ եւ ազգայնամոլ դիրքորոշումները:
Այս յատուկ որոշումը արգելք կը հանդիսանայ սուրիահպատակներու, որոնց կարգին հայերու, մուտքին Միացեալ Նահանգներ:
Այս արագ որոշման հետեւանքով, նաեւ Միացեալ Նահանգներէն ներս ապրելու եւ գործելու իրաւունք (կրին քարտ) ունեցող հայորդիներ անհաճոյ անակնկալներու եւ դժուարութիւններու առջեւ գտնուեցան, ժամեր շարունակ արգելափակուելով եւ հարցաքննուելով: Ամերիկահայ գաղութը քաջատեղեակ է նմանօրինակ իրադարձութիւններու: Ի վերջոյ նմանօրինակ պայմաններու տակ, բազմաթիւ հայորդիներ ապաստան գտած են Միացեալ Նահանգներու մէջ:
Հասկնալով հանդերձ, թէ ամէն բանէ վեր է Միացեալ Նահանգներու ներքին ապահովութիւնը, Ա.Մ.Ն. Արեւելեան Շրջանի Հ.Յ.Դ. կը հաւատայ թէ նմանօրինակ որոշում գաղթականներու եւ փախստականներու դէմ, կը խախտէ հիմնական ամերիկեան համոզմունքները՝ հաւասարութեան, հանդուրժողականութեան եւ արդարութեան:
Միացեալ Նահանգները հիմնուած են աշխարհի զանազան անկիւններէն ժամանած գաղթականներէ: Բոլոր ամերիկացիները, թէ՛ գաղթական եւ թէ՛ ամերիկածին, մաս կը կազմեն Ամերիկեան կառոյցին, առանց նկատի ունենալու որեւէ կրօնք, սեռ եւ ազգային պատկանելիութիւն: Այս բազմազանութիւնն է որ կը կերտէ Ամերիկան եւ կը վերածէ հզօր երկրի:
Հայոց Ցեղասպանութէնէն, Լիբանանի ներքին քաղաքացիական պատերազմի օրերէն, Ատրպէյճանի հալածանքներէն եւ 1988-90-ի փոկրոմէն, մինչեւ վերջին տարիներու Իրաքի եւ Սուրիոյ մէջ տիրող քաոսային վիճակէն խոյս տալով, հայորդիներ ժամանած են հոս եւ ապահով պայմաններու տակ սկսած նոր կեանքի, այլ գաղթականներու նման:
«Ղրկէ՛ ինծի քու յոգնած, աղքատ, խճողուած բազմութիւններդ, որոնք կ՛ուզեն ազատ շնչել»…Այս բառերը ի զուր չեն տեղադրուած յուշարձաններու վրայ: Այս բառերը կը ներկայացնեն իսկական իմաստը «Ազատութեան արձան»ին: Մենք կը միանանք բոլոր անոնց, որոնք կը պայքարին համերաշխութեան, մարդկային իրաւունքներու եւ արդարութեան համար:
Ամերիկահայ համայնքը չի կրնար լուռ մնալ, երբ այս ժառանգութիւնը վտանգի տակ կը գտնուի:

Ա.Մ.Ն. Արեւելեան Շրջանի Հ.Յ.Դ. Կեդրոնական Կոմիտէ
Յունուար 30, 2017

Be the first to comment

Leave a Reply

Your email address will not be published.


*