ԼՈՒՔԱՇԵՆՔՈՅԻ ՍԱԴԱՅԷԼԱԿԱՆ ՍԱԴՐԱՆՔԸ

ՀԱՅՐԵՆԻՔ
Խմբագրական
Յունուար 23, 2017

Վերջին ամիսներուն, յստակ էր թէ Պելոռուսիա սկսած էր ի նպաստ Պաքուի
դիրքորոշումներ ունենալ: Սակայն լրագրող Ալեքսանտր Լափշինի ձերբակալութեան գծով, կատարուած իրադարձութիւնները մտահոգիչ եւ ահազանգային են:
Եղելութեան մասին տեղեկացողը ափ ի բերան անակնկալի կրնայ գալ, մանաւանդ այս օրերուն երբ հետզհետէ շատ աւելի կը խօսուի լրագրողներու ազատ արտայայտութեան եւ պաշտպանութեան մասին:
Յատկապէս հայորդիին համար, նորութիւն մը չէ որ Ալիեւի բռնատէր ղեկավարութիւնը տարիներէ ի վեր գործի լծած է «սեւ ցուցակ» մը, որուն մէջ ոչ թէ միայն հայորդիներու երկար ցանկ մը կայ, այլ նաեւ բազմաթիւ օտարներու անուններ, որոնք պարզապէս Արցախ այցելած ըլլալով, կը նկատուին անբաղձալի էակներ: Ասոնց կարգին են արուեստի, մշակոյթի, ընկերային եւ այլ բնագաւառներէ ներս գործող բազմաթիւ ծանօթ անձնաւորութիւններ: Ասոնց կարգին է նաեւ հանրածանօթ լրագրող-լուսանկարիչ եւ «Թրավըլ Պլոկ»ի համար գործող ու մեծ ժողովրդականութիւն վայելող, միեւնոյն ժամանակ Ռուսաստանի եւ Իսրայէլի քաղաքացի՝ Ալեքսանտր Լափշին:
Մինչեւ այսքան տեղեկութիւն, ոչ մէկ անակնկալ կը յայտնաբերուի արդէն իսկ նմանօրինակ հալածախտներէ վայելող Ալիեւի ղեկավարութեան մասին: Նոյնիսկ կարելի է, պարզապէս եզրակացնել թէ անուն մըն ալ աւելցած է այդ երկար «սեւ ցուցակ»ին վրայ:
Սակայն, այսչափով չէ աւարտած հարցը: Յստակօրէն գործի լծուած է Պելոռուսիոյ ներկայ ղեկավարութիւնը, յանձին այլ հալածախտէ տառապող բռնատէր՝ Ալեքսանտր Լուքաշենքոյի:
Արդարեւ, Լուքաշենքօ իր հլու կամակատար ոստիկանութեան հրահանգած է, այդ օրերուն Մինսք ժամանած Լափշինը ձերբակալել եւ յետագային յանձնել Ատրպէյճանի պետութեան:
Բազմիցս Արցախ այցելած Լափշին, նաեւ ուքրայինական անցագիր գործածելով, ժամանած է Ատրպէյճան:
Սերտ յարաբերութիւններ մշակող երկու երկիրներուն համար, Լափշինի այլ ազգի պատկանելիութիւնը երբեք խոչընդոտ չէ որպէսզի ան իր գործած «յանցանք»ին պատճառով ձերբակալուի եւ ուղղարկուի Պաքու:
Ըստ Պելոռուսիոյ դատախազին, երկու երկիրներուն միջեւ համաձայնութիւն գոյութիւն ունի, այնքան ատեն որ փաստեր կան քրէական պատասխանատուութեան ենթարկելու:
Դեռ անցեալ Ապրիլին էր, երբ Պելոռուսիոյ Արտաքին Գործոց նախարարը՝ քառօրեայ պատերազմի առաջին օրերուն, խեղաթիւրած էր դէպքերուն իրադարձութիւնները, եւ պաշտօնապէս քննադատած էր հայկական կողմը՝ իբրեւ նախայարձակ: Իսկ, աւելի ուշ անցեալ աշնան, Երեւանի մէջ կատարուած Հաւաքական Անվտանգութեան Պայմանագրի Կազմակերպութեան սեղմ կազմով խորհուրդի նիստին, Լուքաշէնքօ շարունակ խուսափած էր լրագրողներու հետ հանդիպումներ ու հարցազրոյցներ ունենալէ:
Վտանգաւոր է Պելոռուսիոյ ներկայ գործակցութիւնը, շատ աւելի վտանգաւոր քան փեթրոտոլարներով կլանուած Հունգարիոյ վարչապետ Վիքթոր Օրպանը, որ 2012-ին, փոխան հսկայ գումարի մը ազատ արձակած էր 2004-ին՝ հայ սպայ Գուրգէն Մարգարեանը կացինահարած՝ Ռամիլ Սաֆարովը:

1 Comment

  1. It too sad that the Belorussian president acts this way. It seems that for some “politicians” there are no historical or past memories. How easily this president and his entourage forgets the Armenian soldiers who fought bravely during the WWII to liberate Belorussia from the tyranny of Nazism. Journalist Alexandre Lapshin has visited Nakorno Karapakh/Artsakh to study the situation of Armenians in Artsakh and probably report on that. On whose paycheck is Loukashenko? Armenians must be very vocal and show support for Lapshin all around the world.

Leave a Reply

Your email address will not be published.


*