2017՝ Աքաղաղի Կամ Աքլորի Տարի

ԳԷՈՐԳ ՊԵՏԻԿԵԱՆ

Այս տարի չինական 4715-րդ տարին է, որուն լուսնային օրացոյցին համաձայն՝ նոր տարին, որ կը սկսի Յունուար 28, 2017-ին, կ՛անուանուի աքլորի կամ աքաղաղի տարի:

Համաձայն չինական աւանդութեան, երբ Պուտտան երկինք պիտի բարձրանար, ուզած էր իր հետ, իր աստուծոյ տանիլ, միայն հետեւեալ 12 կենդանիները՝ մուկը, ցուլը, վագրը, ճագարը կամ նապաստակը, վիշապը, օձը, ձին, ոչխարը, կապիկը, աքլորը, շունը եւ խոզը:

Պուտտան իւրաքանչիւր անասունի անունը տարուան մը անունով մկրտած էր: Այս ձեւով չինական առաջին տարին սկսած է մուկով, եւ անոր յաջորդած էին միւսները: Ամէն 12 տարին անգամ մը, կրկնուած էր անասունի մը անունը:

Այս որդեգրումը ընդունուած էր քրիստոնէական օրացոյցի ծնունդէն շատ առաջ եւ բաժնուած էր 12ի, որովհետեւ մարդիկ նշմարած էին, թէ իւրաքանչիւր տարուան ընթացքին լուսինը 12 անգամ լիալուսին կը տեսնուէր:

Աքլորը կը գրաւէր այս շարքին 10րդ տեղը:

Ստորեւ չինական տարիներու բաժանումները իրենց տարիներու դասաւորումով.-

1.- Առնետ.- 1900-1912-1924-1936-1948-1960-1972-1984-1996-2008-2020

2.- Ցուլ.- 1901-1913-1925-1937-1949-1961-1973-1985-1997-2009-2021

3.- Վագր.- 1902-1914-1926-1938-1950-1962-1974-1986-1998-2010-2022

4.- Նապաստակ.-1903-1915-1927-1939-1951-1963-1975-1987-1999-2011-2023

5.- Վիշապ.- 1904-1916-1928-1940-1952-1964-1976-1988-2000-2012-2024

6.- Օձ.- 1905-1917-1929-1941-1953-1965-1977-1989-2001-2013-2025

7.- Ձի.- 1906-1918-1930-1942-1954-1966-1978-1990-2002-2014-2026

8.- Ոչխար.- 1907-1919-1931-1943-1955-1967-1979-1990-2003-2015-2027

9.- Կապիկ.- 1908-1920-1932-1944-1956-1968-1980-1992-2004-2016-2028

10.- Աքլոր.- 1909-1921-1933-1945-1957-1969-1981-1993-2005-2017-2029

11.- Շուն.- 1910-1922-1934-1946-1958-1970-1982-1994-2006-2018-2030

12.- Խոզ.- 1911-1923-1935-1947-1959-1971-1983-1995-2007-2019-2031

ԴՐԱԿԱՆ ԿԷՏԵՐ

rooster1Շատ ուշադիր, չարքաշ, զօրաւոր, հանճարեղ, ինքնավստահ, գործունեայ, ընկերային, խելացի եւ ռոմանթիկ: Գոռոզ եւ հպարտ ըլլալով հանդերձ, միշտ կը ձգտին լաւագոյնին եւ շուտով իրենց նպատակին կը հասնին, ժրաջան եւ յարատեւ աշխատանքով: Առողջ ու գործունեայ: Ուժի գործածութեան դէմ չեն, յատկապէս իրենց իրաւունքներուն տիրանալու հարցերուն մէջ: Նաեւ կը սիրեն շրջանակէն ներս միասնաբար աշխատանք տանելու ձեւը: Ստեղծագործ միտք ալ են:

ԺԽՏԱԿԱՆ ԿԷՏԵՐ

Իրենց մօտ շեշտուած գոռոզութիւնը զիրենք կը դարձնեն վտանգաւոր եւ շատ յաճախ ալ անվստահելի: Ինքնահաւան: Կ՛ըլլան նաեւ կռուազան եւ կ՛որդեգրեն իրենց իրաւունքներուն համար ամէնէն վատ միջոցներով պայքարելու եղանակը: Միշտ կը սիրեն անկախ ապրիլ: Հպարտ են իրենց անձով: Անհանդարտ ալ են: Երբեմն լաւատես ըլլալ կը ձեւանան, սակայն միշտ յոռետես են:

ԱՔԼՈՐԻ ՏԱՐԻՆ ԾՆԱԾ ՆՇԱՆԱՒՈՐ ԱՆՁԵՐ

Նենսի Ռեկըն, Եոքօ Օնօ, Նիլ Եանկ, Քեթրին Հեփպըրն, Տենի Օզմընտ, Փիթըր Ուսթինով, Ֆիլիփ Իշխան, Կլորիա Սթեֆան, Ճօան Քոլինզ, Սթիվ Մարթին, Ռիքարտ Վակներ, Քարոլ Պըրնեթ, Լերի Քինկ, Կոլտի Հաուն:

Աքլորի տարին ծնածները ընդհանրապէս կ՛ըլլան լրագրողներ, ոստիկաններ, ուսուցիչներ կամ դասատուներ, մարզասէրներ, ֆիլմարուեստի մէջ նշանաւոր եւ հանրայայտ դերասաններ:

Չինական աստղագիտութեան համաձայն՝ աքլորի կամ աքաղաղի տարին ծնածները կ՛ըլլան անհանդարտ, զգայուն, իմաստուն: Թէեւ մարդասէր կը ձեւանան, սակայն նախ իրենց շահերը կը փնտռեն: Ընտանիքին համար միայն կ՛ելլան զոհաբերող, որովհետեւ կը հաւատան, որ ընտանիքը իրենց համար սրբութիւն է: Նախաձեռնող են եւ սակայն շատ նախանձոտ: Կը սիրեն հաւաքական եւ ընկերային կեանքը: Իրենց հետ ունեցած բարեկամութիւնը կ՛ըլլայ միայն նախ իրենց շահերու վրայ հիմնուած: Կը սիրեն օգտակար դառնալ շրջապատին: Շատախօս են, երբ անգամի մը համար իրենց խօսելու առիթ տրուի, երկար կը խօսին:

Նիւթապէս ապահով կեանք մը կ՛ունենան: Իրենց համոզումը միշտ անխախտ մնացած է նոյնիսկ իրենց յառաջացած տարիքին: Ծափահարուիլը շատ կը սիրեն, իսկ շքանաշաններ ստանալու համար «խենթ» կ՛ըլլան:

Հետեւեալ տարիները աքլորի տարի կոչուած են կամ պիտի կոչուին.-

1909-1921-1933-1945-1957-1969-1981-1993-2005-2017-2029

Աքլորին լաւ ամիսներն են՝ Փետրուարն ու Նոյեմբերը

Բախտաւոր թիւերն են՝ 5, 7 եւ 8

Բախտաւոր օրերը՝ ամսուած 4րդը եւ 26րդը

Նախասիրած գոյները՝ դեղին, ոսկեգոյն, սրճագոյն

Be the first to comment

Leave a Reply

Your email address will not be published.


*