Ներթափանցման Փորձ Տաւուշի Չինարի Գիւղէն Հարաւ-Արեւելք

Այս մասին առաջին տեղեկութիւնները հրապարակած է Հայաստանի պաշտպանութեան նախարարութեան մամլոյ քարտուղար Արծրուն Յովհաննիսեան, որ գրած է. «Հայաստանի զինուած ուժերը բախումներ ունեցած են հակառակորդին հետ: Կիրարկուած են արձակազէններ եւ նռնականետեր, բախումները կը շարունակուին: Հայաստանի զինուած ուժերը լիովին կը վերահսկեն իրավիճակը` կանխելով հակառակորդին  ոտնձգութիւնները»:

Հակառակորդի շարքերուն մէջ կան մինչեւ 7 մահացած զինուորներ եւ վիրաւորներ: Ըստ անոր, Հայաստանի զինուած ուժերը կը կատարեն որոնողական ու տարածքի մաքրութեան աշխատանքներ, ազրպէյճանցի մեռեալներուն թիւը տակաւին յստակ չէ, սակայն անոնցմէ մէկուն դիակը մնացած է հայկական կողմը: Ա. Յովհաննիսեան նաեւ դիտել տուած է, որ հայկական կողմը եւս ունեցած է կորուստներ: Արդարեւ, պետական սահմանի պաշտպանութեան համար մղուած մարտերուն ընթացքին զոհուած են աւագ հրամանատար Շաւարշ Մելիքեան, շարքայիններ Էտկար Նարայեան եւ Էրիկ Աբովեան:

Շաւարշ Մելիքեան Հայաստանի Շիրակի մարզի Աշոցք համայնքէն էր, ան 26 տարեկան էր, 4 տարի է, որ անցած է պայմանագրային ծառայութեան: Ամուսնացած չէր, ընտանիքին միակ արու զաւակն էր: Աւելի քան մէկ տարիէ ի վեր պայմանագրային դրութեամբ ան կը ծառայէր Բերդի մէջ: Նահատակ զինուորը ուսանած է Վազգէն Սարգսեանի անուան զինուորական հիմնարկին մէջ, ծառայած է Հայաստանի տարբեր զօրամասերու մէջ, նաեւ` Գորիսի մէջ տեղակայուած զօրամասին մէջ եղած է դասակի հրամանատար: Մելիքեանի հրամանատարութեան տակ ծառայած զինուորները պատմած են, որ ան հիանալի սպայ էր, շատ լաւ կը տիրապետէր զինուորական գործին, ընկերասէր էր, զինուորներուն նուիրուած, անոնց կողմէ սիրուած ու յարգուած:

Էդգար Գրիգորի Նարայեան Երեւանէն է, 1995-ի ծնունդ, աւարտած էր Հայաստանի մէջ Եւրոպական քոլեճը:

 

Տաւուշի մէջ հետախուզական-ներթափանցման փորձին արձագանգած է նաեւ Հայաստանի արտաքին գործոց նախարարութիւնը` խստագոյնս դատապարտելով այս արարքը, որուն պատճառով արձանագրուած են մարդկային կորուստներ: Նախարարութիւնը խորին ցաւակցութիւն յայտնած է զոհուածներու հարազատներուն եւ ծառայակիցներուն:

Յիշեցնելով, որ միջազգային հանրութիւնը` եռանախագահներուն միջոցով, բազմիցս կոչ ուղղած է յարգելու զինադադարը, յատկապէս տօնական օրերուն, արտաքին գործոց նախարարութիւնը կը նշէ, որ զինուորական գործողութիւն կատարելով Ամանորի եւ Ս. Ծննդեան տօներու նախաշեմին` Պաքուն համամարդկային արժեհամակարգին դէմ կը գործէ:

 

Be the first to comment

Leave a Reply

Your email address will not be published.


*